Ըստ ԵՄԱ մոնիտորինգի խմբի՝ սահմանադրական փոփոխությունները
ԶԼՄ-ները ոչ միայն աչառու են ներկայացրել, այլեւ որոշ դեպքերում ապակողմնորոշել եւ
թյուրիմացության մեջ գցել շարքային ընթերցողներին: Երեւանի
մամուլի ակումբը առաջիկա տասը-տասնհինգ օրվա ընթացքում կներկայացնի սահմանադրության
փոփոխությունների հանրաքվեի լուսաբանման մոնիտորինգի ամփոփումը: Սակայն մինչ այդ,
երեկ ԵՄԱ-ն հրավիրել էր սեմինար, որում ներկայացվեցին մոնիտորինգի նախնական տվյալները:
Հիշեցնենք, որ նոյեմբերի 5-25-ի ընթացքում ԵՄԱ-ն պարբերաբար ներկայացնում էր յուրաքանչյուր
շաբաթվա մոնիտորինգի տվյալները: Վերջնական տարբերակում դրանք քիչ են տարբերվելու
ամենշաբաթյա տվյալներից. բոլոր հեռուստաընկերությունները մինչեւ քարոզարշավի վերջին
օրն էլ շարունակում էին փառաբանել այդ փոփոխությունները, իսկ թերթերը շարունակում
էին ներկայացնել բեւեռային տեսակետներ: Թեեւ, ինչպես երեկ նկատեց ԵՄԱ նախագահ Բորիս
Նավասարդյանը, այս հանրաքվեն առաջին դեպքն էր, երբ թերթերն, ըստ էության, ավելի անկողմնակալ
էին, քան TV-ները: TV-ները նաեւ չեն կատարել «Հեռուստատեսության եւ ռադիոյի մասին»
օրենքի այն պահանջը, համաձայն որի պետք է հրապարակավ հայտնեին քարոզչական հաղորդումների
համար վճարովի եթերաժամի արժեքները եւ հավասար պայմաններով տրամադրեին այդ եթերաժամը
ցանկացողներին: Նրանք ընդհանրապես ձեռնպահ են մնացել վճարովի եթերաժամ տրամադրելուց,
փոխարենը լայնորեն իրականացրել են «Այո»-ի անվճար(՞) քարոզչություն եւ «Ոչ»-ի հակաքարոզչություն:
Սակայն թվերն ավելի խոսուն են: Այսպես, «Հայլուրի» (Հ1) թողարկումներում սահմանադրական
փոփոխություններին նվիրված է եղել նյութերի 23,4%-ը, որոնց մեջ եղել է 41 դրական,
8՝ բացասական եւ 49 չեզոք հիշատակում: «Լրաբերի» (Հ2) թողարկումներում հանրաքվեին
նվիրված է եղել տեսանյութերի 32,2%-ը, որոնցից 58-ը՝ դրական, 9-ը՝ բացասական եւ 39-ը՝
չեզոք: «Ժամը» («Արմենիա»), իր նյութերի 26,2%-ը նվիրելով հանրաքվեին, սահմանադրական
փոփոխությունների մասին եւ ոչ մի բացասական բան չի ասել, եղել է միայն դրական՝ 38
եւ չեզոք՝ 25 հիշատակում: «Օրեցօրի» (ԱԼՄ) տվյալները հետեւյալն են. փոփոխությունները
հիշատակվել են 26,2%-ում, դրական՝ 20, բացասական՝ 3 եւ չեզոք՝ 35: Ինչ վերաբերում
է թերթերին, ապա ամենաչեզոքը եղել է «Ազգը», որը սահմանադրական փոփոխությունները
դրական լույսի ներքո է ներկայացրել 7 դեպքում, բացասական՝ 8 եւ չեզոք՝ 28: Երեկվա
սեմինարին ներկա էր նաեւ Գյումրիի «Ասպարեզ» ակումբի նախագահ Լեւոն Բարսեղյանը, ով
ներկայացրեց Գյումրիի եւ Վանաձորի թերթերի եւ հեռուստաընկերությունների մոնիտորինգի
արդյունքները, որոնք քիչ էին տարբերվում համապետական ԶԼՄ-ների ունեցած տվյալներից:
Միակ դրականն այն էր, որ ընդհանուր առմամբ տարածաշրջանային TV-ները քիչ թե շատ ներկայացրել
էին նաեւ բացասական ուղղվածության նյութեր: ՄԵԼԱՆՅԱ ԲԱՐՍԵՂՅԱՆ
