Այս
տարի լրանում է Երեւանի Ալ. Սպենդիարյանի անվան երաժշտական մասնագիտական դպրոցի 75-ամյակը:
Դպրոցի տնօրեն Սամվել Սահակյանը հիշեցրեց, որ Հայաստանում սովետական կարգեր
հաստատվելուց 1 տարի անց Ռոմանոս Մելիքյանը ստեղծում է ստուդիա, եւս 1 տարի հետո
վերջինիս հենքի վրա հիմնադրվում է Երեւանի պետկոնսերվատորիան: Կոնսերվատորիայի 60
սովորողներ էլ իրենց հերթին ստեղծում են 4-ամյա կրթությամբ մեկ այլ ստուդիա, որի
հենքի վրա էլ 1930-1931 ուսումնական տարում՝ Ալ. Սպենդիարյանի անվան երաժշտական դպրոցը:
Ս. Սահակյանի խոսքերով, լինելով առաջինը քաղաքում, դպրոցը երաժշտարվեստի մասնագիտական
եւ ճաշակի կազմավորման գործում մեծ դեր է խաղացել: Ի դեպ, այստեղ են նախնական երաժշտական
կրթություն ստացել Առնո Բաբաջանյանը, Ալեքսանդր Հարությունյանը, Էդվարդ Միրզոյանը,
Ղազարոս Սարյանը, Ռոբերտ Ամիրխանյանը եւ այլք: «Հնարավոր չէ պատկերացնել երաժշտական
ասպարեզ՝ առանց Սպենդիարյանի անվան երաժշտական դպրոցի: Օրինակ, Երեւանի պետկոնսերվատորիայի
պրոֆեսորադասախոսական կազմի մի ստվար մասը, երաժշտական դպրոցների, մշակութային օջախների
ղեկավարները մեր դպրոցի սաներն են եղել»,- ասաց պրն Սահակյանը: «Առավոտը» հետաքրքրվեց՝
ավանդույթներ ու կենսագրություն ունեցող դպրոցը ինչպե՞ս է տոնում իր հոբելյանը: Արդեն
6 տարի այս դպրոցը ղեկավարող տնօրենը պատասխանեց. «Մտածում էինք՝ ինչպես անել, որ
ավելի ներկայացուցչական լինի, դրա համար էլ որոշեցինք համերգաշար անցկացնել: Այն
մեկնարկել է մարտի 20-ից՝ «Առնո Բաբաջանյան» համերգասրահում, ու մեր 8 սաներ ելույթ
են ունեցել «Արմեն-Ակոբ» սիմֆոնիկ նվագախմբի հետ: Մարտի 24-ի եւ 31-ի համերգները
միջազգային մրցույթների դափնեկիր մեր սաների ուժերով են: Ապրիլի 2-ին կոնսերվատորիայի
դահլիճում տեղի ուսանողական նվագախմբի հետ ելույթ կունենան մեր 6 աշակերտները: Ամսի
6-ին էլ «Արամ Խաչատրյան» համերգասրահում լինելու է Հայաստանի պետական ֆիլհարմոնիկ
նվագախմբի հետ մեր համբավավոր սաների ելույթը, իսկ ապրիլի 13-ին՝ Օպերային թատրոնում
կկայանա բուն հանդիսությունը: 75-ամյակի բոլոր միջոցառումներում ընդգրկված է մեր
դպրոցի 130 սան»: Տնօրենը տեղեկացրեց, որ դպրոցի կապը կոնսերվատորիայի պրոֆեսորադասախոսական
կազմի հետ՝ սերտ է. «Դպրոցը համալրված է լավագույն մանկավարժներով, այստեղ դասավանդում
են նաեւ կոնսերվատորիայի պրոֆեսորներ՝ Սերգեյ Քեչեկը, Ալեքսանդր Մանուկյանը եւ ուրիշներ»:
Ինչպես մյուս, այնպես էլ Ալ. Սպենդիարյանի անվան երաժշտական դպրոցը խնդիրներ
ունի: Դրանց թվում Ս. Սահակյանը առանձնացրեց երաժշտական դպրոցների դասատուների կարգավիճակին,
ցածր աշխատավարձին, շենքային պայմաններին վերաբերող հարցերը: «Ջեռուցման տատանումներից,
օրինակ, երաժշտական գործիքները շարքից դուրս են գալիս: Ուրիշ խնդիրներ էլ կան, որոնց
տոնական առիթով չեմ ուզում անդրադառնալ»,- նշեց տնօրենը: Նա նաեւ տեղեկացրեց, որ
այս տարի երաժշտական դպրոցների հոգսերից մեկը պակասել է. «Քաղաքապետարանը գումար
է առանձնացրել. ինքն է հոգում սոցիալապես անապահով ընտանիքների երեխաների ուսման
վարձը»: ԳՈՀԱՐ ՀԱԿՈԲՅԱՆ
