Այս
կարծիքին է «Բարգավաճ Հայաստան» կուսակցության մասին ՀՀԿ խմբակցության ղեկավար Գալուստ
Սահակյանը – Պարոն Սահակյան, ինչպե՞ս եք գնահատում «Բարգավաճ Հայաստան» կուսակցության
շուրջ ստեղծված այս ակտիվ աժիոտաժը: Եվ հնարավոր համարո՞ւմ եք, որ հենց այս կուսակցությունն
է հավակնելու մեծամասնություն դառնալ 2007-ի խորհրդարանում: – Քաղաքական պայքարը
շատ բարդ պայքար է, եւ քաղաքական կուսակցություններն իրենց գաղափարական մոտեցումներում
հենց այդ պայքարի մեջ են կոփվում: Պատահական երեւույթներ, մանավանդ Հայաստանի նման
պետության ներսում` չեն կարող լինել: Ինչ վերաբերում է նոր, «Բարգավաճ Հայաստան»
կուսակցությանը, ես մոտավորապես տեղյակ եմ. իհարկե, կանոնադրությունից, ծրագրերից
եւ գաղափարախոսությունից տեղեկություն չունեմ, կարծում եմ, որ այս կուսակցությունը
համապետական ընտրություններում ֆիլտրի դեր է կատարելու եւ դա շատ դրական եմ համարում:
Քանի որ քաղաքական դաշտի թուլացման պայմաններում շատ հաճախ մանր-մունրերի կամ նոր
կուսակցությունների ակտիվացումը եւ առաջացումը շատ բնորոշ է լինում: Հիշեք, 99 թվականին,
երբ քաղաքական դաշտը շատ ամուր էր, մոտ 150 կուսակցություններից մնաց 60-63-ը այս
ամբողջ ընթացքում: Հիմա քաղաքական դաշտը թույլ է, եւ թույլ է ոչ միայն այն պատճառով,
որ կոալիցիան հզոր չէ, այլ թույլ է, որովհետեւ եւ կոալիցիայում եւ ընդդիմությունում
թուլացման պրոցեսներ, իրոք, կան: Այդ պատճառով այս նոր կուսակցությունը, ինչպես ասացիք,
աժիոտաժ առաջացնող կուսակցությունը իր դրական դերակատարումը կունենա: Այն կկատարի
ֆիլտրի դեր, բայց՝ կառուցվածքային տեսակետից եւ ոչ թե քաղաքական կամ գաղափարական:
– Սովորաբար ձեր կանխատեսումները իրականանում են, ձեր կարծիքով որքա՞ն տեղ
կստանա այս կուսակցությունը նոր խորհրդարանում, մանավանդ արդեն հայտարարվել է, որ
այն գալու է առանց դաշինքի, միայնակ: – Կարծում եմ, մենք էլ, որ նոր էինք
90-ական թվականներին, այդպես ոգեշունչ էինք. նայած ինչ փոխհամաձայնություններ կունենա,
ինչպիսի միտումներ կունենա եւ քաղաքական մեծամասնություն կազմելու նպատակը որն է:
Իհարկե, թերթում հրապարակվեց, որ ավելի շատ սոցիալական իրավիճակը լավացնելու եւ պետությունը
ամրացնելու խնդիր ունի: Դրանք սին խոսքեր են, որ բոլոր կուսակցություններն էլ հայտարարում
են: Հակաժողովրդական ոչ մի կարգախոս ոչ մի կուսակցություն չունի, հակաժողովրդական
որեւէ կուսակցություն ես Հայաստանում չեմ տեսնում եւ աշխարհում էլ չկա: Համենայնդեպս,
կարծում եմ` հանրապետական ընտրությունները ավելի լարված են լինելու: Այն աշխատանքը,
որ կատարվել է, պատահական երեւույթ չէ, կարծում եմ, որեւէ քաղաքական կուսակցության
լիդեր, եթե իր կուսակցությանը այդքան հաջողություններ բերեր, ապա հեռուստաեթերը հեղեղված
կլիներ միայն դրական նյութերով: Ուրեմն, այն հանգամանքը, որ այս տարիների ընթացքում
երկրի ազատականացման ճանապարհին լուրջ աշխատանք է կատարվել, որ ընդհանուր պետությունների
շարքում մենք 27-րդ տեղն ենք բռնել, սա բավականին լուրջ ցուցանիշ է: Կարծում եմ,
«Հանրապետականը» նորից աշխատանքների բնութագրերով կմասնակցի եւ նախորդ ընտրությունների
փորձով դարձյալ չի գնա ավելորդ խոստումների ճանապարհով: Մեր ժողովրդի գնահատականը
հենց դա է՝ լուրջ, նորմալ չափերի մեջ ավելի հանդարտ մտածողությունն ավելի գերիշխող
կլինի: – Այսինքն՝ դուք մտավախություն չունե՞ք, որ «Բարգավաճ Հայաստան» կուսակցությունը
մրցակից է լինելու հենց «Հանրապետականին»: – Բոլոր կուսակցություններն էլ
մրցակիցներ են, նայած ինչպիսի հարաբերություններ կձեւավորվեն: Ի դեպ, այդ փոխհարաբերություններն
արդեն ձեւավորված են այսօրվա խորհրդարանում, ինչո՞ւ չէ, նաեւ խմբակցության ներսում,
այնպես որ, մենք պայքարի համատեղ փորձ ունենք, եւ հենց դրա համար եմ ասում, որ ֆիլտրի
դեր կկատարի: Ավելի մանրամասնեմ. եթե այս կուսակցության մեծ պաթոսը, հայտարարությունները
չլինեն, բնական է, այդ պաթոսը անձերի հետ է կապված, մանր-մունր կուսակցությունների
առաջացումը ավելի կակտիվանա, որը կխանգարի ընդհանուր ընտրական գործընթացներին եւ
ավելի կաղճատի քաղաքական դաշտը, որը բարիք չի բերի մեր պետությանը: Այս կուսակցությունը
հզոր կլինի, բայց չեմ կարծում, որ այդ հզորությունը կարտահայտվի խորհրդարանում: Նույն
դիտարկումները ունեցել ենք նաեւ 2003-ի խորհրդարանական ընտրություններից առաջ, այն
չափաբաժինները, ինչ որ ունեցել են տարբեր կուսակցություններ, կարծում եմ, մեծ փոփոխությունների
չեն ենթարկվի: – Իսկ որքանո՞վ եք հնարավոր համարում Վիկտոր Դալլաքյանի մասնակցությունը
այդ կուսակցության գործունեությանը: – Կարծում եմ, շատ լավ կլինի, որ Վիկտոր
Դալլաքյանը այդ կուսակցության աշխատանքներին մասնակցի, որովհետեւ փորձառություն ունի,
համենայնդեպս, քաղաքական պրիոմը պիտի շատ հասկանալի դարձնել, որպեսզի ոչ Վիկտոր Դալլաքյանը
վարկաբեկվի, ոչ էլ տվյալ կուսակցությունը: ՄԱՐԳԱՐԻՏ ԵՍԱՅԱՆ
