ԱՅՍՊԵՍ
Է ԱՇԽԱՏՈՒՄ «ՀԱՅԱՍՏԱՆ» ՀԻՄՆԱԴՐԱՄԸ Երեկ մենք «Հայաստան» համահայկական
հիմնադրամից փորձեցինք ճշտել Lragir.am-ի հետեւյալ լուրի իսկությունը. «Հազիվ թե
Հայաստանի եւ ԼՂՀ հասարակությունը մոռացած լինի Լեռնային Ղարաբաղի բյուջեի փողով
Երեւանում գնված բնակարանի հետ կապված աղմուկը: Հասարակությանը մի ամբողջ տարի ոչ
մի կերպ չէին կարողանում բացատրել՝ ինչո՞ւ է այդ բնակարանը գրանցված Նաիրա Մելքումյանի
անունով, եթե պաշտոնական մարմինները հայտարարում էին, որ կառավարությունը բյուջեի
17 հազար դոլարով այդ երեքսենյականոց բնակարանը գնել է Հայաստանի մայրաքաղաք գործուղվող
ղարաբաղցի պետական պաշտոնյաների կարիքների համար: Չէին բացատրում՝ հուսալով, որ աղմուկը
մոռացության կտրվի: Եվ հավատացին, որ մոռացվել է: Իսկ ինչպե՞ս բացատրել այն, որ մարդասիրական
հիմնադրամի ներկայիս գործադիր տնօրենը վերջերս անաղմուկ վաճառել է այդ բնակարանը
եւ, թերեւս, ձեռքն ընկած փողը ծախսել է առանձնատան նորոգման համար, որը նա ձեռք է
բերել Աշտարակում, անկասկած, ոչ իր աշխատավարձով եւ ակնհայտորեն՝ ոչ հիմնադրամի կարիքների
համար: Մտածել է վերջապես, որ ի վերջո պետք է ապրել «ազգի ներկայացուցչին» վայել
պայմանում: Առավել եւս, որ ղեկավարները մշտապես քողարկում են իրենց հնազանդ ենթականերին:
Առավել եւս այնպիսի գործերում, ինչպիսին «Հայաստան» հիմնադրամն է, ուր շատ են ուրիշի
փողերը: Բայց ահա հասարակությանը անհասկանալի է, թե ինչպես է, որ ժողովրդական փողերի՝
դեպի սեփական գրպան «ազատ, արդար եւ թափանցիկ» արդյունահանման պարագայում չի լինում
ոչ մի պաշտոնանկություն, ոչ էլ, առավել եւս, դատաքննություն»: Հիմնադրամում
տեղեկություն ճշտելու մեր խնդրանքին ի պատասխան՝ նախ հեռախոսը փոխանցեցին մեկին:
Հետո՝ երկրորդին: Հետո ասացին, որ նորից զանգեմ՝ դիմեմ մամուլի քարտուղարին: Հետո
պարզվեց, որ նա տեղում չէ, եւ հայտնի էլ չէ, թե արդյոք այսօր կլինի, թեեւ աշխատանքային
օրվա ավարտին կար շուրջ 2 ժամ: Իրար պաս տալու այս պատմությունից հետո, երբ տեղեկացրինք,
թե տեղեկությունը կհրապարակենք առանց իրենց պարզաբանման՝ մեզ հետ զրուցող՝ այդպես
էլ չներկայացած, բայց մեզնից 3-րդ անգամ ներկայանալ պահանջող պաշտոնյան սկսեց գոռգոռալ,
թե «10 հոգու էլ կարող էինք փոխանցել հեռախոսը: Դո՛ւք չպիտի թելադրեք մեր աշխատանքի
ռիթմը, թե երբ պիտի տեղում լինի մամուլի քարտուղարը»: Ա. Ի.
