Դպրոցները դեռ չեն տաքացել Ձմեռային արձակուրդներից հետո ոչ միայն ցուրտը, այլեւ Տյառնընդառաջի տոնը նպաստավոր առիթ է դասերից բացակայելու համար: «Մեր տոներն այնքան քիչ են, որ մենք աշխատում ենք գոնե եղածները ինչքան հնարավոր է ճոխ նշել»,- ասաց Հակոբ Կարապենցի անվան թիվ 6 դպրոցի տնօրեն Օվսաննա Բաբայանը: Որպես կանոն, ձմեռային արձակուրդներից հետո ոչ բոլոր ծնողներն են համաձայնում, որ իրենց փափկասուն երեխաները դպրոց հաճախեն հենց առաջին օրվանից: «Դե, ինչ իմանաս, արդյոք մեկ ամսից ավելի ձգվող արձակուրդների ընթացքում դպրոց մարդ մտե՞լ է, եւ արդյոք դարն ապրած տեները միացրե՞լ են գոնե 1-2 ժամով: Իսկ հիմա վարակներն այնքան շատ են, որ չնչին մրսածության դեպքում երեխան անպայման կհիվանդանա»,- նշեց մեզ հանդիպած 3 դպրոցական երեխաներ ունեցող մայրերից մեկը: Կիրակի Էրեբունի համայնքի մի մասը հոսանքազրկված է եղել, ինչի պատճառով թիվ 6 դպրոցը, որի դասասենյակները ջեռուցվում են էլեկտրական սալիկներով, բավական սառն էին: Տնօրեն Օվսաննա Բաբայանը նշեց, որ միայն առավոտյան ժամը 7-ին են կարողացել միացնել տաքացուցիչները: «Հետո ինչ, որ դասասենյակները այդքան էլ տաք չեն, մենք մեր ջերմությամբ ենք դրանք տաքացնում»,- ասում էին 6-րդ դպրոցի աշակերտները: «Մենք հավանաբար մյուս շաբաթ կունենանք կաթսայատուն, դպրոցը կգազիֆիկացվի եւ ավելի տաք կլինի մեզ մոտ: Կառավարությունը մեզ հունվարին 88 մլն դրամ էր հատկացրել վերանորոգման համար, այս գումարից 4-մլնը կհատկացնենք գազիֆիկացմանը»,- ասաց Օ. Բաբայանը: Նա ավելացրեց, որ դպրոցն արդեն 70 տարեկան է եւ նախորդ տարի ՀՀ կառավարության հատկացրած 86 մլն դրամով կարողացել են վերանորոգել դպրոցի 4-րդ հարկը, եւ այս տարի վերանորոգման աշխատանքները կշարունակվեն: «Մեր դպրոցը բավականին հին էր եւ որքան էլ ջեռուցեինք, միեւնույն է՝ պատերի եւ պատուհանների անցքերից ցուրտն անմիջապես ներխուժում էր դասասենյակներ»,- պատմեց Օ. Բաբայանը: Թիվ 98 դպրոցի աշակերտուհի փոքրիկ Տաթեւիկը «Առավոտին» պատմեց, որ ընդամենը 6 հոգի են եղել դասարանում: «Մյուս դասարաններում էլ քիչ էին աշակերտները: Դպրոցում «գոլ» էր, մենք «դուբլյոնկաներով» էինք դասի նստել: Բայց միեւնույն է, ես շատ էի ուզում դպրոց գնալ, կարոտել էի դասընկերներիս, ուսուցիչներիս»: Այս դպրոցը գազիֆիկացված է եւ ունի լոկալ ջեռուցման համակարգ, սակայն առաջին օրը դեռ պատերն էլ չէին հասցրել տաքանալ: Թիվ 140 դպրոցի ծնողներից մեկը, որը չցանկացավ ներկայանալ, ասաց. «Ես երեխաներիս այս շաբաթ դպրոց չեմ ուղարկելու, քանի որ դեռ դետեմբերին ջեռուցման հետ կապված խնդիրներ կային, խողովակներ էին տրաքել: Այդ խնդիրները մինչեւ այսօր լուծված չեն, թեպետ ասում են, որ դպրոցի գազիֆիկացման աշխատանքները շուտով կավարտվեն եւ այն լիարժեք կջեռուցվի: Իմ երեխաները լավ են սովորում, տանը ինքնուրույն կպարապեն մի քանի օր»: Թիվ 116 դպրոցի աշակերտներից տեղեկացանք, որ դպրոցում «տեներ» են վառում: «Բայց դրանք այնքան էլ չեն տաքացնում, դասամիջոցներին գնում կպնում ենք տեներին, որ տաքանանք,- պատմեց աշակերտներից մեկը:- Քույրիկս փոքր է: Նրանց դասարանում նաեւ «պլիտա են» վառում: Դասղեկն ասում է՝ իմ երեխեքին ես շատ եմ սիրում ու չեմ թողնի մրսեն»,- ավելացրեց աղջիկը: Հակահամաճարակային տեսչության դպրոցական բաժնի պետ Ալեքսանդր Իսրայելյանից տեղեկացանք, որ դպրոցների ուսումնասիրության աշխատանքները սկսվել են ուրբաթ օրվանից: Սակայն ընդհանուր վիճակի մասին ամփոփ տվյալներ դեռեւս չկան: Բաժնի պետը պատրաստակամություն հայտնեց օպերատիվ միջոցներ ձեռնարկել, եթե ունենք ահազանգեր կամ մեր անձնական հետախուզությունից ստացված տվյալներ՝ դպրոցներում առկա ցածր ջերմաստիճանի եւ վարակների մասին: ԼՈՒՍԻՆԵ ՕՀԱՆՅԱՆ
