ԵՍ ԽՆԴԻՐՆԵՐ ՉՈՒՆԵՄ ԱՐԲԱԿ ԽԱՉԱՏՐՅԱՆԻ ՀԵՏ Վստահեցնում է «Ազգային միաբանություն» կուսակցության նախագահ Արտաշես Գեղամյանը Օրերս ազատ է արձակվել Ռուսաստանի մարդու իրավունքների պաշտպանի նախկին խորհրդական Արբակ Խաչատրյանը, որին 2003-ին կալանավորելը ժամանակին պայմանավորեցին այն հանգամանքով, թե իբր նրա հանձնարարությամբ 150 հազար դոլար պիտի փոխանցվեր Երեւան՝ որպես աջակցություն «Ազգային միաբանության» ղեկավարի նախընտրական քարոզարշավին: Սակայն Արտաշես Գեղամյանը մեր զրույցի ընթացքում նշեց. «100 տոկոսանոց բլեֆ է գումարների վերաբերյալ այդ պատմությունը: Արբակ Խաչատրյանը ո՛չ մի առնչություն չի ունեցել այն առասպելի հետ, որն այն ժամանակ հրապարակ իջեցրեց իշխանական քարոզչամեքենան: Այնտեղ գործել է բացարձակապես այլ սցենար, որը կրկին պատվիրվել է Երեւանում: Խնդիր էր առաջադրված, որ մոսկվաբնակ հայ ձեռներեցներին, հեղինակավոր մարդկանց ամեն կերպ հեռու պահեին Հայաստանի նախագահական ընտրություններից: Ի՞նչ եք կարծում, եթե իրոք նման բան լիներ՝ մի՞թե մեր իշխանությունը բաց կթողներ այդ հիանալի՜ հնարավորությունը քրեական ու դատական հետապնդումներ իրականացնելու համար… Իհարկե՛ բաց չէր թողնի: Արդեն իսկ հեղեղել էին մամուլը: Բայց նրանց գործը միայն շառ անելն է, որն, ինչպես ասում է ժողովուրդը, կպչում է միայն իրենց»: Մեր հարցին, թե այնուամենայնիվ՝ ի՞նչ մեղադրանք էր առաջադրվել Արբակ Խաչատրյանին՝ պրն Գեղամյանը պատասխանեց. «Նրա արդարացման հարցն օրախնդիր եւ օրակարգային հարց է: Նրան առաջադրված մեղադրանքը, այն է՝ չեխական գազ տեղափոխող ընկերության հետ տնտեսական գործարքներում իբր հակաօրինական գործողություններ թույլ տալը, համոզված եմ, որ կվերանայվի առաջիկայում եւ այդ դատվածությունն անպայմանորեն կհանվի»: Մինչ Արբակ Խաչատրյանի ազատ արձակումը՝ քաղաքագետներից մեկը պնդում էր, թե նա շատ բացահայտումներ է անելու: Եղան նաեւ այլ մեկնաբանություններ, թե «Ազգային միաբանությունը» մոռացության է մատնել այն մարդուն, որը ճաղերի ետեւում էր հայտնվել իր պատճառով: Հարցին, թե մտավախություն չունի՞, որ Արբակ Խաչատրյանը կարող է իրոք ինչ-ինչ փաստեր հրապարակել՝ Արտաշես Գեղամյանն այսպես արձագանքեց. «Ցանկանում եմ ուրախացնել թե՛ քաղաքագետներին, թե՛ նրանց ետեւում կանգնած անձանց՝ անցած 3 տարիների ընթացքում ամենասերտ կապերն եմ պահպանել թե՛ Արբակ Խաչատրյանի, թե՛ իր ընտանիքի՝ մասնավորապես, տիկնոջ՝ տիկին Լենայի հետ»: Միջանկյալ նշենք, որ շուրջ 2 տարի է, ինչ «Ազգային միաբանության» խմբակցության գլխավոր մասնագետը խորհրդարանում Արբակ Խաչատրյանի քրոջ դուստրն է՝ Քրիստինե Սարգսյանը, որն այս աշխատանքին է անցել Գեղամյանի առաջարկով: «Ինչ խոսք, Արբակի ազատ արձակումն ինձ շատ ու շատ է ուրախացրել եւ ոգեւորել, քանի որ ով-ով, բայց Արբակը շատ լավ գիտի, թե գործող իշխանությունների ո՛ր խարդավանքների հետեւանքով եղավ այն, որ փորձեցին անպայմանորեն մեկուսացնել այդ հայրենասեր հային ու հետ պահել քաղաքական այն գործընթացներից, որոնք ծավալվում էին Հայաստանում,- ասաց «Ազգային միաբանության» ղեկավարը:- Եվ իշխանությունները ճիշտ են անում, որ այդքան զգուշանում են: Եթե Աստված մի արասցե՝ Արբակն ասի մանրամասները, ձեր համեստ ծառան, բնականաբար, կհայտնվի շատ պարկեշտ ու հերոսական դիրքերում, իսկ այս իշխանությունները իրենց հատուկ՝ բանսարկու եւ դավադիրների տեղում: Այլ հարց է, որ ես այստեղ տեսնում եմ շատ վտանգավոր միտում: Այն է՝ իրենք գիտակցում են, որ Արբակ Խաչատրյանը շատ հետեւողական ու սկզբունքային անձնավորություն է, եւ իրոք չի ներելու այդ բանսարկուներին: Ու տեսեք, թե ի՜նչ ճիզվիտական սցենար են իրականացնում. փորձում են հրապարակ իջեցնել այն թեզը, թե իբր՝ ե՛ս խնդիրներ ունեմ Արբակ Խաչատրյանի հետ, ինչն ի սկզբանե հերյուրանք է: Դրանից հետո նրանք կփորձեն ֆիզիկական հաշվեհարդար տեսնել իմ հանդեպ, որ այդ ամենը բարդեն Արբակ Խաչատրյանի վրա եւ կարողանան արդեն երկրորդ անգամ չեզոքացնել նրան: Ահա սա է սատանայական սցենարը, որը փորձում են իրականացնել մեր իշխանությունները: Ինչը չի՛ հաջողվելու, քանի որ այս ամենը, ինչի մասին ասում եմ այժմ հրապարակավ՝ վաղո՜ւց արդեն հայտնի է թե՛ Արբակ Խաչատրյանին եւ թե՛ մեր այն լավ ընկերներին, որոնք բավականին հետաքրքիր պաշտոններ են զբաղեցնում համապատասխան կազմակերպություններում: Այնպես որ՝ պետք է հերթական անգամ պրն Ռոբերտ Քոչարյանին հորդորեմ, որ իր շրջապատին զերծ պահի բանսարկություններից: Միեւնույն է՝ չի՛ ստացվելու»: ԱՆՆԱ ԻՍՐԱՅԵԼՅԱՆ
