Կոտայքի
մարզի Արա գյուղի 65-ամյա բնակիչ Ֆրունզիկ Գրիգորյանը նկարում է, գրում հինգ լեզվով,
օգտագործելով մարմնի տարբեր մասեր, այդ թվում նաեւ այն անդամը, որին այլ «առաքելություն»
է վերապահված: 
26
տարի ներքին գործերում աշխատած նախկին օպեր-լիազորը միայն վերջերս է որոշել ասել
այդ մասին: Իր խոսքերով՝ ողջ գիտակցական կյանքում լռել է, խորհրդային տարիներին՝
հասկանալի պատճառներով, աշխատանքը չկորցնելու համար. «Այս մասին չեն իմացել նույնիսկ
41 տարվա կինս եւ երեք զավակներս: Վերջին տարիների տեղեկատվական լայն դաշտը հնարավորություն
տվեց ծանոթանալ արտերկրում կատարվող նման ոչ ստանդարտ դեպքերին: Ընդ որում, հանդիպել
եմ նման, բայց պարզունակ դեպքերի: Համոզված եմ, որ իմ հնարքները կարող են գրանցվել
Գինեսի ռեկորդների գրքում»: Տեղեկացնենք, որ Ֆ. Գրիգորյանը ոտքի բութ մատի
եղունգը երկարացրել է, վրան անցք բացել, որպեսզի հարմար «բռնի» գրիչը՝ նկարելու ու
գրելու համար: Ֆ. Գրիգորյանը «ստեղծագործում» է քթանցքերի, ականջների օգնությամբ,
ընդ որում՝ տեղադրելով միանգամից մի քանի գրիչ: Ավելին, կախվելով վերամբարձ կռունկից,
նույն բանն անում է 60 մետր բարձրության վրա: Նա գրում ու նկարում է նաեւ գտնվելով
պարկի մեջ: Ինչպես ափսոսանքով տեղեկացրեց մեր զրուցակիցը, մարդիկ, ովքեր
ի վիճակի են ֆինանսավորել նման հնարքները աշխահին ներկայացնելու համար, չգիտես ինչու՝
իրեն չեն հավատում: «Ունեմ նաեւ կրկեսային համար. օղակ եմ հագնում, տեղադրելով
դրա վրա 12 գրիչ եւ միաժամանակ այդ 12-ով գրում եմ: Կամ 120 մմ երկարությամբ մեխին
ամրացնելով գրիչը՝ մտցնում եմ քթանցքս ու գրում: Ընդհանուր հաշվով նման 150 գրառումների
հեղինակ եմ: Նկարում եմ նաեւ մազերս թաթախելով ներկի մեջ: Կարծում եմ՝ նման բան դեռ
աշխարհը չի տեսել: Համոզված եմ՝ տեսնելու դեպքում Հայաստանն էլ կունենա իր ներկայացուցիչը
Գինեսի գրքում»,- վստահեցնում է հնարքներ բանեցնող նախկին ոստիկանը: Նա կարծում
է, որ եթե ֆիզիկական արատ ունեցողները կարողանան ճիշտ օգտագործել իրենց հնարավորությունները՝
օրինակ մարմնի տարբեր մասերով գրել ու նկարել, հաստատ աշխարհիս երեսին անգրագետ մարդ
չի լինի: Ս. ԴԱՆԻԵԼՅԱՆ
