Ասում
է 55-ամյա դիմորդ Մելանյա Շարբաթյանը Երեկ մեկնարկեցին բուհական ընդունելության
քննությունները: 13 առարկաների գծով երեկ քննություն հանձնեց նախնական թվով 1647
հոգի: Հայոց լեզու-1-ին ներկայացել էր 215 հոգի, բացակա էր 15-ը: Մտնելով քննական
դահլիճ՝ նկատեցինք, որ, ի տարբերություն նախորդ տարվա աղմուկի, երբ հանձնաժողովի
անդամներն ակտիվ կերպով բացատրություններ էին տալիս դիմորդներին, այս անգամ հայոց
լեզվի այս դահլիճում կատարյալ լռություն էր: Դիմորդների լարվածությունը մեղմելու
համար, ինչպես կեսկատակ նշեց հանձնաժողովի նախագահ Սեյրան Գրիգորյանը, «անհրաժեշտ
բացատրություններ ենք տալիս, հումորներ ենք անում, երեխաների վրա ջղայնանում ենք,
երբ փորձում են հուշել իրար»: Խնդրեցինք մանրամասնել, թե հատկապես ինչ կարգի հումորներ
են արվում՝ լիցքաթափելու նպատակով. «Դեռ ցանկը չեմ կազմել, մի քանի օրից կասեմ»,-
խոստացավ պրն Գրիգորյանը: Հանձնաժողովի նախագահն ասում է, որ հարցաթերթերը կազմելիս
փորձել են հնարավորինս խուսափել երկձեւություններից, «սակայն հայերենում դրանք այնքան
շատ են, որ լիովին խուսափելն անհնար է, հետեւաբար 2 տարբերակն էլ ճիշտ կհամարենք,
եթե կանոններին համապատասխանում են»: Գրավորներն ստուգելիս հանձնաժողովն առաջին հերթին
հիմք կընդունի դասագիրքը: Ինչ վերաբերում է շտեմարաններին, որոնք ամեն տարի թարմացվում
են, այս հարցաթերթերը կազմելիս մասնագետները փորձել են ներառել առավել հին առաջադրանքներն
ու տարբերակները, որոնց դիմորդներն ավելի ծանոթ են: Պարոն Գրիգորյանը նշեց,
որ տարընթերցումների տեղիք կարող են տալ կետադրությունը եւ որոշ ձեւաբանական իրողություններ,
երբ 2-3 տարբերակներն էլ ընդունելի են համարվում: Իսկ արդյո՞ք հայոց լեզվի երկու
հանձնաժողովներն էլ կառաջնորդվեն նույն սկզբունքներով. «Մենք միասին շատ երկար աշխատել
ենք՝ մոտ 15-20 օր, թե ինչ ընտրել, ինչպես գնահատել, աշխատել ենք լուծումների ուղղությամբ
եւ հուսով եմ՝ կպահպանենք նույնությունը, թեեւ երբեմն տատանումներ լինում են՝ հայոց
լեզուն ճկուն է ու բարբարոս…»: Ս. Գրիգորյանը նաեւ նշեց, որ իր հանձնաժողովը
բծախնդիր հաշվարկներ չի անի: Օրինակ՝ դիմորդներից մեկը մոտեցավ եւ հարցրեց՝ արդյոք
թերություն կհամարվի այն, որ ինքը մի տող բաց է թողել, եւ հետո շարունակել միտքը:
Պրն Գրիգորյանը բացատրեց, որ միավոր կհանվի այն ժամանակ, երբ նման վրիպումները կամ
ջնջումները հասնեն 3-ի կամ գրավորի մեջ աչք ծակեն: Երեկ հայոց լեզվից քննություն
հանձնող 55-ամյա Մելանյա Շարբաթյանը քննասենյակ մտավ ամենավերջում եւ դուրս եկավ
ամենավերջում: Նա խուսափում էր երեւալ իբրեւ դիմորդ: Ծնողներից շատերը, իրենց երեխաներից
զատ, անհանգստանում էին նաեւ նրա համար: «Համարյա 40 տարի աշխատում եմ երաժշտական
դպրոցներում, դասավանդում եմ դաշնամուր, ավարտել եմ երաժշտական ուսումնարան: Ունեմ
բազմաթիվ սաներ, որոնք ավարտել են եւ աշխատում են նույն ուղղությամբ»,- քննությունից
հետո մեր խնդրանքով իր մասին պատմեց տիկին Մելանյան: Հայոց լեզվից նրան կբավարարի
8 միավորը, այնուհետեւ կհանձնի նաեւ մասնագիտական քննություն, սոլֆեջիո եւ հարմոնիա:
Հայոց լեզվի քննություն հանձնելուց առաջ տիկին Շարբաթյանը ծանոթացել է շտեմարանին,
պարապել նաեւ դիմորդ-աշակերտուհու հետ: Նա իր գրավորը բավարար գնահատեց եւ հուսով
է, որ գոնե 8 միավոր կստանա: Իսկ այս տարիքում բուհ ընդունվելու գաղափարը Մ. Շարբաթյանի
մեջ ծնվել է հոր մահից հետո՝ «իմ հոգու տաճարը կառուցելու… այս տարի ինձ հետ կատարվեց
մի արտառոց դեպք՝ հայրս մահացավ, դրանից հետո ես սկսեցի նվագել, նվագել, նվագել,
ու նրան փնտրեցի այդ նվագի մեջ եւ ուզում եմ կատարելագործվել կատարողական արվեստում»:
ՀԱՍՄԻԿ ԲՈՒԴԱՂՅԱՆ
