«Փյունիկը»
մտավ 1/4 եզրափակիչ Ֆուտբոլի Հայաստանի չեմպիոն Երեւանի «Փյունիկը», չնայած
երեկ Մոսկվայում անցկացվող ԱՊՀ եւ Բալթյան երկրների չեմպիոնների «Համագործակցության
գավաթի» խաղարկության խմբային մրցաշարի վերջին խաղում 1:2 հաշվով տանուլ տվեց Ռուսաստանի
երիտասարդական հավաքականին, այդուհանդերձ քառորդ եզրափակիչում պայքարը շարունակելու
իրավունք նվաճեց: Մեկնարկային երկու հանդիպումներում «D» խմբի բոլոր չորս
թիմերը՝ «Փյունիկը», «Կաունասը», Բելառուսի «Շախտյորը» եւ Ռուսաստանի 1987 թվականին
ծնված ֆուտբոլիստներով համալրված երիտասարդական հավաքականը վաստակել էին հավասար՝
3-ական միավոր: Այնպես որ, հաջորդ շրջանի ուղեգիր նվաճող երկու թիմերի ճակատագիրը
որոշվելու էր հենց խմբային պայքարի եզրափակիչ տուրում: Մինչ այդ, մեկնարկային
հանդիպումում մեր չեմպիոնը 0:3 հաշվով պարտվել էր Լիտվայի «Կաունասին», «Շախտյորը»
նույն հաշվով առավելության էր հասել ռուսների նկատմամբ: Հաջորդ օրը երեւանցիներն
անչափ կարեւոր երեք միավոր էին վաստակել «Շախտյորից»՝ 2:0, իսկ լիտվացիները 0:1 հաշվով
տանուլ էին տվել Ռուսաստանի երիտասարդներին: Եվ քանի որ Ռուսաստանի երիտասարդական
հավաքականը «Համագործակցության գավաթի» մրցաշարին ավանդաբար մասնակցում է հաշվարկից
դուրս, երեկվա արդյունքների ամփոփումը տալիս է հետեւյալ ցուցանիշը. «Շախտյորի» նկատմամբ
տարած հաղթանակը «Փյունիկի» հաշվարկին բերել է 3 միավոր, իսկ Ռուսաստանի երիտասարդների
նկատմամբ առաջին տուրում բելառուսցիների առավելությունն ըստ կանոնակարգի՝ վերջնահաշվարկում
չի հաշվվում: Հետեւաբար, խմբային մրցաշարի եզրափակիչ աղյուսակը երեկ կայացած հանդիպումներից
հետո ունի մի տեսք, բայց ըստ էության իրավիճակը միանգամայն այլ է: 1. Ռուս.
երիտ. 3 2 0 1 3-4 6 2. Կաունաս 3 1 1 1 4-2 4 3. Շախտյոր 3 1 1 1
4-3 4(-3) 4. Փյունիկ 3 1 0 2 3-5 3 Փակագծում «Շախտյորի» միավորների
ընդհանուր գումարից հանվել է Ռուսաստանի երիտասարդական հավաքականից վաստակած 3 միավորը:
Անանդը շրջանցեց Իվանչուկին Հոլանդիայի Վեյկ-ան-Զեե քաղաքում ընթացող
շախմատի միջազգային գերմրցաշարի երրորդ տուրում, ինչպես արդեն տեղեկացրել ենք, Հայաստանի
լավագույն շախմատիստ Լեւոն Արոնյանը սպիտակներով միավորը բաժանեց հունգարացի Պետեր
Լեկոյի հետ, որի մարզիչը, ի դեպ, կնոջ՝ Սոֆիայի հայրն է՝ գրոսմայստեր Արշակ Պետրոսյանը:
Մյուս պարտիաներում գրանցվեցին այսպիսի արդյունքներ. Մամեդյարով-Սոկոլով՝
1:2, Տիվյակով-Վան Վելի՝ 1:2, Տոպալով-Բակրո՝ 1:0, Գելֆանդ-Ադամս՝ 1:0, Իվանչուկ-Անանդ՝
0:1: Հնդիկ գրոսմայստեր Վիշի Անանդը, առավելության հասնելով մինչ այդ միանձնյա առաջատարի
դերն ստանձնած ուկրաինացի Վասիլի Իվանչուկի նկատմամբ, մրցաշարային աղյուսակում շրջանցեց
նրան: Իսկ Լեւոնի համեստ մրցելույթը հասկանալի ու բնական է, քանի որ նա առաջին անգամ
է հանդես գալիս նման բարձրակարգ մրցակիցների շրջապատում: Թեեւ հուսով ենք, որ տաղանդաշատ
շախմատիստը դեռ իր խոսքը կասի Վեյկ ան Զեեում: Երեկ կայացավ չորրորդ տուրը,
որում զույգեր էին կազմել Սոկոլովն ու Անանդը, Լեկոն ու Իվանչուկը, Ադամսն ու Կարյակինը,
Բակրոն ու Գելֆանդը, Վան Վելին ու Տոպալովը, Մամեդյարովն ու Տիվյակովը: Արոնյանը
սեւերով ուժերը չափում էր ամերիկացի Գատա Կամսկու հետ: «Բանանցի» ղեկն ստանձնեց
ռուս մարզիչը «Առավոտին» հայտնի դարձավ, որ ֆուտբոլի Հայաստանի 2005 թ. առաջնության
բրոնզե մեդալակիր Երեւանի «Բանանցի» գլխավոր մարզչի ղեկը ստանձնել է ռուսաստանցի
մասնագետ, 60-ամյա Նիկոլայ Կիսելյովը, որը ժամանակին մարզել է «Սպարտակի», «Սատուրնի»
փոխարինող կազմերը, Ռուսաստանի երիտասարդական հավաքականը: Ակումբի ղեկավարությունը
ներկայումս Ծաղկաձոր՝ ուսումնամարզական հավաքի է հրավիրել Դոնեցկի «Մետալուրգի» կիսապաշտպաններ,
ուկրաինացիներ Սերգեյ Սիզիխինին, Արտյոմ Բեսալովին, ինչպես նաեւ Ռումինիայի «Ռապիդ-2»-ի
պաշտպան Մարիուս Կալինին: ԱՇՈՏ ՀԱԿՈԲՅԱՆ
