Ի պատասխան Ջորջ Սորոսի՝ Ստամբուլում արված հայտարարությունների հայաստանյան մամուլում տեղ գտած տարաբնույթ մեկնաբանությունների, Բաց հասարակության ինստիտուտի օժանդակության հիմնադրամի հայկական մասնաճյուղը «Առավոտին» է ուղարկել հետեւյալ պարզաբանումը, որն արտահայտում է Սորոսի հիմնադրամի պաշտոնական դիրքորոշումը.
«Վրաստանում, Ուկրաինայում եւ Ղրղըզստանում ընտրությունների առնչությամբ Սորոսի հիմնադրամների գրասենյակների գործունեությունը նպատակ է հետապնդել օժանդակել տեղի քաղաքացիական հասարակությանը, որպեսզի վերջինս նպաստի թափանցիկ ընտրությունների անցկացմանը եւ ընտրողների իրազեկության բարձրացմանը: Սորոսի հիմնադրամների ցանցը ոչ կուսակցական եւ ոչ քաղաքական է. նույնը վերաբերում է նաեւ մեզանից օժանդակություն ստացող բոլոր ոչ կառավարական կազմակերպություններին: Ցանկացած պնդում այն մասին, թե մենք այդ պետություններում հեղափոխությունների կապակցությամբ որեւէ դեր ենք խաղացել՝ անհիմն է: Իրենք՝ քաղաքացիներն են դուրս եկել փողոց, որպեսզի ցույցերի միջոցով հայտնեն իրենց բողոքն ընտրակեղծիքների եւ կոռուպցիայի դեմ, որոնք նրանց զրկել են արդար ընտրությունների մասնակցելու իրենց ժողովրդավարական իրավունքից:
Հեղափոխությունները կործանարար են: Սորոսի հիմնադրամները չեն խրախուսում հեղափոխություններ. դրանք կարող են ժողովրդավարական բարեփոխումների համար ուղի հարթել, սակայն չտրամադրել դրանց որեւէ երաշխիքներ: Վերջին տարիներին նախկին Խորհրդային Միության երկրներում ժողովրդի՝ ոտքի ելնելու միտումներն այդ պետությունները մեկ քայլով մոտեցրել են ժողովրդավարացմանը: Սակայն հեղափոխական էյֆորիայի ցրվելուց հետո քաղաքական գործիչները ստիպված են եղել ժողովրդավարություն կառուցել զրոյից: Սորոսի հիմնադրամներն այս դժվարին գործում օգնում են կառավարություններին, ինչպես նաեւ աջակցում են քաղաքացիական հասարակությանը, որպեսզի վերջինս ապահովի կառավարությունների պատասխանատու գործելակերպը»:
Բաց հասարակության ինստիտուտի օժանդակության հիմնադրամ
