Անկեղծացավ
ՀՅԴ հայաստանյան ԳՄ ներկայացուցիչ Արմեն Ռուստամյանը – Փաստորեն, ՀՅԴ-ն այսօր
տիրապետում է հասարակության առավել լայն շերտերին առնչվող ոլորտներին՝ սոցիալական,
առողջապահության, գյուղատնտեսության, նաեւ՝ կրթության. արդյոք Դաշնակցությունը ժամանակին
ստանձնելով այս ոլորտների պատասխանատվությունը՝ հեռահար նպատակ չէ՞ր հետապնդում հետագայում
դրանք ի շահ իրեն ծառայեցնելու, նաեւ ընտրողներին իրենով անելու համար: –
Ժամանակին, երբ այդ բաժանումը կոալիցիայում կատարվում էր, ճիշտ հակառակ տրամաբանությունն
էր գործում, մարդիկ (այս դեպքում, կարծում ենք, «մարդիկ» ասելով նկատի է առնվում
ՀՀԿ-ն եւ ՕԵԿ-ը- Մ. Ե.) խուսափում էին ստանձնել պատասխանատվությունը այն ոլորտներում,
որտեղ խնդիրների ծավալը ամենահագեցածն է եղել: Սակայն մենք շատ լավ հասկանում էինք,
որ եթե նպատակ ենք դրել մտնել կոալիցիայի մեջ հենց այն տրամաբանությամբ, որ մեջը
լինելով կարողանանք նորոգումներ իրականացնել, հնարավոր չէ խուսափել այն խնդիրներից,
որոնք այսօր հուզում են ժողովրդին: Իհարկե, սա լուրջ ռիսկ իր մեջ պարունակում էր,
եւ այսօր էլ կա: Ես չեմ ասում, թե մեզ հաջողվել է այդ ոլորտներում շատ կտրուկ փոփոխություններ
իրականացնել, բայց ես վստահ եմ, որ մենք այս տարիներին չխուսափելով մտնել այդ ոլորտների
մեջ՝ ճիշտ ենք արել, որովհետեւ եթե այդտեղ չես փոխում իրավիճակը, ապա ի՞նչ փոփոխության
մասին է ընդհանրապես խոսքը: Մենք այս ռիսկի, այդ պատասխանատվության տակ մտանք, եւ
վստահ եմ, որ այս ընթացքում մենք որոշակի նախադրյալներ ստեղծել ենք, որոնք իրենց
զգացնել կտան ժամանակի ընթացքում, եւ մի մասն արդեն արդյունք տվել է: Իսկ ընտրություններին
մենք հենց այդ հաշվետվությամբ կներկայանանք ժողովրդին: Այդ 4 ոլորտների առումով Դաշնակցությունը
շատ լուրջ պատասխանատվություն է ստանձնել եւ հաշվետվությամբ ժողովրդին ներկայանալու
փաստի առաջ է կանգնած: Այդ փորձությունը մենք պետք է անցնենք եւ դրան մենք լրջորեն
նախապատրաստվում ենք: Գաղտնիք չէ, որ կա մի ձեւ, երբ կարելի է այնպես անել, որ պատասխանատվության
բեռ չունենաս եւ շարունակ քննադատելով զբաղվես, քննադատելու մեծ հնարավորություններով
ներկայանաս ժողովրդին: Դա շատ շահեկան ձեւ է, եւ շատերը Հայաստանում ընտրությունների
ժամանակ փորձում են հենց այդպես էլ վարվել` ձայներ շահելու առումով: Բայց մենք գնացել
ենք ռիսկի եւ պատրաստ ենք հաշվետվություն ներկայացնել մեր արածի եւ չարածի մասին.
կարծում եմ, այսպես շատ ավելի ազնիվ կլինի: – ՀՅԴ համամասնական ցուցակում
եւս կան գործարար պատգամավորներ, մտավախություն չունե՞ք, որ մի օր էլ ձեր գործարարներին
կստիպեն լքել Դաշնակցության նավը: Եվ պատրաստվո՞ւմ եք 2007-ի ԱԺ ընտրություններին
դարձյալ ձեր ուսերին գործարարներ բերել խորհրդարան: – 2003-ի խորհրդարանական
ընտրություններին մենք իսկապես առաջին անգամ ընտրությունների ենք գնացել ՀՅԴ համար
հարաբերական բաց ցանկով, որովհետեւ մի քանի տարի առաջ դժվար կլիներ պատկերացնել,
որ ՀՅԴ ցուցակում կարող էին լինել այդքան շատ անկուսակցական մարդիկ: Մենք հայտնի
ենք մեր ավանդապաշտությամբ, եւ նաեւ այդ առումով իսկապես սա նոր փոփոխություն էր
մեր մոտեցումների մեջ: Մենք դրան գնացինք, սակայն պահպանելով մի կարեւոր սկզբունք՝
մենք չենք կարող բացվել այնքան, որ մեր տեսակը կորցնենք: Եթե մեր տեսակը չկարողանանք
պահպանել, չենք կարող որպես կուսակցություն հարյուրամյա պատմությունից խոսել: Եվ
այդ լավ ձեւավորված ավանդույթը մեզ լուրջ ուղղորդել է, որ մեր ընտրությունը կատարենք
10 անգամ չափելու եւ 1 կտրելու սկզբունքով: Եվ այն անձինք, ովքեր այսօր մեր ցանկում
են, ոչ միայն գործարար են եւ մեզ պետք են, այսպես ասած, միայն ընտրությունների համար,
այլեւ մենք իրենց հետ երկար ժամանակ աշխատել ենք՝ հասկանալու համար, թե մեր պատկերացումները
որքան են իրար մոտ, որքան են համընկնում, եւ բոլոր այն գործարարները, որ այսօր մեր
խմբակցության անդամ են («Ավշար»- Արայիկ Գրիգորյան, «Գրանդ-քենդի»- Արմենուհի Հովհաննիսյան,
«Աշտարակ-կաթ»- Աշոտ Ափոյան- Մ. Ե.), համապատասխանել են մեզ համար կարեւոր, եթե պատկերավոր
կարելի է ասել՝ ազգային բուրժուազիայի տիպիկ օրինակին: Իրենք ոչ միայն գործարարներ
են եւ լուրջ բիզնեսի տերեր, այլեւ ամեն ինչ անում են, որ մեր երկրի տնտեսությունը
հզորանա: – Պատրաստվո՞ւմ եք ձեր ասած ազգային բուրժուազիայի այդ ցուցակը մեծացնել
առաջիկա ընտրությունների հետ կապված: – Եթե հնարավոր կլինի ունենալ նույնպիսի
գործընկերներ այդ դաշտում, իհարկե, մենք սիրով կընդլայնենք այդ դաշտը, բայց միայն
այդ չափանիշները պահպանելով: – Իսկ մտավախություն չունե՞ք, որ իրենք էլ մի
օր ձեզ «կգցեն»: – Դատելով իմ վերը ասածներից՝ ոչ, նման մտավախություն չունեմ:
Եղել են փորձություններ նաեւ ՀՅԴ առաջ, եւ ի պատիվ մեր գործարարների՝ պետք է ասեմ,
որ իրենք մնացել են մեզ հետ, որովհետեւ մեր որոշումները եղել են նրանց համար ընդունելի,
մենք չենք ընդունել որոշումներ, որոնցից իրենք տեղյակ չեն եղել եւ այդ որոշումները
չեն պարտադրվել իրենց, քանի որ մենք մեզ, այսպես ասած, քաղաքական էլիտա ենք դիտել,
իսկ իրենց միայն տնտեսվարող սուբյեկտ: ՄԱՐԳԱՐԻՏ ԵՍԱՅԱՆ
