ԿՌՎԻ ՊԱՏՃԱՌՆԵՐԸ «Իշխանությանը մոտ կանգնած քաղաքական ուժերից դեռ կես տարի առաջ էին մեզ բարեկամաբար հայտնել, որ շուտով «Օրինաց երկիրը» իշխանությունների կողմից ստանալու է ընդդիմության կարգավիճակ,- «Առավոտին» ասաց «Ազգային միաբանություն» խմբակցության պատգամավոր Գագիկ Կոստանդյանը: – Ասվել էր, որ ընդդիմության շարքերում կատարվելու է «գործակալական ներդրում»՝ մի քաղաքական ուժ, որը պետք է շեղի ժողովրդին այսօրվա իշխանություններից ազատվելու հիմնական նպատակից: Նույնիսկ ասացին, թե քաղաքական ո՛ր դեմքերն են միանալու ՕԵԿ-ին՝ եւ ոչ իրենց ցանկությամբ, այլ հանձնարարությամբ: Նրանց անուններն առայժմ չենք բացահայտի: Բայց ինչո՞ւ հենց այժմ որոշեցին անհապաղ կատարել այդ կեղծ ընդդիմության ներդրումը: Խնդիրն այն է, որ ԱՄՆ միջազգային հանրապետական ինստիտուտի եւ Բալթիկ Սըրվեյզ-Գելափ կազմակերպության ապրիլի 30-ից մայիսի 8-ն անցկացրած հարցման արդյունքներով՝ Արտաշես Գեղամյանն ունի 57% վարկանիշ»: Նկատենք, որ ՕԵԿ պաշտոնաթերթն էլ հրապարակել է այդ հարցման այլ արդյունքներ, ըստ որոնց՝ հարցվածների ավելի քան 50%-ը համակրում է Արթուր Բաղդասարյանին, իսկ՝ «Ո՞ր կուսակցության օգտին կքվեարկեիք, եթե ընտրությունները տեղի ունենային հաջորդ կիրակի» հարցի պատասխաններով ՕԵԿ-ը գրավել է առաջին տեղն իր 12%-ով: «Գեղամյանի 57%-ը խուճապ առաջացրեց իշխանության շարքերում, եւ հասկացան, որ ուշանում են՝ պետք է կատարել ներդրումը»,- ասաց պրն Կոստանդյանը: Այնուամենայնիվ, ՕԵԿ-ը պնդում է, թե միջկուսակցական այս բանավեճը սկսեց ԱՄ-ն, եւ այս կապակցությամբ հիշատակվում է հենց Գագիկ Կոստանդյանի մայիսի 2-ի հայտարարությունը: «Այդպես չէ,- պնդեց մեր զրուցակիցը:- Մենք մի քանի անգամ քննադատել էինք նրանց հայտարարություններով եւ իրենց էլ զգուշացրել, որ սա պատասխան է մեր մասին իրենց տարածած կեղծ լուրերի: Նկատի ունեմ մասնավորապես ԱԺ նախագահի խորհրդականի խմբագրած թերթի հրապարակումը եւ այլն: Նրանք մի կողմ էին քաշվում եւ լուրեր էին տարածում դրածոների, իրենց ստորին օղակների միջոցով: Իմ հայտարարությունից առաջ էլ իրենց խմբակցության անդամներից մեկին վերջին անգամ զգուշացրել էի, թե հերի՛ք եղավ, բո՛լ եղավ՝ արդեն չափը կորցրել եք, ինչքա՞ն կարելի է նենգաբար աշխատել»: Ա. Ի.
