ԲՈՎԱՆԴԱԿԱՅԻՆ
ԲԱՆԱՎԵՃ «Հայելի» ակումբի երեկվա հյուրերի՝ Ազատական-առաջադիմական
կուսակցության նախագահ Հովհաննես Հովհաննիսյանի եւ ՀՅԴ-ն ներկայացնող Լեւոն Մկրտչյանի՝
սահմանադրական բարեփոխումներին «ոչ» եւ «այո» բանավեճը ստացվեց քիչ թե շատ բովանդակային:
Ի հակադրություն Լեւոն Մկրտչյանի՝ Հովհ. Հովհաննիսյանը նկատեց, որ նախորդ իշխանությունը
գործող Սահմանադրությամբ ընդամենը 1,5 տարի աշխատեց: Մինչդեռ գործող իշխանությունն
արդեն ութ տարի է այս Սահմանադրությամբ աշխատում. «Էդ որ ասում եք՝ դատական համակարգը
կախված է, ումի՞ց է կախված, նախագահի՞ց: Այսինքն, դատարաններում այս բոլոր անօրինականությունները
որ կատարվում են՝ նախագահի անմիջական հանձնարարականնե՞րն են»: Մի շարք օրինակներով
Հովհ. Հովհաննիսյանը փաստեց, որ՝ «Սահմանադրությունը՝ թղթի վրա գրվածը» որեւէ աղերս
չունի մեր իրականության հետ: Ի պատասխան՝ պարոն Մկրտչյանը համոզում էր, որ «Սահմանադրությունը
թղթի վրա գրված չէ»: Հովհ. Հովհաննիսյանը վերհիշեց, որ գործող «ոչ ժողովրդավարական»
սահմանադրությունը բազում ճգնաժամերում «վահան» է եղել իշխանությունների համար, մասնավորապես
1999-ի հոկտեմբերի 27-ից հետո: «Ցանկացած նման պարագաներում իշխանությունը գործում
է օրենքի սահմաններում՝ անկախ նրանից, այն լավն է, թե՝ վատը»,- ասաց Լ. Մկրտչյանը:
ՀԱԱԿ նախագահը դեմ էր նաեւ պատգամավորների անձեռնմխելիության ժամկետի երկարաձգմանը:
Լ. Մկրտչյանը փաստեց, որ նման առաջարկ բարեփոխումներում կա, եթե պատգամավորը գործել
է ի պաշտոնե: Համաձայնեց, որ ՀՅԴ-ն միշտ դեմ է եղել անձեռնմխելիությանն ընդհանրապես,
բայց նշեց, որ հենց դրանով էլ առաջարկվող փաստաթուղթը «կոնսենսուսային» է: Հիշեցնենք,
որ մինչ այժմ վիճարկվում էր միայն նախագահի անձեռնմխելիության հարցը: Ն.
Գ.
