Սակայն
նա պնդում է, որ «մեսրոպյան ուղղագրության» հարցում իր կողմնակիցների շարքերը ստվարանում
են ՀՀ քաղաքացիական եւ տնտեսական գործերով վճռաբեկ դատարանը երեկ պետք է որոշեր
ԱԻՄ նախագահ Պարույր Հայրիկյանի նախաձեռնությամբ մեսրոպյան ուղղագրության վերականգնմանն
ուղղված դատարշավի ճակատագիրը: Սակայն փաստաթուղթը չհրապարակվեց կողմերի բացակայության
պատճառով: Բողոք բերող անձը (Պ. Հայրիկյանի ներկայացուցիչը) դատարանում չէր՝ մեկ
այլ դատական նիստի մասնակցելու հիմնավորմամբ: Այդպես ասացին ԱԻՄ կուսակցության անդամները,
իսկ պատասխանողը՝ ՀՀ ԿԳ նախարարության լեզվի պետական տեսչության պետ Լավրենտի Միրզոյանը
արձակուրդում էր: Հիշեցնենք, որ Պ. Հայրիկյանը վիճարկում էր տեսչության անգործությունը՝
օրենքի պահանջը չկատարելու մասով: Հայցը մերժվել էր առաջին ատյանի եւ վերաքննիչ դատարաններում:
Հեռախոսով կապվեցինք ԱԻՄ նախագահի հետ եւ փորձեցինք տեղեկանալ վեճի մասով
նրա ակնկալիքների ու անելիքների մասին: Հարցրինք՝ ի՞նչ է կարծում, բողոքը կբավարարվի՞,
թե՞ ոչ: Նա պատասխանեց. «Ես գոնե այս խորհրդանշական՝ Մայրության, գեղեցկության քրիստոնեական
տոնի օրը մայրենին չեմ պղծել, եւ սա իմ հաղթանակն է»: Պ. Հայրիկյանը գրեթե համոզված
էր (այդպես հասկացվեց), որ բողոքը չի բավարարվելու ու նաեւ լավատեսորեն նշեց, որ
հետզհետե ավելանում են մեսրոպյան ուղղագրությանը կողմ իր թիմակիցները, որոնց թվում
կան նաեւ հայտնի մարդիկ: Խնդրեցինք 1-2 անուն նշել, բայց քաղաքական գործիչը պատասխանեց,
որ ինքը լիազորված չէ եւ չի կարող նրանց անուններն առայժմ բարձրաձայնել: Փոխարենն
ավելացրեց, որ նրանց թվում են նաեւ երեք շատ հայտնի լրագրողներ, որոնց անունները
կրկին գաղտնի պահվեց: Պ. Հայրիկյանը մեր հարցին ի պատասխան տեղեկացրեց, որ իրենք
շարունակելու են պայքարը եւ որքան էլ այն դժվար ու ժամանակատար լինի, հասնելու են
իրենց նպատակին՝ մեսրոպյան ուղղագրության վերականգնմանը: Ո՞րն է լինելու հաջորդ քայլը:
Չգաղտնազերծելով իրենց ռազմավարության մանրամասները, ԱԻՄ նախագահն ասաց, որ իրենք
դիմելու են ՀՀ սահմանադրական դատարան եւ Եվրոդատարան: «Ձեւը կգտնենք եւ առայժմ շտապելու
բան չունենք»,- հավելեց Հայրիկյանը: ԷԼՄԻՐԱ ՄԱՐՏԻՐՈՍՅԱՆ
