«ՄԻՋԱԶԳԱՅԻՆ ԿԱՌՈՒՅՑՆԵՐԸ ՔԱՐՏ-ԲԼԱՆՇ ՏՎԵՑԻՆ ՎԱՐՉԱԽՄԲԻՆ» Կարծում է «Ազգային վերածնունդ» կուսակցության նախագահ Ալբերտ Բազեյանը – Պարոն Բազեյան, ինչպե՞ս եք գնահատում ստեղծված իրավիճակը, ձեր կարծիքով՝ ինչո՞ւ այս անգամ իշխանությունները գնացին աննախադեպ խախտումների: – Կարծում եմ, եւ Եվրոպայի Խորհրդի կանխակալ գնահատականները սահմանադրության փոփոխությունների անհրաժեշտության մասին, եւ միջազգային կառույցների ապօրինաբար իրականացվող քարոզչությունը, եւ մի շարք այլ հանգամանքներ իրենց դերն ունեցան, հուսադրեցին գործող ռեժիմին, եւ վարչախումբը գնաց նման լկտի կեղծիքների: Այսինքն՝ իրենց դրանով պաշտպանված զգացին եւ ավելի վստահաբար գնացին կեղծիքների: Փաստն այն է, որ նույնիսկ այսօր միջազգային կառույցները այնպիսի գնահատականներ են հնչեցնում, որոնք դատապարտելի են եւ բոլորովին համարժեք չեն ստեղծված իրավիճակին: Ըստ էության, չկան այն կոշտ գնահատականները, որոնք պետք է հնչեին այսպիսի ծավալով կեղծիքների պարագայում: Կարծում եմ, միջազգային կառույցները աչք փակեցին այս կեղծիքների վրա եւ քարտ-բլանշ տվեցին վարչախմբին: Հաջորդ հանգամանքը մեր ներքին իրավիճակն է. գործող իշխանությունները բազմիցս են կեղծել ընտրությունները՝ եւ 2003-ի նախագահական, եւ խորհրդարանական ընտրությունների ժամանակ, եւ այս տարվա ՏԻՄ ընտրությունների: Եթե չկա պատասխանատվության մեխանիզմը, որեւէ մեկը կեղծիքների համար չի ենթարկվում պատասխանատվության, մյուսներն էլ ավելի հանգիստ են գնում կեղծիքների: Ցավոք սրտի, ես ստիպված եմ ասել, որ այս ամենը պարզապես փչացնում է մեր հասարակությանը: Տասնյակ հազարավոր մարդիկ ընդգրկվում են ընտրակեղծիքների գործընթացի մեջ, եւ բոլորը գիտեն, որ կեղծված է՝ ե՛ւ նրանք, ովքեր մասնակցել են այդ կեղծիքներին, ե՛ւ նրանք, ովքեր փորձել են դրանց դեմն առնել: – Մեր թերթին տված հարցազրույցում ԱԺ նախագահ Արթուր Բաղդասարյանը կարծիք էր հայտնել, որ կեղծիքների աննախադեպ պատճառներից մեկն էլ այն էր, որ «քաղաքական գործիչները կամ ուժերը ոչ մի ազդեցություն չունեն կրիմինալ հոգեբանությամբ առաջնորդվող որոշ մարդկանց նկատմամբ, որոնք իրենց շեֆերին հաճոյանալու համար պատրաստ են ամեն ինչի»: Դուք համամի՞տ եք այս բացատրությանը: – Ես չեմ կարող համամիտ լինել նման արդարացումներին, իմ կարծիքով հրահանգը եղել է ամենավերեւից: Եթե իշխանությունը չի կարողանում պայքարել կրիմինալի եւ ընտրակեղծիքների դեմ, այդ դեպքում այդ իշխանությունը իշխանություն չէ: Այսինքն՝ չի կատարում իր սահմանադրական պարտականությունները, իսկ սա նշանակում է՝ թույլ իշխանություն: Բայց սրանք փորձեցին այս աստիճանի կեղծիքներով, մեր քաղաքացիների հանդեպ այսպիսի արհամարհական վերաբերմունքով մեկ անգամ եւս ցույց տալ, թե իրենք ուժեղ են, ինչ ուզեն՝ կարող են անել, սա էին ուզում մեկ անգամ եւս ապացուցել: Նախորդ տարիներին արել են, մարսել են, հիմա էլ նույն կերպ վարվեցին եւ շատ ավելի մեծ ցինիզմով եւ լկտիությամբ: – ՀՅԴ խմբակցության քարտուղար Հրայր Կարապետյանն էլ ստեղծված իրավիճակը համեմատեց ֆուտբոլային այն վիճակի հետ, երբ հակառակորդը չի խաղում, եւ դիմացինը գոլ է խփում: Նմա՞ն էր կատարվածը ֆուտբոլային խաղի: – Ես ափսոսում եմ, որ այս հանրաքվեի հարցը փորձում են տանել այլ հարթություն՝ իշխանություն- ընդդիմություն պայքարի հարթություն: Իսկ պետական շահը, հասարակությունը, ժողովուրդը այստեղ ոչ մի դերակատարում չպե՞տք է ունենային: Իրականությունն այն է, որ հասարակությանը, ժողովրդին զրկել են իր կամքը արտահայտելու հնարավորությունից եւ հիմա գլուխ են գովում, թե մի դարպասանի գոլ են խփել: Բայց ի՞նչ գոլի մասին է խոսքը, երբ ամբողջ հասարակության համար պարզից էլ պարզ է, որ հասարակության գերակշիռ մեծամասնությունը չի գնացել ընտրատեղամաս: Դա փաստ է: Եթե հիմա ընդդիմությանը հաջողվի կազմակերպել ստորագրահավաք-հարցում՝ մասնակցե՞լ եք դուք սահմանադրական փոփոխությունների հանրաքվեին, համոզված եմ, որ 80 տոկոսը կստորագրի, որ չի մասնակցել: Ուղղակի ցավում եմ, որ այս վիճակի առջեւ ենք կանգնած: Եվ այստեղ կա նաեւ ընդդիմության պատասխանատվության լուրջ բաժինը: – Ձեր գնահատմամբ, որո՞նք են լինելու հետագա քայլերը: – Հիմա ընթանում է գործընթաց, հանրությունը չի ընդունել արդյունքները, ընդդիմությունը եւս չի համակերպվելու այս ամենի հետ, թե ինչի՞ կհանգեն զարգացումները՝ ես չեմ կարող ասել, բայց ցավում եմ, որ երկրի հիմնական օրենքի փոփոխությունները, այսպես կոչված՝ ընդունվեցին նման մեթոդներով, եւ այս մթնոլորտում եթե գա այս փոփոխությունների գործելու ժամկետը, վստահություն չի ներշնչելու հանրությանը եւ չի գործելու, ինչպես չգործեց այսօրվա սահմանադրությունը: ՄԱՐԳԱՐԻՏ ԵՍԱՅԱՆ
