Տեխնիկական վրիպակ՝ հօգուտ «ՎիվաՍելլի» Ընկերությունը մի զանգի վճարը կրկնակի է գանձում Մեր ձեռքի տակ «ՎիվաՍելլի» բջջային Կլասիկ պայմանագրային քարտի բաժանորդներից մեկի խոսելավարձի ցուցակն է: Ըստ ամփոփաթերթիկի, մարտ ամսին բաժանորդի հեռախոսային խոսակցությունների վարձը կազմել է 18 հազար 537 դրամ 62 լումա: Սակայն ցուցակն ուշադիր զննելիս կարելի է հայտնաբերել, որ բաժանորդի կողմից կատարած 20 զանգը՝ ցուցակում կրկնակի, նույնիսկ եռակի է արձանագրված, այսինքն, նույն ժամին, նույն գումարով, նույն հեռախոսահամարին կատարած զանգը ֆիքսված է մի քանի անգամ, ինչը եւս գումարվել է խոսելավարձին եւ արտացոլվել վերջնահաշվարկում: Այսինքն, եթե բաժանորդը անուշադիր գտնվի եւ իր խոսելավարձի ցուցակը մանրազնին չուսումնասիրի, հնարավոր է, որ տեղում վճարումները կատարի եւ այդպես էլ չիմանա, որ վճարել է ավելի, քան խոսել է: Ընկերությունում այս առնչությամբ որեւէ պարզաբանում չկարողացան տալ, «ՎիվաՍելլի» լրատվական ծառայության ղեկավար Միհրան Սահակյանը միայն ենթադրեց, որ «սա գուցե տեխնիկական վրիպակ է»: Նա տուժած բաժանորդին խորհուրդ տվեց դիմել ընկերության սպասարկման բաժին եւ բողոքարկել: Նկատենք, որ կոնկրետ այս բաժանորդի դեպքում կրկնակի տպվածի արդյունքում ավելի գանձված գումարն այնքան էլ մեծ չէ, մոտ 600 դրամ: Շատ բաժանորդներ, եթե նույնիսկ թյուրիմացությունը նկատեն էլ՝ «զահլա» չեն անի մի քանի հարյուր դրամը ետ ստանալու համար գնալ սպասարկման կենտրոններ ու դիմում գրել: Թեեւ ընկերությունից մեզ չասացին, թե «ՎիվաՍելլի» Կլասիկ քարտի քանի բաժանորդ ունեն՝ պայմանավորելով այն կոմերցիոն գաղտնիքով, սակայն եթե ենթադրենք, որ ընկերությունն ունի 100 բաժանորդ, եւ նրանցից 10-ը վրիպակը կնկատի ու կբողոքի, ապա ամենահամեստ հաշվարկով ընկերությունը տեխնիկական վրիպակներով ամսական 50-55 հազար դրամի օգուտ է ունենում: Ամբողջ խնդիրն այն է, որ վերջին ժամանակներս ընկերության տեխնիկական խնդիրների պատճառով բաժանորդներն անընդհատ քաշքշուկների մեջ են ընկնում. մեկ զրոյանում է կանխավճարային «Ալո» քարտի բաժանորդների հաշիվը, մեկ կապն է նկատելիորեն վատանում, մեկ օպերատորի հետ կապվելն անհնար է եւ այլն: Այս բոլոր դեպքերի հետ կապված՝ ընկերությունից անընդհատ խորհուրդ են տալիս դիմել բաժանորդների սպասարկման բաժին ու պարզել: Սեփ. լր.
