Երեք
տարվա ընդմիջումից հետո «Նարեկացի» արվեստի միությունում այսօր կկայանա Գայանե Խաչատրյանի
մենահամերգն ու նկարչական աշխատանքների ցուցադրությունը: Արվեստագետի ոչ հազվադեպ
«երեւալուն» գործընկերներն ունեն, իրենց կարծիքով, ճիշտ պատասխան. Գայանեն չի ընդունում,
երբ իր ցուցադրված աշխատանքները նորից են ներկայացվում: Բնականաբար, այս անգամ էլ
նա կներկայանա նոր նկարներով: Իսկ երգարվեստում անգամ ճանաչված երգերը նա հնչեցնում
է յուրովի: Հետեւելով արվեստագետի գործունեությանը, մենք էլ տեղեկացնենք, որ նրա
ստեղծագործական կյանքում սա տասներորդ մենահամերգ-ցուցահանդեսն է: 2004-ին 49 հայ
նկարիչների ավելի քան 300 աշխատանքների կողքին ֆրանսիացի արվեստագետները Բրիսոնյե
եւ Կլամար քաղաքներում առաջին անգամ ծանոթացել են հայ նկարչուհու արվեստին (դա նրա
աշխատանքների առաջին արտերկրյա ցուցադրությունն էր): Գ. Խաչատրյանի մասին
ճանաչված նկարիչ Կարեն Սմբատյանը «Առավոտին» փոխանցեց հետեւյալը. «Գայանեն յուրահատուկ
է որպես ստեղծագործող, ընդ որում՝ կին ստեղծագործող: Մի բան, որ նրա աշխարհընկալմանը
հաղորդում է այնպիսի նրբագեղություն ու այնքան քնքշություն: Այս դեպքում նկարչուհու
նմանատիպ յուրահատկությունը զարդարում է նրան ու նրա գեղանկարչությունը»: Ըստ Գ.
Սմբատյանի՝ նկարչուհին իր ընկալումներում ունի լայն դիապազոն ու նրա համար սահմանները
պայմանական են: «Օրինակ, գուսան Շահենի՝ Պարույր Սեւակի հիշատակին նվիրված «Անցա-գնացի»
երգի մոտիվով ստեղծած կտավի շունչը նկարչուհին կարող է զուգակցել արեւմտաեվրոպական,
դասական որեւէ երգի կատարման հետ, ստեղծելով միայն իրեն բնորոշ գունագեղային անսամբլ»,-
նշեց մեր զրուցակիցը: Գ. Խաչատրյան երգչուհու մասին կարծիք խնդրեցինք ճանաչված
երաժիշտ, ջութակահար Կարլեն Կարապետյանից: «Նկարում է ինչպես երգ, երգում է ինչպես
մի գեղեցիկ բնապատկեր: Երկու դեպքում էլ հուզում է իր հանդիսատեսին, ինչպես ընդունված
է ասել՝ խաղում նրանց սրտի նուրբ լարերի հետ: Անձամբ ես, շփվելով Գայանեի արվեստի
հետ, ամեն անգամ հարստացած եմ հեռանում դահլիճից»,- ասաց երաժիշտը: Գ. Խաչատրյանից
հետաքրքրվեցինք՝ վերջին շրջանում ստեղծված «Դրախտի պտուղը» նկարների շարքում ինչո՞ւ
է Ադամի ու Եվայի հայտնի խնձորը փոխարինվել ծիրանով, ինչը արվեստագետների շրջանում
կարծիքների բախումներ է առաջացրել: Նկարչուհու համոզմամբ՝ Ադամն ու Եվան ոչ թե խնձոր
են համտեսել, այլ ծիրան. «Ծիրանը հայերիս համար խորհրդանիշ է: Եթե Հայաստանը դրախտավայր
է, ուրեմն կասկած չկա, որ դրախտի պտուղը ծիրանն է»: Ս. ԴԱՆԻԵԼՅԱՆ
