2006 ԹՎԱԿԱՆԻՆ ՂԱՐԱԲԱՂԻ ՀԱՐՑ ՉԻ ԼՈՒԾՎԵԼՈՒ Համոզմունք հայտնեց ԱԺՄ նախագահ Վազգեն Մանուկյանը Որ Լեռնային Ղարաբաղի հակամարտության, ընդ որում՝ հայերիս համար ցանկալի տարբերակով, լուծումն օրգանապես կապված է նաեւ Հայաստանի ներքաղաքական կյանքում ընթացող պրոցեսների հետ՝ չեն հերքում ոչ իշխանությունները, ոչ ընդդիմությունը: Միայն թե իշխանություններն ու ընդդիմությունը այդ փոխկապակցվածությունը պայմանավորում են միանգամայն տարբեր տեսանկյուններից: Իշխանությունները կարծում են, որ հանուն ԼՂ հարցի կարգավորման, ընդդիմությունը պետք է մեր կեղտոտ սպիտակեղենը դուրս չհանի ու ժողովրդավարության ցածր մակարդակի՝ մարդու իրավունքների ոտնահարման, ապօրինի ձերբակալությունների, ընտրությունները կեղծելու փաստերի մասին միջազգային ատյաններում չբարձրաձայնի: Ընդդիմությունը վստահ է, որ ԼՂ հարցի լուծումը մեզ համար բարենպաստ կլինի, եթե Հայաստանը ժողովրդավարական լինի, ու ավելին, քան՝ Ադրբեջանը: «Իսկ դու մի՛ գողացիր»,- մի պատեհ առիթով իշխանություններին այսպես էր պատասխանել ԱԺՄ նախագահ Վազգեն Մանուկյանը՝ անդրադառնալով կեղտոտ սպիտակեղենին վերաբերող հարցադրմանը: Երեկ էլ Կինոյի տանը տեղի ունեցած միացյալ ընդդիմության նախաձեռնած հավաքի ժամանակ նա դարձյալ ԼՂ հակամարտության կարգավորումը պայմանավորեց միմիայն ՀՀ-ի ժողովրդավարացմամբ: Մինչդեռ, նրա ասելով, իշխանություններին այսօր ժողովրդավարությունը չի հետաքրքրում. «Նրանք դրա վրա թքած ունեն: Նրանք Արեւմուտքի ասածն անելու են, որովհետեւ ուզում են պահել իրենց իշխանությունը: Մտածում են, թե՝ Արեւմուտքի ասածն այս հարցում անենք, որ ժողովրդավարության հարցում ինչ-որ սիմետրիա լինի Հայաստանի ու Ադրբեջանի միջեւ: Եվ հիմա ժողովրդավարության հարցում Ադրբեջանի հետ ունենք իսկական «սիմետրիա»: Իրականում, ԱԺՄ նախագահի համոզմամբ, մեր ու Ադրբեջանի միջեւ կա այն ամենամեծ ասիմետրիան, որ կարող էր լինել Անդրկովկասում: «Մեր դեմ կանգնած է մի պետություն, որը մեզանից հզոր է իր տնտեսությամբ, իր հումքով, իր մարդկային ռեսուրսով, իր կազմակերպվածությամբ, եւ որի համար ժողովրդավարության ավելցուկը քիչ ազդեցություն ունի պետության հզորության տեսանկյունից: Մենք՝ հայերս, հզոր ենք, երբ ազատ ու արդար ենք եղել, երբ եղել ենք քաղաքացի»,- համոզմունք հայտնեց Վ. Մանուկյանը: Այսինքն, ի թիվս նախորդ ընտրությունների, նաեւ սահմանադրական հանրաքվեի արդյունքները կեղծելով, ըստ նրա, իշխանությունները ի չիք դարձրին նաեւ Ղարաբաղի հակամարտության հարցի՝ մեզ համար բարենպաստ լուծման հեռանկարը: «Ասում են՝ 2006թ.-ին Ղարաբաղի հարցը լուծում են: Սուտ են ասում: Ոչ մի հարց էլ 2006-ին չի լուծվելու: Ուղղակի Ալիեւն ու Քոչարյանը Արեւմուտքի աչքերին թոզ են փչում՝ ակնարկելով, թե՝ մեզ պահեք, մենք այդ հարցը լուծենք: Իրականում մտածում են՝ դիմացիններն ապուշ են, կֆռռացնենք: 2006-ին հարցը չի լուծվելու: Առջեւում էլի դադար է լինելու, որովհետեւ Ադրբեջանում սկսվելու են նախագահի ընտրություններ, Հայաստանում՝ խորհրդարանական ու նախագահական, ու այդ հարցն էլի սառեցվելու է: Սա է իրավիճակը: Բայց հիշեք, թե ղարաբաղյան շարժման ժամանակ մենք ինչի շնորհիվ էինք հզորանում: Ղարաբաղի հարցով մենք գնում էինք անկախության, ազատ հասարակություն ձեւավորելուն, ազատ տնտեսական համակարգ ստեղծելուն: Հիմա Ղարաբաղի հարցը շահարկելով՝ երկիրը կործանում են մինչեւ վերջ: Իսկ եթե վաղը պատերազմ լինի՞»,- հարցադրում արեց Վ. Մանուկյանը ու համոզմունք հայտնեց, որ Ղարաբաղի հարցը Ադրբեջանը ուշ թե շուտ փորձելու է լուծել պատերազմի միջոցով: «Մեր թուլացած պետությունը, որը չունի նորմալ բանակ, չունի ոստիկանություն, չունի ժողովուրդ, որը վստահում է իր իշխանություններին, չունի կենսամակարդակ՝ ո՞նց է պատերազմելու ու հաղթելու: Մեր՝ բոլորիս հաղթած պատերազմի ալիքի վրա եկան ու երկրին տեր կանգնեցին»,- վրդովված ասաց ԱԺՄ նախագահը: Ըստ նրա, Հայաստանի հեռանկարը մխիթարական չէ: Գուցեեւ գույները մի քիչ խտացնելով՝ Վ. Մանուկյանն ասաց. «Շատ ավելի ծանր է իրավիճակը, քան կարող է թվալ առաջին հայացքից: Սրա առջեւում կործանում է: Կամ ներսից պոռթկում է պետք, կամ դրսից մեզ լուծում կպարտադրեն ու կջարդեն»: ՆԱԻՐԱ ՄԱՄԻԿՈՆՅԱՆ
