ՊԱՏԻԺ՝ ԴԻՐՔՈՐՈՇՄԱՆ ՀԱՄԱՐ Երեկ առավոտյան ՕԵԿ խմբակցության պատգամավոր Գագիկ Ավետյանի տուն են ներխուժել ոստիկանության 6-րդ վարչության աշխատակիցները եւ խուզարկել բնակարանը՝ փնտրելով պատգամավորի նախկին բիզնեսի հետքերը: Գագիկ Ավետյանը նախկինում զբաղվել է ավտոպահեստամասերի ներկրմամբ: Երեկ ԱԺ ամբիոնից հայտարարելով կատարվածի մասին՝ պրն Ավետյանը տեղեկացրեց, թե ոստիկաններն այցի մասին կազմել են արձանագրություն. «Մինչ պատգամավոր դառնալը զբաղվել եմ անհատ ձեռներեցությամբ, փոքր բիզնեսով, որը դադարեցրել եմ 2003-ին՝ պատգամավոր ընտրվելուց հետո: Իսկ հիմա 6-րդ վարչությունը հետաքրքրվում է իմ նախկին առեւտրային գործունեությամբ»: Ըստ նրա, նրանք որեւէ փաստաթուղթ չեն ներկայացրել՝ ասելով, թե առաջադրանքը ստացել են «վերեւից»: Հավելյալ հայտնեց, թե ստուգումներ են անցկացվել նաեւ իր հարեւանների եւ ազգականների օբյեկտներում: Գագիկ Ավետյանի պնդմամբ, գաղտնալսվում է իր հեռախոսը, որը «Սահմանադրության հերթական կոպիտ ոտնահարում է»: Պատգամավորի համոզմամբ, այս ամենը պատասխան է իր վերջին հայտարարություններին ու մասնավորապես՝ պետական կարիքների համար անշարժ գույքի օտարման վերաբերյալ ՀՀ կառավարության որոշումների սահմանադրականությունը վիճարկող դիմումի տակ դրված իր ստորագրությունը ետ չվերցնելուն: Գագիկ Ավետյանը հայտարարությամբ պահանջեց կանխել իրավապահների կամայականությունները, այլապես ստիպված կլինի ասուլիսներով եւ հայտարարություններով նշել կոնկրետ անուններ ու փաստեր, որոնցով պետք է զբաղվի 6-րդ վարչությունը կամ «վերեւները»: Դիմեց գլխավոր դատախազին՝ ակնկալելով պարզաբանում, թե ինչ իրավունքով է 6-րդ վարչությունը զբաղվում «օրենքով իրեն չվերապահված գործառույթներով»: Ա. Ի.Հ. Գ. ՕԵԿ փոխնախագահ Մհեր Շահգելդյանն «Առավոտին» ասաց, թե ՕԵԿ-ը դեպքի մանրամասները ճշտելուց հետո դիրքորոշում կարտահայտի, իսկ մինչ այդ միայն նշեց. «Անընդունելի ենք համարում նման երեւույթը»:
