ՀԱՅ ԱՍՏՂԵՐԻ ՊԱՐՈՒՍՈՒՅՑԸ Միջազգային կարգի մրցավար, «Երեւան» պարային ակումբի նախագահ, «Նոր շունչ» պարային փառատոնի տնօրեն Արթուր Զաքարյանի սաների մեջ շատ են հայկական շոու-բիզնեսի ներկայացուցիչները՝ Արսեն Սաֆարյան, Քրիստինե Պեպելյան, Անի Քրիստի, Նառա, Իկա եւ ուրիշներ: «Թող մյուս երգիչներն էլ գտնեն իրենց անձնական խորեոգրաֆներին եւ հետեւեն սեփական արտաքինին ու շարժուձեւին: Հակառակ դեպքում, եթե երգիչը 2-3 անգամ միայն միկրոֆոնը ձեռքին կանգնած երգի, նրան այլեւս չեն լսի»,- կարծում է Ա. Զաքարյանը: «Երեւան» պարային ակումբ են հաճախում տարբեր տարիքի, մասնագիտությունների ու հետաքրքրությունների տեր մարդիկ, այդ թվում՝ մեր խմբագրության երեք աշխատակից: «Մեր կարգախոսն է՝ «Պարենք՝ պարելու համար»: Ակումբի դռները բաց են բոլորի առջեւ՝ քաղաքական գործիչ կլինի, թե հավաքարար, մեզ համար նշանակություն չունի»,- ասում է «Երեւանի» նախագահը: Արթուրը չժխտեց, որ պարել է սովորեցրել նաեւ հանրապետությունում հայտնի գործարարներից մեկին, որի անունը չկամեցավ հրապարակել: Վերջինս գնում է Եվրոպա՝ սիմպոզիումի: Փոքրիկ ֆուրշետից հետո բոլորը սկսում են վալս պարել: Իսկ մեր հայրենակիցը, որ պարել չգիտեր, հրաժարվում է՝ պատճառաբանելով գլխացավը: Ու քանի որ անհարմար կլիներ հենց այնպես ժամերով նստած մնալ, ստիպված օտարերկրացի կոլեգաներին հյուրասիրում է խմիչքներ ու ուտեստներ՝ ծախսելով $23000: Երեւան գալուն պես գործարարը անմիջապես գնում է վալսի դասեր առնելու: «Երեւան» պարային ակումբի նախագահը պարասեր հանրությանը հայտնի է արդեն ավանդական դարձած իր «Նոր շունչ» համահայկական մրցույթ-փառատոնով, որն այս տարի կմեկնարկի մարտի 20-ից: Փառատոնում ներկայացված են 11 պարային ոճեր ու պարաձեւեր՝ սկսած ժողովրդական պարերից, մինչեւ լատինամերիկյանն ու եվրոպականը: Մրցույթը կրում է սիրողական բնույթ, կարող են մասնակցել բոլոր ցանկացողները՝ անհատներ, խմբեր, զույգեր՝ անկախ տարիքից: «Նոր շունչի» գալահամերգի հասույթից ամեն տարի բաժին են հանում կարիքավորներին, օրինակ՝ անցած տարի Նորքի առաջին ծերանոցին: «Այս տարի կփորձենք որեւէ խմբի դուրս տանել, գովազդել, կլոր սեղաններ, անվճար սեմինարներ ու քննարկումներ կազմակերպել»,- ասում է Արթուրը: Ի դեպ, «Նոր շունչը» չունի հովանավոր: «Եթե հովանավորը տալիս է, ուրեմն թելադրում է: Իսկ մենք ուզում ենք այնպիսի մրցույթ ունենալ, ուր զանգով հարցեր լուծելու հայկական տարբերակը «չաշխատի»… Հովանավորներ չունենք, բայց շատ ընկերներ ունենք, ովքեր այդ օրերին լիքը նվերներ են բերում հաղթողների համար»,- ասում է Ա. Զաքարյանը, հավաստիացնելով, որ ամեն անգամ մրցույթը կազմակերպելիս իր անձնական գումարներն է ներդնում, որոնք հետո փոխհատուցվում են՝ վաճառված տոմսերի, գալահամերգից ստացված հասույթի հաշվին: Մրցույթի պատվավոր հյուրերն են լինում Վրաստանի ու Ռուսաստանի լավագույն մասնագետները: Մասնավորապես, անցած տարի Երեւան էր եկել աշխարհի չեմպիոն Անդրեյ Տոմսկին: «Մինչ Տոմսկու ժամանելը՝ շատերն ասում էին, որ կուզենան վարպետության դասեր ստանալ նրանից, սակայն երբ մասնագետը եկավ, ոչ ոք չդիմեց մեզ: Պարզվում է՝ Հայաստանում բոլորն ամեն ինչ գիտեն»,- ափսոսանքով նշեց մրցույթ-փառատոնի տնօրենը: «Ռուսաստանում 5 տարի աշխատել եմ շոու-բիզնեսի ոլորտում: Համեմատում եմ Հայաստանի հետ, ահավոր տարբերություններ կան: Էստեղ ի՞նչ շուո-բիզնեսի մասին է խոսքը, միայն բիզնես է, շոու չկա: Իսկ պարարվեստի ոլորտի հանդեպ ավելի զգույշ պիտի լինել: Այսօր պարային ոչ մի փառատոնի ղեկավար մասնագետ չէ: Գոնե մի մասնագետ կոնսուլտանտ ունենան»,- փաստեց Ա. Զաքարյանը: ԳՈՀԱՐ ՀԱԿՈԲՅԱՆ
