Երեկ Չարենցի տուն-թանգարանում հեղինակային ափսեների իր հավաքածուն ցուցադրեց ճանաչված մտավորական, գրող Ռուբեն Անգալադյանը:
Արվեստագետն «Առավոտին» տեղեկացրեց, որ ցուցադրվում է 50 ստեղծագործություն: Մտահղացումը ծնվել է այն ծամանակ, երբ նկարիչ Ռոբերտ Էլիբեկյանն առաջին անգամ իրեն նկարազարդ ափսե է նվիրել: «Այս արվեստաձեւը պատմական, գեղարվեստական խնդիր է լուծում»,- ասաց նա:
Ըստ Ռ. Անգալադյանի, հեղինակային իրենց գործերում ամենապայծառ ափսեներն են ներկայացրել տարեց նկարիչներից Էդգար Արծրունյանցն ու Քնարիկ Հովհաննիսյանը: Իրենց ափսեներն էին ներկայացրել Ռ. Էլիբեկյանը, Ս. Խարազյանը, Մ. Դիլանյանը, Ա. Գրիգորյանը, Արա Շիրազը, Քիքին, Միրա Խոն, Կ. Նիգարյանը, Ռ. Աջիկյանն ու այլք:
Ցուցահանդեսին ներկա ՀՀ առաջին տիկին Բելլա Քոչարյանը հիացած ասում էր, «Գեղեցիկ է, շատ է գեղեցիկ»: Ապա ցանկություն հայտնեց տարբեր ազգությունների նկարիչների նմանատիպ ցուցահանդեսին իր հավաքածուից էլ ցուցադրել, «Այդքան շատ չէ, բայց կարող եմ»,- ասաց նա:
Չարենցի տուն-թանգարանի տնօրեն Լիլիթ Հակոբյանն էլ նկատեց, որ թերեւս առաջին անգամ է նկարազարդ ափսեների ցուցադրություն կազմակերպվում: Դիմելով ներկա արվեստագետներին, նա պատրաստակամություն հայտնեց բարեգործական ցուցահանդես-վաճառք կազմակերպել:
Նկարիչների միության նախագահ Կարեն Աղամյանը հայտնեց, որ նկարիչները կարիք ունեն այսպիսի վերաբերմունքի: Նա հավելեց. «Շնորհիվ այս ցուցահանդեսի՝ սկիզբ է դրվում մոռացված ավանդույթի՝ ափսեների նկարազարդման մշակույթին»:
Ռ. Անգալադյանը «Առավոտին» ասաց, որ մտադիր է ցուցադրել իր ռուսական հախճապակե հավաքածուն նույնպես:
