ՉԽԱԽՏԵՍ՝ ԿՆԿԱՐԵ՛Մ «Ազգային միաբանությունը» ԿԸՀ-ում այժմ չունի ներկայացուցիչ: Ռոբերտ Քոչարյանը դեկտեմբերի 5-ից, երբ կուսակցությունը սահմանադրական փոփոխություններից հետո վերստին ներկայացրեց Զավեն Պլուզյանի թեկնածությունը՝ մինչ օրս այդպես էլ չի ստորագրել նրան նշանակելու հրամանագիրը: Այս մասին «Առավոտին» ասաց «Ազգային միաբանության» փոխնախագահ Ալեքսան Կարապետյանը. «Դրա համար էլ «Ընտրական օրենսգրքի» փոփոխություն ենք առաջարկելու, թե նախագահը պարտավոր է 3 օրում հրամանագրել խմբակցության ներկայացուցչին: Փակագծում էլ նշելու ենք՝ Զավեն Պլուզյանին, եւ դնելու շրջանառության մեջ: Թե չէ՝ կարող է այժմ էլ պատճառ բռնի, որ 3 օրում կստորագրի, բայց գրված չէ, թե պետք է նշանակել Պլուզյանին»: Փորձե՞լ են պարզել նախագահի աշխատակազմից, թե ինչո՞ւ պրն Քոչարյանը չի նշանակում «Ազգային միաբանության» ներկայացուցչին. «Երկու նամակ ենք գրել: Եվ ոչ մի արձագանք չկա: Մեզ բանավոր հասկացրել են, թե ասել է՝ երբ ուզենամ, կստորագրեմ, գրված չէ, թե պիտի միանգամից ստորագրեմ»: Գուցե պատճառն այն է, որ պրն Քոչարյանը զայրացե՞լ է, որ Զավեն Պլուզյանը նախ վայր դրեց ԿԸՀ անդամի իր լիազորությունները, իսկ հետո նորից իրեն առաջարկեցին: «Զայրացել է, թող ջուր խմի,- մեր ենթադրությանն ի պատասխան ասաց Ալեքսան Կարապետյանը:- Զայրույթը կապ չունի օրենքի հետ: Այն ուղղակի պետք է կատարել: Օրենքների կատարման երաշխավորը ՀՀ նախագահն է, եւ եթե նա խախտում է դրանք՝ բարոյական եւ ոչ մի իրավունք չունի մնացածներից պահանջել դա»: Ալեքսան Կարապետյանը ԱՄ անունից առաջարկել է «Ընտրական օրենսգրքի» եւս մի փոփոխություն՝ նկարահանել ընտրական ողջ գործընթացը եւ տեսագրությունը կցել արձանագրությանը՝ իբրեւ հիմք վիճահարույց խնդիրների լուծման համար: Մեր նկատառմանը, թե քվեարկությունը գաղտնի է՝ առարկեց, թե նկարահանվելու է ոչ թե քվեարկության խցիկը, այլ սենյակը, որ պարզ դառնա, թե քանի մարդ է եկել-գնացել, արդյոք եղե՞լ են վեճեր եւ այլն: Սրա համար պահանջվում է 2000 տեսախցիկ: Որպես առաջարկի իրագործման ֆինանսական հիմք՝ հիշեցրեց, թե ԱՄՆ-ը նաեւ մեր ընտրական համակարգերը բարելավելու համար խոստացել է 7 միլիոն դոլար: Ա. Ի.
