ԳԵՐՄԱՆԱՑԻՆ ՀՀ ՕՐՀՆԵՐԳ Է ԳՐՈՒՄ Գերմանացի դիրիժոր, կոմպոզիտոր Պիեր-Դոմինիկ Պոնելը ուրիշ ազգի օրհներգ գրելու մեջ արտառոց ոչինչ չի տեսնում: Մարտի 3-ին Հայաստանի ֆիլհարմոնիկ նվագախումբը ղեկավարելուց հետո, նա վերադարձել էր հայրենիք: Իսկ ընդամենը մեկ շաբաթ անց՝ դարձյալ ժամանել Երեւան: Հետաքրքրվեցինք՝ այս անգամ որն է արվեստագետի այցի նպատակը: «Մարտի սկզբին, երբ Երեւանում էի, լսեցի, որ Հայաստանը պատրաստվում է իր օրհներգը փոխել»,- տեղեկացրեց երաժիշտը, որը մտադիր է մասնակցել այս գործընթացին: Ունենալով մտերիմներ Երեւանում (սկսած 1987-ից՝ սա երաժշտի 8-րդ այցն է Հայաստան), մինչ օրս նա չի կարողացել իր համար ճշտել նոր օրհներգի հետ կապված մանրամասներ: Հարցին՝ որքանո՞վ է ճիշտ, որ օտարերկրացին դառնա այլ պետության օրհներգի հեղինակը, եւ արդյո՞ք ինքը այդքան լավ գիտի հայկական մշակույթը, մեր զրուցակիցը հայտնեց, որ դեռ 40 տարի առաջ, երբ ինքը ընդամենը 8 տարեկան էր, հայրը՝ օպերային դիրիժոր Ժան-Պիեր Պոնելը որդուն պատմել է «մի երկրի մասին, որի անունն է Հայաստան եւ խորհուրդ տվել անպայման տեսնել հին մշակույթ ունեցող այդ երկիրը»: Արվեստագետը հայտնեց նաեւ, որ ինքը շատ վաղուց ուսումնասիրում է հայոց պատմությունը, հայկական երաժշտություն՝ Կոմիտասից մինչեւ Խաչատրյան ու Տերտերյան, նաեւ հայ ժամանակակից կոմպոզիտորական արվեստ: «Վերջին այցիս ժամանակ աշխարհահռչակ Մինասի որդու ուղեկցությամբ եղա նկարչի ծննդավայրում՝ Ջաջուռում: Ուզում եմ ասել, թող մեծամտություն չթվա, ես անգիր գիտեմ ե՛ւ հայ պատմություն, ե՛ւ հայ մշակույթ»,- նշեց արվեստագետը: Նա տեղեկացրեց նաեւ, որ իր մայրն էլ՝ դերասանուհի Մարգիտ Սաադին ժամանակին տարված էր «հայկական ամեն ինչով»: «Սերս հայ անվանի արվեստագետների ու հայ մշակույթի նկատմամբ եղել է շատ վաղուց եւ ոչինչ արտառոց չկա, որ օտարերկրացին դառնա Հայաստանի նոր օրհներգի հեղինակը»,- ասաց գերմանացի արվեստագետը: Հարցին՝ արդեն կա՞ օրհներգի երաժշտությունը եւ ո՞վ է տեքստի հեղինակը, Պ. Պոնելը պատասխանեց. «Երաժշտությունը ամբողջությամբ գլխումս է: Օրերս, երբ վերադառնամ Գերմանիա, այն կնոտագրեմ, հետո արդեն՝ հաջորդ այցիս, հայաստանցի մտերիմներիս խորհրդով, կներկայացնեմ որեւէ բանաստեղծի»: Հետաքրքրվեցինք երաժշտի ծնողների ծագումով, հասկանալու՝ թե ի՞նչն է հայերի ու հայ մշակույթի հանդեպ նման վերաբերմունքի պատճառը: «Հայրս կիսով չափ ֆրանսիացի, կիսով՝ հունգարացի է, մայրս՝ արաբի ու գերմանացու խառնուրդ: Ես էլ չգիտեմ, թե որ ազգն է իմ մեջ շատ խոսում: Բայց մի բան հաստատ գիտեմ՝ բոլոր ժողովուրդներն էլ Երկիր մոլորակի քաղաքացիներ են եւ, անկախ ազգային պատկանելությունից, կարող են տարվել բոլորովին այլ ժողովրդի մշակույթով: Մի բան եւս հաստատ գիտեմ. ծնողներս ու ես ընդունել, սիրել ու մինչ օրս ուսումնասիրում ենք հայ մշակույթը»,- հայտնեց Պիեր-Դոմինիկ Պոնելը: ՀՀ նոր օրհներգի հետ կապված պարզաբանումներ ստանալու նպատակով դիմեցինք մշակույթի նախարարության հասարակայնության հետ կապերի գծով պատասխանատու Գայանե Դուրգարյանին: «Կառավարության 2006թ. գործունեության միջոցառումների ծրագիրը եւ գերակա խնդիրները հաստատելու մասին որոշման մեջ մշակույթի նախարարությանը հանձնարարական է տրվել՝ պատրաստել օրենքի նախագիծ ՀՀ պետական զինանշանի, դրոշի եւ օրհներգի մասին: Առաջին երկու խորհրդանիշերի մասով օրենքի նախագիծը պատրաստ է եւ դրված է շրջանառության մեջ: Ինչ վերաբերում է օրհներգին, գործընթացն այսպիսին է. մշակույթի նախարարությունը բոլոր շահագրգիռ կազմակերպություններին (պետական, կառավարական, հասարակական) պատրաստվում է ներկայացնել գործող օրհներգը, որպեսզի վերջիններս խնդրի վերաբերյալ հաստատեն իրենց տեսակետը: Մշակույթի նախարարությունը հանրագումարի բերելով դրանք, կպատրաստի օրենքի նախագիծ եւ կներկայացնի կառավարությանը»,- հայտնեց տիկին Դուրգարյանը: Ս. ԴԱՆԻԵԼՅԱՆ
