ՊԱՅՔԱՐԻ ՀԻՆ ՁԵՎԵՐԻ ԱՐԴՅՈՒՆՔԸ ԶՐՈՅԱԿԱՆ Է

Ասում է իրավապաշտպան Վարդան Հարությունյանը

Օրերս հասարակական ու քաղաքական մի քանի գործիչներ ու անհատներ հանդես էին եկել հայտարարությամբ, որով հասարակական ու քաղաքական ուժերին, անհատներին կոչ էին արել «երկրում սահմանադրական կարգը վերականգնելու, անխուսափելի դեստրուկտիվ զարգացումներից երկիրը զերծ պահելու եւ օրինական իշխանություններ ձեւավորելու համար» քաղաքական պայքարի նոր ձեւեր եւ մեթոդներ մշակել ու դրա շուրջ քննարկումներ սկսել: Հայտարարության հեղինակների համար էլ էր անսպասելի այն փաստը, որ իրենց հեղինակած փաստաթուղթը լայն արձագանք է ստացել ոչ միայն Հայաստանում, այլեւ մասնավորապես ռուսական մամուլում: Հիշյալ հայտարարությունն անցած օրերին արտատպել են ռուսական տասնյակ թերթեր ու էլեկտրոնային լրատվամիջոցներ: Նշենք, որ այս նախաձեռնությանը պատրաստվում են միանալ քաղաքական ու հասարակական գործիչներ:

– Պարոն Հարությունյան, ըստ Ձեզ, ինչո՞ւ հասարակությանը համախմբվելու կոչ անող այլ հայտարարությունները, որոնք արվել էին այս ընթացքում, նույնքան լայն արձագանք չեն գտել մասնավորապես արտասահմանյան ԶԼՄ-ներում, որքան այս մեկն էր:

– Ես հարցը երկու մասի կբաժանեի: Նախ՝ ո՞րն էր պատճառը, որ մենք հայտարարություն արեցինք: Մենք հասարակական գործիչներ ենք եւ, բնականաբար, Հայաստանում վերջին տարիներին ստեղծված մթնոլորտը, քրեածին տարրերի մուտքն ու կայացումը քաղաքականության մեջ, նաեւ նրանց այսօրվա ձգտումը՝ ապագա ընտրությունները տապալելով շարունակել մնալ իշխանության, չէին կարող մեզ անտարբեր թողնել: Հայտարարությունը գրելիս երկար մտածելուց հետո որոշեցինք, որ այն, ի տարբերություն եղած մյուս հայտարարությունների, կոչ չի անելու համախմբվել այս կամ այն անձի, կառույցի կամ մեր շուրջ, այլ մտահոգություն կհայտնի երկրում ստեղծված իրավիճակի կապակցությամբ եւ կոչ կանի բոլորին, աչքի առաջ ունենալով Հայաստանում ժողովրդավարական կարգերի հաստատումը, համագործակցել իրար հետ՝ մի կողմ թողնելով եղած տարատեսակ հակասությունները:

Իհարկե, մինչ մեր հայտարարությունը՝ էլի տարբեր հայտարարություններ, կոչեր եղել են, բայց արդյունք չի եղել: Մենք էլ պատանիներ չենք, մտածելու համար, թե մեր հայտարարությունը միանգամից փոխելու ու շտկելու է հասարակական դաշտը: Նկատի ենք ունեցել, որ այն էլ կարող է արժանանալ նախորդների ճակատագրին, բայց զարմանալի է ու հաճելի, որ այն արագ արձագանք ստացավ ու դարձավ քննարկման նյութ: Կարծում եմ, որ մասնավորապես «դրսերում», նկատի չունեմ միայն Ռուսաստանը, այսօր խոշորացույցով ուսումնասիրում են մեզ, մեր քաղաքական դաշտը եւ ուզում են Հայաստանի հասարակական-քաղաքական դաշտում տեսնել մի նոր երեւուույթ: Այդ իմաստով, կարծում եմ, մեր հայտարարությունը նորույթ էր եւ ուշադրություն գրավեց: Գուցե դա լավ է մեզ համար, բայց կուզենայի, որ դա լավ լիներ առաջին հերթին մեր քաղաքական ու հասարակական դաշտի ու Հայաստանի համար: Այսօր մեր երկրում գծվել է մի սահման, որից այն կողմ անցնելը դառնում է կամ՝ անթույլատրելի, կամ՝ անհնարին:

– Ձեր հայտարարության մեջ խոսք է գնում քաղաքական պայքարի նոր ձեւերի ու մեթոդների մասին: Արդեն նախանշվա՞ծ են դրանք, թե՞ դեռ քննարկումների արդյունքում պետք է ի հայտ գան:

– Մենք այն կարծիքին ենք, որ այն ձեւերն ու մեթոդները, որոնք մեր քաղաքական ուժերը արդեն փորձել են ընտրությունների ժամանակ եւ դրանից հետո ու արդյունքի չեն հասել, պետք է համարել արդեն փորձված ու նոր ճանապարհներ որոնել: Կան ճանապարհներ, որոնք երեւի քննարկումների ընթացքում կշտկվեն, բայց ձեւերն ակնհայտ են: Օրինակ՝ ուկրաինական ժողովրդավարական հեղափոխությունը, որը ցույց տվեց այդ ձեւերից մեկը՝ պարզապես հարկավոր է լինել անկոտրում, իսկ սկսած պրոցեսը պետք է լինի անընդհատ: Կարող են գտնվել նաեւ այլ տարբերակներ:

– Արդյո՞ք Ձեր այդ նախաձեռնությունը նախընտրական ենթատեքստ չունի:

– Մեր հայտարարությունն ստորագրողներն այս շարժառիթով չեն առաջնորդվել: Մեզ առաջնորդել է մինչեւ ընտրությունները դաշտը մաքրված տեսնելու ցանկությունը, այլ ոչ անմաքուր ընտրություններին մասնակցելու մոլուցքը:

Հ. Գ. «Ես կիսում եմ մտահոգությունը եւ Հայաստանի բարդ ներքաղաքական իրադրության գնահատականը, որ տրվեց մեր հասարակության որոշ ներկայացուցիչների կողմից»: Այս մասին «Նոյյան տապանի» թղթակցի հետ զրույցում ասաց ՀՀ պաշտպանության նախկին նախարար, «Ազգային վերածնունդ» կուսակցության քաղաքական խորհրդի անդամ Վաղարշակ Հարությունյանը: Հիշեցնենք, որ խոսքը Վարդան Հարությունյանի՝ այս հարցազրույցում հիշատակած հայտարարության մասին է։