«ԱրմենՏելի» հարցերը լուծեցին Պրովայդերները խոստանում են որակյալ ինտերնետ կապ Երեկ «Ինտերնետ միություն» հասարակական կազմակերպությունը ասուլիս էր հրավիրել՝ գովաբանելու տնտեսական մրցակցության պաշտպանության պետական հանձնաժողովի որոշումը: Այս հ/կ-ին անդամակցող մոտ 60 ինտերնետ ծառայություն մատուցող ընկերություններ պարբերաբար բողոքել են, որ «ԱրմենՏելի» կապուղիների միջոցով մատուցվող ինտերնետ կապն անորակ է, չի ապահովում երկրի տեղեկատվական անվտանգությունը եւ խոչընդոտում է մեր երկրում ինտերնետի զարգացմանը: Պրովայդերներն իրենց դժգոհությունները ձեւակերպել են հանձնաժողովին ուղղված նամակում: Նրանք նաեւ բողոքում են ծառայության բարձր սակագներից: «Շատ հաճախ Հայաստանը 5-6 ժամով զրկված է լինում աշխարհի հետ արտաքին կապից, ինչը անթույլատրելի է եւ հավասարազոր տեռորիստական քայլի»,- երեկ կրկին իր վրդովմունքը հայտնեց միության նախագահ Իգոր Մկրտումյանը: Նա մեկնաբանելով հանձնաժողովի որոշումը՝ նշեց, որ սույնով պրովայդերներն այսուհետեւ «ԱրմենՏելից» անկախ կարող են ունենալ սեփական արբանյակային կայան, ինչը կապահովի այլընտրանքային կապուղի: Այսինքն սա կնշանակի, որ նրանք ձեռք կբերեն առանձին միջազգային մուտքի ստացման ծառայություն, ինչը ավելի էժան կնստի պրովայդերների վրա, քան «ԱրմենՏելի» միջնորդությամբ էր: Հանձնաժողովը հստակեցրել է նաեւ «ԱրմենՏելի» կողմից մատուցվող որոշ ծառայությունների շուկաների սահմանումը եւ տվյալների փոխանցման՝ ելքի ծառայությունը ճանաչել է որպես առանձին շուկա: Ըստ միության նախագահի՝ սա նշանակում է, որ ընկերությունը պարտավոր է տրամադրել տվյալների փոխանցման ծառայություններ, չպարտադրելով սպառողներին՝ օգտվել նաեւ տվյալների ստացման մուտքի ծառայությունից: Այս որոշումով, փաստորեն, «ԱրմենՏելի» հետ կապված բոլոր պրոբլեմները, ըստ էության, լուծվում են: Սակայն որոշակի տեղեկություններով, «ԱրմենՏելն» էլ ինտերնետի վատ որակը ավելի շուտ կապում է ինտերնետ ծառայություններ մատուցող ընկերությունների ցածրորակ սարքավորումների հետ: ԼՈՒՍԻՆԵ ԲՈՒԴԱՂՅԱՆ
