Հերթական սթարը քաղաքացու իրավունքն է փորձում խլել
Երկու օր առաջ Արաբկիր եւ Քանաքեռ-Զեյթուն համայնքների առաջին ատյանի դատարանում քննության դրվեց «Հենզսթար» ՍՊԸ-ի հայցը։ Վերջինս պատասխանող է ճանաչել Դ. Անհաղթի 19/1 շենքի 26 բնակարանի բնակիչ Վանիկ Աթաբեկյանին եւ անշարժ գույքի կադաստրի տարածքային ստորաբաժանմանը։ ՍՊԸ-ն վիճարկում է 1998-ին սեփականաշնորհված քաղաքացու ավտոտնակի վկայականը։ ՍՊԸ-ն պնդում է, որ երկու տարի առաջ իրեն սեփականաշնորհված ավտոտնակի տարածքն ավելի օրինական է։ «Նշված ավտոտնակը կառուցելիս Վ. Աթաբեկյանն օգտագործել է «Հենզսթարի» շինության պատը», շարադրել էր ՍՊԸ-ն իր հայցադիմումում եւ ապա շարունակել. «Չկա նշված պատն օգտագործելու համար Վ. Աթաբեկյանին հայցվորի կողմից տրված համաձայնություն»։ Նշենք, որ քաղաքացին վիճարկվող ավտոտնակը կառուցել է 1985-ին եւ վերակառուցել 1987-ին։ Այնպես որ, երկու տարի առաջ ի հայտ եկած հերթական սթարին չէր կարող դիմել, ստանալու չեղած ՍՊԸ-ի չեղած հայտարարությունը։ «Հասարակական նշանակությամբ շինության» տերերը հեռուն գնացող պահանջ էլ են դատարանին ներկայացրել, այն է. «պահանջում ենք, որ քաղաքացին իր միջոցներով անջատի ավտոտնակը հայցվորի շինությունից»։
«Օմեգա» գիշերային սթրիփ-բարի, «Սթար» սուպերմարկեթների ցանցի տերերի դեմ նամակով ՀՀ նախագահի վերահսկողական ծառայությանն են դիմել վերոնշյալ շենքի բնակիչները։ Բանն այն է, որ ընդհանուր օգտագործման տարածքում, շենքից 3-4 մ հեռավորության վրա աճել են օդակարգավորիչ սարքերի համակարգեր։ 24-ժամյա աղմուկը հնարավորություն չի տալիս լսել անգամ կողքինիդ, հանգիստ զգալ տանը։
Մենք երեկ եղանք տեղում։ Տեղեկացանք, որ քաղաքապետի 1998 թ. հոկտեմբերի 2-ի 756 որոշմամբ, հիմք ընդունելով «Ինքնակամ կառույցների կարգավիճակը որոշող հանձնաժողովի» դրական եզրակացությունը, ճանաչվել է թվով 136 քաղաքացիների սեփանակության իրավունքն ինքնակամ կառուցված շենքերի, շինությունների նկատմամբ։ Սակայն պարզվում է, որ սեփականացրած կառույցի տերն ապահովագրված չի եղել, քանի որ 20 տարի հետո ի հայտ եկած կազմակերպությունը ոչ միայն փորձում է խլել քաղաքացու միջոցներով կառուցված, այդքան տարիներ տնօրինած կառույցը, այլ դատարան է դիմել, գտնելով, որ նշված ավտոտնակը կառուցելիս քաղաքացին օգտագործել է իր պատը։ Իսկ Սահմանադրությունը հաճախ վկայակոչող մեր պետական այրերը սիրում են ցիտել սեփականության անձեռնմխելիության իրավունքի եւ դրա պետական երաշխավորության մասին։ Դե արի ու դրան հավատա։
ՌՈՒԶԱՆ ՄԻՆԱՍՅԱՆ
