Վերջերս
երիտասարդների շրջանում փոքրիկ հարցում կատարեցինք՝ պարզելու, թե որքանով են ավանդապահ:
Տրվեցին հետաքրքիր, երբեմն՝ իրարամերժ պատասխաններ: Որքան էլ
տարօրինակ էր, մոտ 20 երիտասարդներից շատերը կողմնակից էին ազգային ավանդույթներին
ու սովորույթներին հավատարիմ մնալուն: «Հայկական ավանդույթների մեջ կան շատ
ծայրահեղություններ, որոնք ընդունելի չեն: Ուստի գտնում եմ, որ ազգային ավանդույթներին
միշտ չէ, որ արժե հետեւել: Պետք է քայլել ժամանակին համընթաց»,- հաստատապես հայտարարեց
ԵՊՀ ուսանողուհի Մարիամ Մաթեւոսյանը: «Ընդունենք եվրոպականը, բայց հավատարիմ
մնանք մեր ավանդույթներին ու մտածելակերպին»,- սա հարցված երիտասարդների մեծամասնության
պատասխանն էր: Նրանցից շատերը մտահոգված էին հատկապես ընտանիքում կնոջ եւ տղամարդու
փոխհարաբերություններով: «Հայ տղամարդը պետք է իշխի կնոջ վրա»,- ուսանող Արմեն Մովսիսյանը,
ով հնչեցրեց այս կարծիքը, նույնիսկ չփորձեց հիմնավորել այն: «Հայ ընտանիքում դա է
ճիշտը»,- ընդամենն ավելացրեց նա: «Ունենք նորմալ մտածող, դատող ազգ, նա կարեւոր ավանդույթները
երբեք չպետք է անտեսի»,- հայտարարեց ԵՊՀ ուսանողական գիտական ընկերության նախագահ
Եզնիկ Միրզոյանը: Իսկ այն, որ մեր հին ավանդույթներում կան ծայրահեղ խստություններ,
Եզնիկ Միրզոյանը նույնիսկ օրինակով ցույց տվեց. «Հնում հայ ընտանիքում հարսը պետք
է լվանար սկեսրայրի ոտքերը: Սա խոնարհության նշան էր, բայց ինձ համար անընդունելի
է»: «Ոնց կարող է նորմալ մարդու ուղեղի մեջ տեղավորվել, որ հայ տղամարդը իր դիրքով
կարող է կնոջից ցածր լինել: Դա հնուց եկել է ու այդպես էլ պետք է շարունակվի»,- ամենայն
պատասխանատվությամբ ասաց ԵՊՀ կիրառական մաթեմատիկայի ֆակուլտետի մագիստրոս Արամ Թադեւոսյանը:
«Հայ աղջիկներն ու կանայք քիչ բան կարող են փոխել: Ստիպված պետք է հարմարվենք»,-
համոզված էր մեր հարցախույզի մյուս հերոսը՝ Նարինե Մելքոնյանը: Այսպիսի կարծիքներին
դեմ էր ոչ այնքան ավանդապաշտ, ոչ էլ եվրոպամետ Արսեն Մարտիրոսյանը: «Բոլորը խոսում
են ավանդականից: Իսկ չե՞ն նայում, թե ինչպես են այսօր հագնվում մեր աղջիկները: Փոխանակ
կին-տղամարդ հարաբերություններ քննարկեն, թող տղամարդիկ սկզբում իրենց բարեկամուհիների
ու ընկերուհիների հագուկապին, շպարին նայեն, հետո մեծ-մեծ խոսեն»,- պահանջեց նա:
Ապագա դեղագործ Գեւորգ Մանուկյանն էլ կարծում է, որ այնքան ենք սեւեռվել ավանդական
մտածելակերպի ու ազատամտության բախման վրա, որ խճճվել ենք: ՏԱԹԵՎ
ՀԱՐՈՒԹՅՈՒՆՅԱՆ
