«ՄԵՆՔ ԴԱՌՆՈՒՄ ԵՆՔ ԸՆԴԴԻՄՈՒԹՅՈՒՆ» Համառոտակի ներկայացնում ենք երեկ ասուլիսում ԱԺ նախագահ Արթուր Բաղդասարյանի տված պարզաբանումները: – Ընդհանրապես կոալիցիաներին միավորում է մի բան. որպես կանոն՝ դա նրանց կարճ կենսագրությունն է, քանի որ կոալիցիաները ստեղծվում են որոշակի ժամանակաշրջանում որոշակի գործունեություն իրականացնելու համար: Բնականաբար, նման քաղաքական որոշումը պայմանավորված էր մի շարք լուրջ տարաձայնություններով, որոնք կային կոալիցիայի ներսում՝ ե՛ւ ներքին քաղաքական բնույթի, ե՛ւ հանրային, սոցիալական նշանակության, նաեւ արտաքին քաղաքական որոշ շեշտադրումների հետ կապված, ուստի քննարկումների արդյունքում մենք հանգել ենք այն եզրակացության, որ կոալիցիայի ներսում մեր քաղաքական կազմակերպության մնալն աննպատակահարմար է: … Ուզում եմ մինչեւ տարաձայնությունների մասին խոսելը շնորհակալություն հայտնել այն քաղաքական գործընկերներին, որոնց հետ անցել ենք 3 տարիների համատեղ ճանապարհ: Եվ անկախ տարբեր տարաձայնություններից՝ հստակ կարող եմ ասել, որ երկիրն ունեցել է առաջընթաց զարգացում: Իհարկե, տեմպերը մեզ չեն բավարարել, իհարկե, շատ հարցերում մենք ունեցել ենք տարբեր դիրքորոշումներ, բայց փաստ է, որ այս 3 տարիները եղել են… Կարծում եմ, որ նաեւ շատ կարեւոր է իրարից քաղաքակիրթ բաժանվելը, ամեն մարդ իր ճանապարհով գնալը, որովհետեւ այդ տարաձայնությունները մի շարք ուղղություններով բավականին խորացել են: … Շատ ենք խոսում Հայաստանում կոռուպցիայի դեմ պայքարի մասին: Այո՛, կոռուպցիայի ծավալները մեր երկրում շատ ավելի մեծ են, քան դրա դեմ մղվող պայքարը: Եվ մենք այդ մասին ասել ենք ոչ այս տարի, ոչ անցյալ տարի՝ մենք դա ասել ենք ԱԺ մուտք գործելուց հետո: … Պետական գույքի սեփականաշնորհման վարվող քաղաքականությունը մեր քաղաքական կազմակերպության համար չի եղել ընդունելի: Ես չեմ ասում, թե բոլոր գործարքները եղել են վատ, բայց ընդհանուր գնահատականը՝ մենք դժգոհ ենք: 1000 դոլարանոց գույքը եթե վաճառվում է 20-30 դոլարով, ապա «Օրինաց երկիրը» չի կարող պաշտպանել… Այո՛, մենք գտնում ենք, որ մասնավորեցման քաղաքականությունը պետք է վարվեր ավելի բաց, ավելի մրցակցային, ավելի հրապարակային, եւ այն մարդիկ, ովքեր այդ գումարները յուրացրել են կամ շատ արտոնյալ գներով տեր են դարձել միլիոնավոր դոլարներով ապրանքների՝ պետք է օրենքի առաջ կրեն պատասխանատվություն: Եվ այդ մասին ես նաեւ ասել եմ մինչեւ այս կոալիցիայի փլուզումն ԱԺ-ում հնչեցրած իմ հրապարակային ելույթում: Բայց տեսեք՝ սեփականաշնորհման հետ կապված իմ ելույթը կամ կուսակցության անդամների ելույթները դարձան մի ամբողջ ներքաղաքական սկանդալի առարկա: … Գլխավոր դատախազությունից ստացվեց Վերահսկիչ պալատի ուսումնասիրությունների պատասխանը, եւ մենք դա հրապարակեցինք անցած տարի: Այս տարի դիմեցին՝ նորից հրապարակեցինք: Հիմա սկսվեց քննադատության մի հեղեղ, թե ինչո՞ւ հրապարակեցիք: Լավ, եթե լրագրողները դիմում են, ուզում են 2001-2003 թվականի մասնավորեցման վերաբերյալ պատասխանը, չհրապարակե՞նք: Պիտի՛ հրապարակենք… Մենք կարծում ենք, որ օրենքի գերակայության համար պայքարը պետք է լինի առաջին դիրքերում, անարդարությունները չպետք է ճագարների նման բազմանան, որ վազենք հետեւներից՝ չկարողանանք բռնել: … Հաջորդը՝ տնտեսական դաշտի հետեւողական ապաքրեականացումը, մի սկանդալ, որը եւս ամիսներ առաջ տեղի ունեցավ… Այո՛, մենք դեմ ենք, որ տնտեսական դաշտը քրեականացվի: Մենք դեմ եղանք, եւ այդ օրենքը հետ տարան, բայց հիմա նորից բերել են այդ օրենքի նախագիծը: … Այն, ինչ տեղի ունեցավ ՕԵԿ-ում՝ գործարարների դուրս գալու հետ կապված… չե՛մ մեղադրում գործարարներին՝ ես մեղադրում եմ վախի հասարակությա՛նը: Գործարարներն այսօր վախեցած են: Եթե նույնիսկ նրանք մի թեթեւ անգամ լսել են, որ տարաձայնություն կա Արթուր Բաղդասարյանի եւ Ռոբերտ Քոչարյանի միջեւ՝ դա արդեն ինչ-որ մի փաստարկ է, որ նրանք մտածեն, թե որտեղ պիտի իրենք հայտնվեն, երբ որ նույնիսկ այդ օրերին դեռեւս գնում էր քննարկման գործընթաց, ես սա ուզում եմ հստակ մատնանշել: Բայց մենք պիտի հասկանանք մի բան, որ լավ խոսելով՝ լավ հայրենիք չեն կառուցում. մենք մեր ապագայի համար պետք է պայքարենք, մեզ պետք է հույսով, փոփոխություններով լի այլընտրանք, ոչ թե այլակարծությունը խեղդող վախի մթնոլորտ: Մենք պետք է գնանք այս ճանապարհով, սա է մեր քաղաքական կազմակերպության տեսլականը, եւ մենք այս ճանապարհով գնալու ենք առաջ: «ՀԺ»- Հնարավո՞ր չէր կոալիցիայից դուրս գալ, բայց չտալ հրաժարական, հատկապես, որ խորհրդարանական ընդդիմության մի մասը պատրաստվում է առաջիկայում դիմել Ձեզ, որ չտաք հրաժարական: – Ինձ համար ընդունելի չէ չտալ հրաժարական: Ես համարում եմ բարոյական, որ տամ հրաժարական եւ մեր քաղաքական թիմը դուրս գա կոալիցիայից: Բոլոր այն պաշտոնները, որ զբաղեցնում է ՕԵԿ-ը՝ բոլորը պետք է լքեն այդ պաշտոնները. դա մեր քաղաքական խորհրդի միաձայն որոշումն է: Հիմա ես չգիտեմ, եթե մեկը որոշի մնալ՝ մենք նրան կա՛մ կհեռացնենք, կա՛մ նա ինքը պիտի հեռանա, այսինքն՝ դրանք արդեն նոր զարգացումներ են, որոնք մեզ համար կարող են կրկին լինել անցանկալի: ԱԺ կանոնակարգով կա նաեւ հնարավորություն դնելու վստահության հարցը: Չե՛մ ուզում դնել իմ վստահության հարցը: Ուղղակի ուզում եմ հեռանալ, գնալ իմ ճանապարհով՝ իմ քաղաքական ուժի հետ միասին: «Առավոտ»- Դուք օգտագործեցիք «կոալիցիայի փլուզում» արտահայտությունը: Կոալիցիայի խորհրդի նիստում որոշվել է, որ կոալիցիան դադարեցնո՞ւմ է գոյությունը, թե՞ ՕԵԿ-ի տեղը կգրավի մեկ այլ խորհրդարանական ուժ՝ օրինակ «Ժողովրդական պատգամավոր» խումբը կամ ՄԱԿ-ը: Նշեցիք, որ չեք մեղադրում գործարարներին: Արդյոք պատճառն իրոք ա՞յն է, որ նրանք «մի թեթեւ» լսել էին, որ տարաձայնություններ կան Ձեր եւ Ռոբերտ Քոչարյանի միջեւ, թե՞ այսուհանդերձ նրանց վրա գործադրվել է ուղղորդված ճնշում կա՛մ Ռոբերտ Քոչարյանի կողմից՝ ընտրությունները կեղծված համարելու Ձեր արտահայտությանն ի պատասխան, կա՛մ կառավարության կողմից՝ մասնավորեցման Ձեր քննադատությանն ի պատասխան: – Կոալիցիան երեւի թե կշարունակի գործել՝ դա արդեն մնացած դերակատարների խնդիրն է: ՀՀԿ-ն եւ ՀՅԴ-ն, կարծում եմ, կշարունակեն՝ կոալիցիայի մեջ երեւի թե ներգրավելով այլ դերակատարների: Ինչ վերաբերում է գործարարներին՝ ժողովո՛ւրդ ջան, այդ մարդկանց հետ 4 տարի աղուհաց ենք կիսել, իրար տուն մտել-դուրս եկել, բարեկամություն, ընկերություն ենք արել: Ես հիմա չեմ ուզում այդ գիծն անցնել ու ասել ավելին: Բոլորին ամեն ինչ պարզ է: Ուզում եք ասել՝ եղե՞լ են ճնշումներ: Այո՛, եղել են: Բոլո՛ր կողմերից էլ եղել են: Հիմա կարող է իրենց հարցնեք՝ ասեն չեն եղել… Եղել է առաջարկություն՝ հեռացնել կուսակցությունից, դա՛ էլ չենք արել: Գիտեինք, չէ՞, որ պիտի գնան: Քննարկել ենք քաղաքական խորհրդում՝ չենք հեռացրել: Թող գնան իրենց ճանապարհով: «Հայլուր»- Պատրաստվում եք ընդդիմադիր դա՞շտ անցնել, մանավանդ որ՝ Ձեզ գրկաբաց չեն ընդունում այնտեղ: – Ասեմ ձեզ, որ մեզ գրկաբաց ոչ մի տեղ չեն ընդունել: Մեզ իշխանության մեջ գրկաբա՞ց են ընդունել: Առաջին օրվանից մտել ենք իշխանություն՝ հարվածել են, ընդդիմությունն էլ է հարվածել: Հիմա, եթե ձեզ թվում է, որ մեզ ընդդիմության դաշտում չպիտի հարվածեն՝ էլի՛ պիտի հարվածեն, բայց մեզ համար կարեւորը ժողովրդի գնահատականն է: Իհարկե, մենք դառնում ենք ընդդիմություն, սա միանշանակ է: Դառնում ենք ընդդիմություն մեր պատկերացումներով, մեր մոտեցումներով… Ի՞նչ է պատահել: Այսօր հասարակության հսկայական զանգվածը ընդդիմադիր տրամադրություններ ունի: Բոլորին էլ տեղ կգտնվի՝ մենք ոչ մեկի տեղը չենք ուզում զբաղեցնել: Մենք ունենք մեր ուրույն ճանապարհը: Մենք ունենք պայքարի մեր ճանապարհը, մեր երկրի, մեր ապագայի կառուցման մեր տեսլականը: «Ռոյթեր»- Ձեւակերպվե՞լ է արդյոք Ձեր հրաժարականը: – Հրաժարականը տեղի կունենա ԱԺ կանոնակարգի սահմանած ընթացակարգով: Մայիսի 22-ին ԱԺ առաջին նիստում ես կներկայացնեմ իմ գրավոր հրաժարականը, արդեն այսօր ես հայտարարեցի, 5 օրվա ընթացքում ես այն կվերահաստատեմ, ինչպես պահանջում է օրենքը եւ կլքեմ ԱԺ նախագահի պաշտոնը: Ավելին եմ ասում՝ ես կարող եմ օրենքով դնել իմ վստահության հարցը, որ հեռանամ քվեարկությամբ: Բայց ես դա չեմ անում: Ինձ մոտ այսօր եղել են պատգամավորներ՝ տարբեր քաղաքական խմբակցություններից, առաջարկել են ընտրել 2-րդ տարբերակը՝ դնել քվեարկության: Ես ասել եմ՝ ո՛չ, մենք համարում ենք բարոյական, ճիշտ, արժանապատիվ, որ դուրս ենք կոալիցիայից՝ դուրս ենք գալիս ամբողջությամբ: «Ինտերֆաքս»- Պատրաստվո՞ւմ եք մասնակցել նախագահական ընտրություններին: – Ես ոչինչ չեմ բացառում: Կգա ժամանակը՝ կկայացնենք քաղաքական վճիռներ: «ՀԱ»- ՕԵԿ խմբակցությունը լքեցին 9 պատգամավորներ: Որքանո՞վ է այդ գործոնը ազդել Ձեր՝ կոալիցիայից դուրս գալու վճռի վրա: – Բնականաբար, եթե ասեմ ոչ մի առնչություն չկա՝ ճիշտ չի լինի, ազնիվ չի լինի: Եթե ասեմ՝ միայն դա է պատճառը, էլի ազնիվ չի լինի: Ես նորից եմ ասում՝ եղել են տարաձայնություններ… Գործընթաց է, որը հասունացել է: «Գրաշխարհ»- Ի՞նչ արտաքին արձագանքներ կան այս քայլին: – Երեկ արդեն մի շարք արտասահմանյան լրատվական գործակալություններ, հայտնի չէ՝ թե ինչ աստիճանի օպերատիվությամբ, հայտնել են, Հայաստանում սպասվող այս գործընթացի մասին: Բնականաբար, կլինեն միջազգային գնահատականներ, միջազգային կարծիքներ: Մենք չենք կարող դրանցից խուսափել: «ՀԺ»- Ինչպե՞ս եք վերաբերվում Տիգրան Թորոսյանի թեկնածությանը՝ որպես ԱԺ նախագահ: – Տիգրան Թորոսյանի թեկնածությանը ԱԺ նախագահի պաշտոնում վերաբերվում եմ շատ լավ, որովհետեւ նա նորմալ մարդ է: Չեմ կարող ասել, թե ՕԵԿ-ն ինչպես կքվեարկի նրա թեկնածությանը՝ դա քաղաքական հարց է: Պատրաստեց ԱՆՆԱ ԻՍՐԱՅԵԼՅԱՆԸ
