Կոտայքի մարզի 1-ին ատյանի դատարանը փետրվարի 23-ին
դատավոր Արիս Սիսակյանի նախագահությամբ սկսեց Նոր Հաճընի նախկին քաղաքապետ Արմեն
Քեշիշյանի (Ուզբո) նկատմամբ հարուցված քրգործի դատաքննությունը: Արզնիի էլեկտրացանցի
տնօրեն Աշոտ Մխիթարյանի սպանության հետեւանքով Արմեն Քեշիշյանին առաջադրվել է մեղադրանք
«Քրեական օրենսգրքի» 104-րդ հոդվածի 2-րդ մասի 6-րդ կետով (սպանությունը՝ շատերի
կյանքի համար վտանգավոր եղանակով): «Առաջադրված մեղադրանքում ինձ մեղավոր չեմ ճանաչում»,-
հայտարարեց նախկին քաղաքապետը: Նաեւ հավելեց. «Կատարվածի համար ցավում եմ: Ճիշտ է՝
տուժողի իրավահաջորդները ճիշտ կանեն, որ ինձ հայհոյեն, անիծեն, բայց ինձ ճանաչողները
գիտեին, որ Արմեն Քեշիշյանը կյանքում ճանճ չէր սպանել»: Դատական առաջին նիստը անցավ
լարված մթնոլորտում: Մթնոլորտը շիկացավ հատկապես այն պահին, երբ Արմեն Քեշիշյանի
դատապաշտպան Հովհաննես Գալյանը ներկայացրեց միջնորդություն Արմեն Քեշիշյանի նկատմամբ
առաջադրված մեղադրանքը փոխելու վերաբերյալ: Հովհաննես Գալյանը հայտարարեց, որ «նախաքննությունը
ընթացել է ոչ օբյեկտիվ, բացարձակ մեղադրական թեքումով»: Ըստ նրա, Արմեն Քեշիշյանի
արարքը սխալ է որակվել՝ «նրա գործողությունները չեն կրել շատերի կյանքի համար վտանգավոր
բնույթ»: Դատապաշտպանը միջնորդել է Արմեն Քեշիշյանի նկատմամբ նշանակել համալիր, դատահոգեբուժական,
հոգեբանական ամբուլատոր փորձաքննություն՝ պարզելու, թե արարքը կատարելու պահին Արմեն
Քեշիշյանը տառապե՞լ է որեւէ հոգեկան հիվանդությամբ, թե՞ ոչ: Միջնորդության հաջորդ
նպատակը, ըստ դատապաշտպանի, հետեւյալն է. «Եթե Արմեն Քեշիշյանը տառապել է որեւէ հիվանդությամբ,
ապա արարքը կատարելու պահին դա նրան զրկե՞լ է իր գործողությունների համար հաշիվ տալուց»,
նաեւ՝ «արարքը կատարելու պահին Արմեն Քեշիշյանը գտնվե՞լ է հոգեկան խիստ հուզմունքի
վիճակում»: Դատարանը որոշեց «դատավարության ներկա փուլում միջնորդությունը թողնել
առանց քննության»: Այս գործով վկաները 18-ն են: Դատավորը հայտարարեց, որ վկաների
ներկայությունը դատարանում ապահովելու համար անհրաժեշտ է հետաձգել դատական նիստը:
Հաջորդ նիստը նշանակվեց մարտի 10-ին: Այս դատավարության մասին
Անուշ Մարտիրոսյանի առավել մանրամասն հրապարակումը կարդացեք «Տարեգիրի» փետրվարի
28-ի համարում Հ. Գ. Դատական նիստից հետո դատարանի բակում ընդհարում
եղավ ամբաստանյալի եւ տուժողի հարազատների միջեւ: Չնայած ներկա էին իրավապահ մարմինների
ներկայացուցիչները:
