Արամ
Գասպարիչը Հայաստանն ուղարկում է Շանհայ Երեկ ՄԱԱ-ում հյուրընկալված Հայաստանի
դեմոկրատական կուսակցության նախագահ Արամ Գասպարի Սարգսյանը կարծիք հայտնեց, որ Հայաստանն
առանց փոխելու իր արտաքին քաղաքականության կողմնորոշումը պետք է փորձի ձերբազատվել
մեկ երկրի՝ Ռուսաստանի կախվածությունից: Ա. Սարգսյանն այս ուղղությամբ հնարավոր քայլերի
սեփական մոտեցումն ունի՝ կողմնորոշման ընտրություն անել՝ Արեւմո՞ւտք, թե՞ Արեւելք:
Նա կոչ է անում ընտրել Արեւելքն ու ճանապարհներ փնտրել Արեւելքում ձեւավորվող Շանհայի
համագործակցության կազմակերպությանն անդամակցելու համար, որը հեռանկարում, ըստ նրա,
լինելու է «կայունության եւ ուժի բեւեռը»: «Արեւելյան բլոկում կա հզոր Չինաստան,
կա Իրան, հավանաբար կլինի Հնդկաստան, եւ այլն: Այսինքն՝ այդ բոլորը միասին իրենք
արդեն ձեւավորում են իրենց խաղի կանոնները: Եվ, ես կարծում եմ, գլխավոր խնդիրն այն
է, որ տեսնենք, թե մեր շահերը որտեղ են ավելի շատ արտահայտված լինելու: Հայաստանի
շահերն ավելի շատ համընկնում են հենց այս, քան այլ բեւեռների հետ, որոնք մեզ առաջարկվում
են: Թուրքիայի հետ մեր հարաբերությունների կարգավորված չլինելը ստիպում է լրջորեն
մտածել այն բեւեռի որոնման մասին, որը երբեք Հայաստանն անեքսիայի չի ենթարկի»,- հայտարարեց
Ա. Սարգսյանը՝ հավելելով, որ այդ նոր բեւեռը կօգնի թուլացնել միակողմանի կախվածությունը
մեկ երկրից՝ Ռուսաստանից (ի դեպ, դա այն դեպքում, երբ հայտնի է, որ մատնանշված նոր
բեւեռը ձեւավորվում է առավելապես Ռուսաստանի ակտիվ ջանքերով): Ա. Սարգսյանը
երեկ խոսեց նաեւ առաջիկա՝ 2007թ. ԱԺ ընտրությունների մասին ու հայտարարեց, որ ՀԴԿ-ն
այլեւս գաղափարական հենք չունեցող դաշինքներին չի անդամակցելու. «Այլեւս չի կարող
այդ խայտաբղետ կառույցը լինել, տարբեր գաղափարական հենք ունեցող, տարբեր ուղղություններով
շարժվել: Որովհետեւ դա խանգարում էր ընդհանուր գործին: Դա փաստ է»: Ինչ վերաբերում
է «Արդարությանը», ապա՝ Ա. Սարգսյանի համոզմամբ, այն ստեղծվել էր երկրում սահմանադրական
կարգը վերականգնելու համար, ինչը նրան այդպես էլ չհաջողվեց անել: Ապրիլի վերջերին
«Ազդակ» ակումբում ՀԺԿ նախագահ Ստեփան Դեմիրճյանը հայտարարել էր, թե առաջին հերթին
հենց ՀԺԿ-ի շնորհիվ էր, որ ե՛ւ 1999, ե՛ւ 2003 թվականների ԱԺ ընտրություններում հաղթել
էին առաջին դեպքում՝ «Միասնություն», երկրորդում՝ «Արդարություն» դաշինքները: «Եվ
գաղտնիք չէ նաեւ, որ ՀԺԿ-ն «Արդարություն» դաշինքի առանցքային ուժն է»,- ասել էր
Ստ. Դեմիրճյանը: ՀԴԿ-ն կարո՞ղ է առանց ՀԺԿ-ի աջակցության 2007թ. խորհրդարանական ընտրություններում
մանդատներ ստանալու լուրջ հավակնություն ունենալ: «Ստ. Դեմիրճյանն այդ բառերը չի
ասել, որովհետեւ ինքն էլ շատ լավ գիտի, որ ամեն մի կուսակցություն, որը միավորվեց
«Արդարություն» դաշինքում, իր տեղն ու դերն ուներ: Եվ բոլորը գիտակցում էին, ավելորդ
որեւէ կառույց ոչ ոք իր հետ չէր տանի: Եկեք այդ խոսակցությունները թողնենք մի կողմ:
Այլ բան է, որ նրա կշիռն այն ժամանակ, նրա ռեյտինգն ավելի բարձր էր, հասկանալի պատճառներով,
եւ, իհարկե, նա ավելի շատ տեղ ստացավ, քան՝ ասենք, այլ կուսակցություն»,- հակադարձեց
Ա. Սարգսյանը: Ինչ վերաբերում է խորհրդարանական նոր ընտրություններին, ապա դրանց
մասնակցության ու ընդհանրապես ներքաղաքական հնարավոր զարգացումների վերաբերյալ ՀԴԿ-ն
իր խոսքը կասի առաջիկա աշնանը՝ սեպտեմբեր-հոկտեմբեր ամիսներին: Կուսակցության նախագահը
հայտարարել է, թե իրենք պայքարից չեն հրաժարվելու, ավելին՝ «ավելի լուրջ պայքարի
ենք գնալու, կիրառելու ենք նոր ընտրական տեխնոլոգիաներ, որոնց մասին կասենք ընտրությունից
մեկ ամիս առաջ»: Ն. Մ.
