Կոալիցիա գոյություն չունի

Ըստ
Գուրգեն Արսենյանի, կա խորհրդարանական մեծամասնություն ՀՀ ԱԺ ՄԱԿ խմբակցության
ու համանուն կուսակցության նախագահ Գուրգեն Արսենյանը երեկ «Փաստարկ» ակումբում խորհուրդ
տվեց այն վերլուծաբաններին, ովքեր կարծում են, թե ՄԱԿ-ն ՕԵԿ-ի տեղն է զբաղեցրել,
«փակել սեփական հիմնարկը»: Գ. Արսենյանի ասելով, ամեն ինչ բնականոն է եղել գոնե այնքանով,
որքանով ՄԱԿ-ը 2003թ. նախագահական ընտրություններում պաշտպանել է Ռոբերտ Քոչարյանի
թեկնածությունը: Իսկ ընդհանրապես, Գ. Արսենյանի ասելով, իշխանական ճամբար անցնելը
չի նշանակում, թե ՄԱԿ-ի, ՀՅԴ-ի եւ ՀՀԿ-ի նպատակները նույնանում են, պարզապես հիմա
ՄԱԿ-ը ստանձնել է պատասխանատվություն «կառավարության քաղաքականության համար»: Ըստ
ՄԱԿ-ի նախագահի, այսօր ԱԺ-ում կոալիցիա՝ որպես քաղաքական մեծամասնություն, այլեւս
գոյություն չունի, կա «խորհրդարանական մեծամասնություն»: Ինչ վերաբերում է նախկինում
իր ընդդիմադիր կեցվածքով արած հայտարարություններին, ապա Գ. Արսենյանը արձանագրում
է, թե ՄԱԿ-ը երբեք էլ «չոր» ընդդիմություն չի եղել. «Մենք միայն հասարակության շահերն
էինք սպասարկում»: Իսկ խորհրդարանական ընդդիմությունը՝ «Արդարություն» եւ «Ազգային
միաբանություն» խմբակցությունները, պարոն Արսենյանի համոզմամբ, մինչեւ ՕԵԿ-ի՝ ընդդիմության
դաշտն անցնելը գրեթե բացակայում էին խորհրդարանից, եւ ՄԱԿ-ը լրացրել է այդ բացը:
Անդրադառնալով առաջիկա խորհրդարանական ընտրություններին՝ ՄԱԿ-ի նախագահը չբացառեց
ազատական գաղափարախոսության կրող ուժի հետ նախընտրական համագործակցությունը, թեեւ
ՄԱԿ-ի օրակարգում նախընտրական դաշինքի հարց չկա: «Մենք չենք ուզում մեծացնել մեր
հարմարվելու ցանկությունը»,- հայտարարել է Գ. Արսենյանը: Ու թեեւ ՄԱԿ-ն այդ ընտրություններում
լուրջ հավակնություններ ունի ու ձգտում է ԱԺ-ում մեծամասնություն ունենալ ու կառավարություն
ձեւավորել, այդուհանդերձ, մի քիչ համեստություն անելով՝ ՄԱԿ նախագահը հայտարարեց,
թե միայն ընտրություններից հետո պարզ կլինի, թե ՄԱԿ-ն ինչ հնարավորություններ ունի:
Գ. Արսենյանը կարծիք հայտնեց նաեւ, որ հաջորդ խորհրդարանում գերակշռելու են
ազատական ուժերը, որովհետեւ, նրա ասելով, «ընտրողը հոգնել է սոցիալիստական եւ պոպուլիստական
մոտեցումներից»: Իսկ թե հատկապես ո՞ր ազատական ուժերը ներկայացված կլինեն ապագա ԱԺ-ում՝
պարոն Արսենյանը չմասնավորեցրեց՝ «նրանք, ովքեր կհաղթահարեն 5 տոկոսի բարիերը»: Նա
միայն ակնարկեց, որ խոսքը «Բարգավաճ Հայաստանի» մասին չէ, որովհետեւ այդ կուսակցությունն
ազատական չէ. «Գենշերի ծրագիրն է, պահպանողական առաջադիմական: Այդ երկու բառը Գենշերն
է»: «Բարգավաճ Հայաստանի» մասով նա երեկ մի կարեւոր «բացահայտում» էլ արեց՝ նշելով,
որ այդ կուսակցության ծրագրի հեղինակը, շատերի կարծիքին հակառակ, Վիկտոր Դալլաքյանը
չէ: Պատրաստեց Ն. Մամիկոնյանը