Ընդգծում է վարչապետ Անդրանիկ Մարգարյանը
– Շշուկներ են պտտվում, որ ՀՀԿ-ն նախապատրաստվում է արտահերթ համագումարի,
եւ որ մի շարք ազդեցիկ քաղաքական եւ պետական գործիչներ մտադրություն ունեն անդամակցել
ՀՀԿ-ին: Կխնդրեինք մեկնաբանել այս շշուկների իսկությունը: – Եթե ուշադիր ուսումնասիրեք
ՀՀԿ պատմությունը, ապա կտեսնեք, որ ցանկացած համապետական ընտրություններից առաջ ՀՀԿ-ն
միշտ էլ հրավիրել է արտահերթ համագումար, որտեղ հստակեցրել է ընտրություններին մասնակցելու
իր մարտավարական սկզբունքները: Պարզ է, որ 2007թ. խորհրդարանական ընտրությունները
բացառություն չեն եւ կարեւորվում են կուսակցության կողմից, քանի որ այդ ընտրություններին
հաջորդելու է հանրապետության նախագահի ընտրությունը 2008 թվականին: Ինչ վերաբերում
է մի շարք ազդեցիկ քաղաքական-պետական գործիչների՝ ՀՀԿ-ին անդամակցությանը, կարող
եմ ասել, որ այս գործընթացն էլ նորություն չէ: ՀՀԿ շարքերում այժմ էլ ներգրավված
են բազմաթիվ հայտնի քաղաքական-պետական գործիչներ: ՀՀԿ-ն իր 15-ամյա գործունեությամբ
ցույց է տվել, որ կուսակցության համար առավել կարեւոր են ազգի եւ պետության շահերը,
ունի հստակ գաղափարախոսություն եւ նաեւ մեծ դեր ու ազդեցություն քաղաքական գործընթացներում,
եւ սա նաեւ կուսակցական քաղաքական գործիչների գործունեության արդյունքն է: –
Իսկ հնարավո՞ր է, որ ՀՀԿ-ն արտահերթ համագումարի ժամանակ հայտարարի նախագահական ընտրություններում
իր թեկնածուի կամ այն քաղաքական գործչի անունը, որին կսատարի ՀՀԿ-ն: – Այս
հարցին բազմիցս պատասխանել ենք, որ ՀՀԿ-ն նախագահական ընտրությունների վերաբերյալ
իր դիրքորոշումը կհայտնի միայն 2007թ. խորհրդարանական ընտրություններից հետո: Ներկայումս
մենք կարեւորում ենք հենց խորհրդարանական ընտրությունները: – Կոալիցիայի մաս
կազմող «Օրինաց երկիր» կուսակցության ղեկավար, ԱԺ նախագահ Արթուր Բաղդասարյանը վերջերս
մի գերմանական թերթի տված հարցազրույցում ակնարկել էր, որ ՀՀ-ում տեղի ունեցած նախորդ
բոլոր՝ թե՛ նախագահական եւ թե՛ խորհրդարանական ընտրությունները կեղծվել են: Ձեր գնահատականն
այս հայտարարությանը: – Հայաստանյան մամուլում տրված տեղեկատվությունից կարելի
էր այդպես հասկանալ, բայց ես կասկածում եմ, որ Արթուր Բաղդասարյանն ի նկատի է ունեցել
2003 թվականի համապետական ընտրությունները, քանի որ 2003թ. նախագահական ընտրությունների
ժամանակ ՕԵԿ-ն այն հիմնական կուսակցություններից էր, որ սատարում էր Ռոբերտ Քոչարյանին:
Իսկ 2003թ. խորհրդարանական ընտրությունների, քաղաքական համաձայնության ձեռքբերման
արդյունքում Արթուր Բաղդասարյանը զբաղեցրեց Ազգային ժողովի նախագահի պաշտոնը, եւ
այս երեք տարիների ընթացքում երկրում տեղի ունեցած բոլոր գործընթացներին թե՛ ԱԺ-ում,
թե՛ կառավարությունում ՕԵԿ-ը ունեցել է ակտիվ մասնակցություն եւ հետեւաբար ունի պատասխանատվության
իր բաժինը: Ըստ www.hhk.am-ի Հ. Գ. Վարչապետը մի քանի
ուշագրավ հայտարարություն էլ արել է Ջավախքի վերաբերյալ, նախ նշելով՝ «Հայաստանը
իր պատրաստակամությունն է հայտնել գործուն աջակցություն ցուցաբերել Ջավախքում իրականացվելիք
սոցիալ-տնտեսական զարգացման ծրագրերին: Ցավոք սրտի, վրացական կողմը մինչ այժմ խոստումներից
բացի որեւէ քայլ չի ձեռնարկել»: Եվ հավելել է. «Ներկայումս քաղաքական խնդիրների եւ
քաղաքական պահանջների ներկայացման ժամանակը չէ, սակայն եթե Վրաստանում քննարկման
դրվի այնպիսի սահմանադրության կամ օրենքի նախագիծ, որով նախատեսվում է դաշնային պետության
մոդել, ապա այդ դեպքում, իհարկե, պետք է հաշվի առնվի նաեւ Ջավախքի հարցը»:
