Հակադարձելով վարչապետին՝ ասաց ՀՅԴ հայաստանյան ԳՄ ներկայացուցիչ Արմեն Ռուստամյանը
ՀՅԴ հայաստանյան ԳՄ ներկայացուցիչ Արմեն Ռուստամյանին հարցրինք՝ իրո՞ք Դաշնակցությունը որոշում է կայացրել Աջափնյակ համայնքի ղեկավարի ընտրություններում գործող թաղապետ Արծրուն Խաչատրյանին պաշտպանելու մասին: Ասաց, որ թեպետ Դաշնակցության Գերագույն մարմինը դեռեւս որոշում չի կայացրել Աջափնյակի մասով, սակայն նախորդ ընտրություններում իրենք հենց Արծրուն Խաչատրյանին են պաշտպանել, համայնքի դաշնակցական կառույցը մի շարք ծրագրեր է իրականացրել թաղապետի հետ, եւ կառույցը գտնում է, որ ճիշտ կլինի շարունակել համագործակցությունը. «Ես գիտեմ, որ մեր տեղի կառույցի տրամադրությունն այն է, որ իրենք շարունակեն պաշտպանել գործող թաղապետին, շարունակելու համար նաեւ համագործակցությունը, որ ձեւավորվել է այս տարիների ընթացքում»: Այդ դեպքում ինչպե՞ս են վերաբերվում դաշնակցականները իրենց կոալիցիոն գործընկեր ՀՀԿ խմբակցության ղեկավար Գալուստ Սահակյանի այն մտքին, որ եթե որոշ քաղաքական ուժեր իսկապես ձգտում են արդար, ազատ եւ նորմալ ընտրություններ ունենալ, լավ կանեն իրենց կոչերը գործի դնեն հենց Աջափնյակի թաղապետի ընտրություններից սկսած: Արմեն Ռուստամյանը նկատեց, որ ինքը կիսում է Գալուստ Սահակյանի կարծիքը, որ սա շատ լավ առիթ է, որ բոլոր քաղաքական ուժերը առնվազն այդ հարցի շուրջ համախմբվեն՝ վեր դասելով այդ հարցը բոլոր իրենց կուսակցական կամ ինչ-ինչ քաղաքական հաշվարկներից, եւ հասնեն նրան, որ այդ թաղում տեղի ունենան նորմալ արդար ընտրություններ. «Մենք, բնականաբար, բացառում ենք, որ պաշտպանենք որեւէ թեկնածուի ընտրվելը, եթե տվյալ թեկնածուն ընտրվել է կեղծիքներով, ում թեկնածուն ուզում է լինի: Եվ Դաշնակցությունը բոլոր ընտրությունների առումով թիվ մեկ խնդիր ունի, եւ խորհրդարանական, եւ նախագահական ընտրությունների առումով, եւ իհարկե ես կիսում եմ պարոն Սահակյանի կարծիքը, թե լավ առիթ է, որ բոլոր քաղաքական ուժերը այդ հարցի շուրջ համախմբվեն եւ վեր դասեն այն իրենց կուսակցական կամ քաղաքական հաշվարկներից, հասնելու համար նրան, որ այդ թաղում տեղի ունենան նորմալ, արդար ընտրություններ»:
Մենք փորձեցինք նաեւ ճշտել՝ պարոն Ռուստամյանը կիսո՞ւմ է նախորդ օրը վարչապետ Անդրանիկ Մարգարյանի կողմից արտահայտված այն միտքը, որ հայաստանյան քաղաքական ուժերի դեմ ինչ-որ գործողություններ են սկսվել, եւ դրանք իրականացնում են չկայացած ու քաղաքականության մեջ ոչնչի չհասած ուժերը, ասաց նաեւ, որ հատկապես Հանրապետականի մասով այդ ամենը իրականացվում է որպես սեւ PR ընդդեմ Հանրապետականի: Եվ արդյո՞ք Դաշնակցությունը եւս իր վրա զգում է այդ սեւ PR-ի ազդեցությունը:
Արմեն Ռուստամյանը նկատեց, որ իրենք առաջին անգամ չէ, որ հայտարարել են, թե մեր երկրում վաղուց է նկատվում ոչ քաղաքական ուժերի ակտիվացում. «Մենք, որպես քաղաքական ուժեր, պետք է իսկապես համախմբվենք, որպեսզի թույլ չտանք, որ քաղաքական դաշտը վարկաբեկվի ոչ քաղաքական ուժերի մուտքով: Որովհետեւ դա հարված է քաղաքական համակարգին, քաղաքական դաշտի կայացմանը եւ, ի վերջո, ժողովրդավարությանը: Ես վստահ եմ, իսկապես քաղաքական ուժերն են շահագրգիռ երկրում ժողովրդավարության հաստատմանը, մնացած բոլոր ոչ քաղաքական ուժերին, նաեւ այդ կտրվածքով կարելի է իրենց տարբերել, ձեռնտու չէ ժողովրդավարության հաստատումը, որովհետեւ իրենք ոչ քաղաքական են հենց այդ իմաստով, իրենք չեն ուզում հենվել ժողովրդի վրա, իրենք փորձում են ժողովրդին այս կամ այն ձեւով խաբելով, կաշառելով կամ զանազան այլ անօրինական ձեւերով տեղ բռնել քաղաքական դաշտում»:
Արմեն Ռուստամյանին նաեւ հարցրինք, թե համաձա՞յն է վարչապետի նախորդ օրը արտահայտած այն մտքին, որ երկրում կրիմինալի աննախադեպ աճ չկա, որ լրագրողները շարունակ այդ մասին գրելով՝ հարեւան երկրների մոտ գցում են մեր երկրի վարկանիշը: Փորձեցինք ճշտել՝ ՀՅԴ հայաստանյան ԳՄ ներկայացուցիչը կիսո՞ւմ է ՀՀԿ նախագահի այդ կարծիքը:
Արմեն Ռուստամյանը, ի տարբերություն իր կոալիցիոն գործընկերոջ, ասաց. «Մենք ինքներս ենք ասել, որ կան մտահոգիչ երեւույթներ, որոնք կապված են սպանությունների, լրագրողների նկատմամբ իրականացված բռնությունների հետ, եւ այդ ամենը ոչ այլ ինչ է, եթե ոչ կրիմինալ դրսեւորում: Շատ լավ հասկանալի է, թե ինչ է՝ անօրինական գործողություն է, հանցագործություն է, եւ, բնականաբար, մենք դրան դեմ ենք եղել եւ միշտ էլ դեմ ենք լինելու: Որ այդպիսի ահազանգեր կան, որ այդ մտահոգության համար հիմքեր կան, դա մենք նաեւ գերագույն ժողովում ենք արձանագրել, եւ այդտեղ լրագրողները ոչ մի մեղք չունեն, լրագրողների պարտավորությունն է եղած փաստերը ներկայացնելը, եւ իրենց պետք չէ կաշկանդել»:
