Ե՛վ
«Արդարություն» դաշինքում մնալու, ե՛ւ ընտրություններով իշխանափոխության հասնելու
մասին ասում է ԱԺԿ վարչության անդամ Վարդան Պողոսյանը: – Ինչպե՞ս եք գնահատում
այն հանգամանքը, որ սահմանադրական փոփոխություններն այդքան քննադատած ընդդիմադիրներն
այժմ օգտվում են դրա բարեփոխված դրույթներից, ինչն արտահայտվեց ե՛ւ Մարդու իրավունքների
պաշտպանի ընտրության, ե՛ւ Սահմանադրական դատարան ավելի հեշտությամբ դիմելու ժամանակ:
– Շատ անբնական կլիներ կրկնել առաջին սխալը՝ սահմանադրական բարեփոխումներին
չմասնակցելը, եւ այժմ էլ հայտարարելը, թե այդ Սահմանադրության ընձեռած հնարավորություններից
ընդհանրապես չենք էլ ցանկանում օգտվել: Ընդդիմությունն, իմ կարծիքով, ողջախոհ գտնվեց,
որ այդ առաջին սխալից հետո ընկալեց, թե փոփոխված Սահմանադրությունը նաեւ խորհրդարանական
փոքրամասնությանն է ընձեռում որոշակի կարեւոր հնարավորություններ, եւ այժմ փորձում
է օգտվել դրանցից: – Հայտնի է, որ իբրեւ GTZ ընկերության իրավական ծրագրի
համակարգող՝ Դուք եք նախապատրաստում «Սահմանադրական դատարանի մասին» օրենքում փոփոխությունները,
որոնք հնարավորություն կընձեռեն ավելի լայն շրջանակի դիմել ՍԴ: – Այո: Դրանք
բխում են սահմանադրական փոփոխություններից: Խոսքը մասնավորապես ֆիզիկական եւ իրավաբանական
անձանց ՍԴ դիմելու իրավունքի մասին է: Բացի դրանից՝ փոփոխություններ են կատարվում
այն դրույթներում, որոնք ոչ ճիշտ կերպով էին ամրագրված «ՍԴ մասին» օրենքում: Հիշեցնեմ
մեր դիրքորոշումը, որ հեղափոխության համար չկան ակնհայտ նախադրյալներ: Եվ կարծում
ենք, թե ընտրական ինստիտուտների դերն ու նշանակությունը դեռեւս ամբողջությամբ սպառված
չեն մեր երկրում: Եթե հեղափոխական հնարավորություն չկա, ապա այլ ճանապարհ չի մնում,
քան ընտրությունների միջոցով քաղաքական իշխանության հասնելու համար պայքարելը: Ելնելով
այդ գիտակցումից՝ իմ ղեկավարած «Ժողովրդավարություն» հ/կ-ն նախաձեռնելու է «Ընտրական
օրենսգրքի» փոփոխություններ: Մշակելու ենք այնպիսի առաջարկներ, որոնք բխում են Հայաստանի
առանձնահատկություններից ու վերջին 10 տարիների քաղաքական փորձից: Համոզված ենք,
որ գործող «Ընտրական օրենսգիրքը», առնվազն ընտրական հանձնաժողովների կազմի շուրջ
իր լուծումներով, բացառո՛ւմ է ժողովրդավարական ընտրությունների հնարավորությունը:
– ԱԺԿ վարչությունը 2005-ի դեկտեմբերի 20-ի իր հայտարարությամբ առկախեց մասնակցությունը
«Արդարության» աշխատանքներին, քանի դեռ այն չի վերագնահատել արածն ու չարածը եւ ընդունել
սեփական սխալները: Սակայն դաշինքը չանցկացրեց նման քննարկում: Որքա՞ն է ԱԺԿ-ն մտադիր
սպասել իր հայտարարության արձագանքին՝ վերջնական որոշում կայացնելու համար: –
Շատ բարդ է ասելը: Ժամկետներ չենք սահմանել, թե ասենք փետրվարի x օրվանից հետո պետք
է արդեն կատարենք ինչ-որ գործողություններ: Հասկանում եմ, որ «Արդարության» համար
բավական բարդ է նախաձեռնել նման քննարկում: Այնուամենայնիվ, կարծում եմ, դաշինքի
յուրաքանչյուր անդամ կուսակցություն ոչ պաշտոնապես, գոնե իր ներքին կառույցներով
քննարկել է ստեղծված իրավիճակը: Ու գրեթե համոզված եմ, որ շատ-շատերը մտովի համաձայն
են այդ հայտարարությամբ մեր հրապարակայնորեն հնչեցրած քննադատությանը: Այնպես որ՝
չեմ կարծում, թե սպառված են բոլոր հնարավորությունները: Մենք այնուամենայնիվ ակնկալում
ենք, թե կլինի նման քննարկում: Իսկ եթե իսկապես որոշ ժամանակ հետո պարզ դառնա, թե
չկա ցանկություն վերագնահատելու անցյալը՝ մեր կուսակցության վարչությունով պետք է
անենք համապատասխան հետեւություններ: – Արդեն իսկ ակնհայտ է, որ դաշինքը վերանայել
է հանրահավաքային գործելակերպը, չի փորձում իրականացնել զուտ ինքնանպատակ իշխանափոխություն,
ինչը հայտարարությամբ կարեւորել էր ԱԺԿ-ն, նաեւ կա Սահմանադրության բարեփոխումն արդյունավետ
օգտագործելու միտում: Այս ամենը վկայություննե՞ր չեն, որ ԱԺԿ արծարծած խնդիրներն
արդեն իսկ լուծվել են՝ առանց ինչ-որ քննարկումների, եւ կարելի է վերադառնալ ի շրջանս
«Արդարության»: – Հենց դա էլ նկատի ունեի, երբ պնդում էի, թե դաշինքի մաս
կազմող կուսակցությունները կատարել են նման վերագնահատում: Բայց շատ բան պայմանավորված
է նաեւ այն հանգամանքով, թե այնուամենայնիվ՝ նրանք այդ վերագնահատումը որքանո՞վ հետեւողական
կիրականացնեն ու հետեւություններ կանե՞ն կատարված սխալներից: Մենք չենք փորձում արագացնել
իրադարձությունները: – Առջեւում ԱԺ ընտրություններ են, եւ դաշինքի լինել-չլինելու
հարցը թերեւս որոշվի ավելի շուտ, քան ԱԺԿ-ն հստակեցնի իր դիրքորոշումը: –
Խորհրդարանական ընտրություններն այս տարվա մայիսին չեն: Դեռ բավական ժամանակ կա,
եւ կարծում եմ՝ մինչ ընտրությունները տեղի կունենան մեծ վերադասավորումներ: Համենայնդեպս՝
մինչեւ գարնան ավարտը մեր դիրքորոշումն «Արդարություն» դաշինքին հետագա մասնակցության
վերաբերյալ հստակեցված կլինի ամբողջությամբ: Զրույցը վարեց
ԱՆՆԱ ԻՍՐԱՅԵԼՅԱՆԸ
