Ճանաչված
քանդակագործ Տիգրան Արզումանյանի հայտնի խմբաքանդակի ճակատագիրը վտանգված է
«Դվին» հյուրանոցի սեփականաշնորհումից հետո, որի բակում տեղադրված է քանդակը,
այժմ բարեկարգման աշխատանքներ են ընթանում: Ու հավանաբար շինարարական «վերաձեւումների»
արդյունքում եզակի այս գործը «պլանի տակ» կհայտնվի: «Լեռնային պարի» անորոշ ճակատագրով
մտահոգ հեղինակը խնդրի մասին քանիցս խոսել է հեռուստատեսությամբ, բայց առայժմ ոչ
մի արձագանք: Ներկայումս քանդակը շարունակում է «շիֆերների» շրջափակման մեջ մնալ:
Ի դեպ, խորհրդային տարիներին «Լեռնային պարը» առանձնապես չէր գովազդվում հասկանալի
պատճառով՝ մեջը ազգային ոգի կա ու խրոխտություն: Կապվեցինք Տիգրան Արզումանյանի
հետ: Հեղինակն ասաց, որ պատրաստվում է դիմել քաղաքապետին, որովհետեւ քաղաքապետարանը,
ավելի ճիշտ՝ հենց քաղխորհուրդն է ժամանակին (1984թ.) եղել քանդակի պատվիրատուն: «Ուզում
եմ իմանալ՝ քաղաքապետը ի՞նչ իրավունքներ ունի քանդակի վերաբերյալ, տեղափոխվելո՞ւ
է այն, թե՞ ոչ: Բանն այն է, որ քանդակը կոփածո պղինձ է, մեջն էլ բետոն, իսկ դա նշանակում
է, որ տեղափոխելիս այն հաստատ կվնասվի: Ամեն դեպքում, կարծում եմ, որ քաղաքի ղեկավարությունը
պետք է տեր կանգնի այս գործին»,- ասաց քանդակագործը: Նկատենք, որ գոյության
20 տարիների ընթացքում վերոնշյալ քանդակը տեղ է գտել արտերկրի լավագույն կատալոգներում,
իսկ նրա մանրակերտը Մոսկվայում մրցանակի է արժանացել: Այնպես որ, սա հեղինակի այցեքարտն
է: «Չեմ կարծում, թե որեւէ մեկի ձեռքը գնա այն փչացնել: Եվ չեմ ուզում, որ այս քանդակը
վատ վախճան ունենա երեւանյան որոշ հուշարձանների նման: Մանավանդ հիմա տարածքների
ու շինությունների սեփականատերերից շատերը, ովքեր հիմնականում հայաստանցի չեն, մեծ
իրավունքներ ունեն»,- նշեց քանդակագործը: Տ. Սարգսյանի բախտը քանդակների հարցում
կարծես չի բերում, 4 օր առաջ էլ Նուբարաշեն համայնքից գողացել են նրա՝ Ղեւոնդ Ալիշանի
բրոնզե կիսանդրին, որը հեղինակի նվերն էր համայնքին: ԳՈՀԱՐ
ՀԱԿՈԲՅԱՆ
