ԱՅՍՕՐ ԱՄԵՆ ԲԱՆ ԿՈՐՈՇՎԻ Մոնակոյում ընթացող շախմատի «15the Amber Blindfold and Rapid Chess Tournament» միջազգային գերմրցաշարում այսօր վերջին տուրի օրն է: Հայաստանցի գրոսմայստեր Լեւոն Արոնյանը իններորդ տուրում ընդհանուր հաշվարկով ոչ-ոքի արեց Իսրայելի ներկայացուցիչ Բորիս Գելֆանդի հետ: Նա «կույր» շախմատում չկարողացավ արժանի դիմադրություն ցույց տալ ու տանուլ տվեց, սակայն մի քանի ժամ անց կորցրածը ետ բերեց արագ շախմատում: Մյուս զույգերում գրանցվեցին այսպիսի հաշիվներ. Տոպալով-Սվիդլեր՝ 0:1, 1:0, Նիլսեն-Անանդ՝ 1/2, 0:1, Վան Վելլի-Գրիշչուկ՝ 1:0, 0:1, Լեկո-Մորոզեւիչ՝ 0:1, 1:0, Իվանչուկ-Վալյեխո՝ 1/2, 1/2: Ինը տուրից հետո մրցաշարային աղյուսակում երկիշխանություն է: 1-2. Ալեքսանդր Մորոզեւիչ (Ռուսաստան) 12,0 Վիշվանաթան Անանդ (Հնդկաստան) 12,0 3. Ֆրանսիսկո Վալյեխո (Իսպանիա) 10,5 4-5. Ալեքսանդր Գրիշչուկ (Ռուսաստան) 9,0 Պետեր Լեկո (Հունգարիա) 9,0 6-8. Լյուկ Վան Վելլի (Հոլանդիա) 8,5 Բորիս Գելֆանդ (Իսրայել) 8,5 Վեսելին Տոպալով (Բուլղարիա) 8,59-10. Լեւոն Արոնյան (Հայաստան) 8,0 Պյոտր Սվիդլեր (Ռուսաստան) 8,0 11-12. Պետեր Նիլսեն (Դանիա) 7,0 Վասիլի Իվանչուկ (Ուկրաինա) 7,0 Երեկ կայացավ նախավերջին՝ 10-րդ տուրը: Արոնյանի մրցակիցը հնդիկ Վիշվանաթան Անանդն էր: Նրա հետ, անկասկած, դժվար մրցակցություն էր սպասվում, քանի որ Անանդը արագ շախմատի աշխարհի 2003 թվականի չեմպիոնն է: Եվ պատահական չէ, որ հենց արագ շախմատում հնդիկ գրոսմայստերը ինը տուրից հետո վաստակել էր ամենից շատ՝ 7,0 միավոր: Բայց հարկ է նշել նաեւ, որ Արոնյանն էլ այս մրցաձեւում իրեն վատ չի դրսեւորում Մոնակոյում: Նա 5,0 միավորով երկրորդն էր: 10-րդ տուրում Գրիշչուկը հանդիպելու էր Լեկոյի հետ, Մորոզեւիչը՝ Իվանչուկի, Վալյեխոն՝ Վան Վելլիի, Սվիդլերը՝ Նիլսենի, Գելֆանդը՝ Տոպալովի: ԱՇՈՏ ՀԱԿՈԲՅԱՆ
