Ո՛Չ ԵԼՈՒՅԹ, Ո՛Չ ԶԵԿՈՒՅՑ ԱԺ-ՈՒՄ Թեեւ խորհրդարանը երեկ որոշմամբ հնարավորություն ընձեռեց Հայաստանի մարդու իրավունքների 1-ին պաշտպան Լարիսա Ալավերդյանին, որ ԱԺ-ում հանդես գա ելույթով՝ նա մտադիր չէ ընդունել այդ հրավերը. «Չեմ հասկանում այդ որոշումը: Ես լսեցի, որ քննարկման ժամանակ ասացին, թե դրանից ավելին չեն կարող անել (ուշադրություն դարձրեք) Լարիսա Ալավերդյանի համար: Ես խնդիր չունեմ այնտեղ գնալու եւ ելույթ ունենալու՝ անձնապես ինձ համար կայացված որոշմամբ: Լարիսա Ալավերդյանն ընդամենն ԱԺ-ի ուշադրությունն է հրավիրել «Մարդու իրավունքների պաշտպանի մասին» օրենքի» դրույթների վրա, որոնք հաշվետու տարում գործող Պաշտպանից պահանջում են զեկույց ներկայացնել նախորդ տարվա ընթացքում իր գործունեության մասին: Եվ ամենամեղմ արտահայտությունը թույլ տամ՝ շատ տարօրինակ ձեւով է մեկնաբանվել օրենքը»: Բնականաբար, նկատի ուներ իր դիմումին ԱԺ նախագահ Արթուր Բաղդասարյանի արձագանքը, ըստ որի՝ նախկին պաշտպանի գործունեության հաշվետվությունը պիտի ներկայացնի նոր պաշտպանը: Ըստ Լարիսա Ալավերդյանի՝ սա «ուղղակի ամոթալի ձեւով» ցույց է տալիս մեր վերնախավի իրավագիտակցական մակարդակը. «Սա ինքնին վկայում է, որ, ցավոք, խեղաթյուրված են ԱԺ մեծամասնության ընկալումները թե՛ Մարդու իրավունքների պաշտպանի հաստատության, թե՛ զեկույցի, թե՛ օմբուդսմենի տեղի եւ դերի շուրջ»: Արթուր Բաղդասարյանը նաեւ պատրաստակամություն էր հայտնել, որ եթե Լարիսա Ալավերդյանը գրավոր ներկայացնի իր զեկույցը՝ այն կբազմացնեն եւ կբաժանեն պատգամավորներին: Սակայն 1-ին պաշտպանը զեկույցը չի տրամադրելու ո՛չ հաջորդ պաշտպանին, ո՛չ էլ ԱԺ-ին. «Ես էլ եմ մասնակիորեն բավարարում իրենց այդ որոշումը: Իմ զեկույցը կտրամադրեմ հանրությանը՝ կհրապարակեմ այն: Իմ խնդիրը չէ՝ նոր պաշտպանը կամ ցանկացած ոք կարող է օգտվել այդ զեկույցից: Բայց չգիտեմ, թե ինչպես է ԱԺ-ն լսելու 2005-ին գործող Պաշտպանի զեկույցը: Եվ ոչ պետական ինստիտուտի, ինչպես ասաց ԱԺ նախագահը. կարծես խոսքը նախարարության մասին է, եւ նշանակություն չունի՝ սա կզեկուցի, թե նա… Չկա՛ ընկալում, որ սա մարմին չէ. այս հաստատությունը հենց պաշտոնատար անձն է»: Ա. Ի.
