Իսկ
այդ շների տերերին դատեցին Օրերս Երեւանի Կենտրոն եւ Նորք-Մարաշ համայնքների
առաջին ատյանի դատարանը լսել է «հետաքրքիր» մի գործ. երկու հարեւանների շների խաղը
առիթ է դարձել, որ այն դառնա միջհարեւանական կռիվ եւ լուծվի դատարանում: Իրականում
շները միայն առիթ էին: Չարենցի փողոցի թիվ 35 երկհարկանի առանձնատունը, որտեղ
ապրում են Արմենուհի Ավետիսյանն իր քրոջ՝ Ամալյայի հետ եւ Գագիկ Պետրոսյանի ընտանիքը,
կառուցվել է 1948թ., Արմենուհու հոր եւ հորեղբոր ձեռքերով: Արմենուհին տան առաջին
հարկը ժառանգել է հորից, իսկ հողեղբոր բաժինը՝ 2-րդ հարկը, վաճառվել է: Վերջին գնորդը
Գագիկ Պետրոսյանն է՝ հայցվորը, որը տունը գնել է 2000թ.: Ըստ «Առավոտին» հյուրընկալված
Ա. Ավետիսյանի, իրենց հարեւանությունը չի ստացվել հենց սկզբից, որովհետեւ նորեկը
նպատակ է ունեցել տունն ամբողջությամբ ձեռք բերել ու շահավետ վաճառել: «Էլ գլխիս
կեղտաջուր էին թափում, էլ հոգեբուժարանից բժիշկ էին կանչում, անընդհատ հայհոյում
էին ու հրահրում կռվի»,- պատմեց Արմենուհին եւ որպես ապացույց ներկայացրեց բողոք-դիմումներ՝
ուղղված ոստիկանությանն ու դատախազությանը: Սակայն ոչինչ չի փոխվել՝ հարեւանների
միջեւ լարվածությունը չի վերացել: Իսկ հուլիսի 9-ին կատարված դեպքը առիթ է դարձել,
որ հարեւանները հարցերը պարզեն դատարանում: Անցյալ տարվանից Գ. Պետրոսյանի
ընտանիքում հայտնվել է նոր անդամ՝ պիտբուլտերյեր տեսակի շուն՝ Ծիգին: Իսկ մինչ այդ,
արդեն 11 տարի Ավետիսյանների տանը ապրում էր փոքրիկ մի շնիկ՝ Ջինան: Քանի որ բակն
ընդհանուր է, Ծիգին ու Ջինան հաճախ են առիթ ունեցել միմյանց հանդիպելու եւ «կռվշտվելու»,
հատկապես որ երկուսն էլ էգ են: Ընդ որում, «հանդիպումներն» ավարտվել են, բնականաբար,
Ծիգիի հաղթանակով, որովհետեւ պիտբուլտերյերը ամերիկյան մարտական ցեղատեսակ է: Դեպքի
օրը, երեկոյան, ըստ Գ. Պետրոսյանի ընտանիքի անդամների տված ցուցմունքների, գործով
տուժող իննամյա Վաղինակը իր քույրերի եւ ավագ քրոջ երեխաների հետ խաղում էր բակում,
երբ իր շան հետ տնից դուրս է եկել Ա. Ավետիսյանը: Ծիգին սկսել է խաղալ Ջինայի հետ,
իսկ Ջինայի տիրուհին պլաստմասսայե շշով, այնուհետեւ գետնից վերցրած փայտով սկսել
է խփել Ծիգիին: Վաղինակը լաց է եղել եւ խնդրել, որ շանը չխփի, բայց Արմենուհին փայտով
հարվածել է նաեւ Վաղինակի գլխին, ինչից Ծիգին գազազել է եւ առանց հրահանգի հարձակվել
ու կծել Արմենուհու ոտքը: Վաղինակի մայրը Արմենուհուն տեղափոխել է հիվանդանոց, իսկ
ավելի ուշ պարզելով, որ իր տղան էլ է վատ զգում, նրան էլ են տարել հիվանդանոց: Ըստ
ներկայացված փաստաթղթերի, երեխան ուղեղի ցնցում է ստացել: «Ճիշտ չեն ասում: Երբ ես
շանս հետ մտա այգի, Ծիգին չէր երեւում: Ջինան վազեց առաջ եւ այն պահին, երբ թփերի
հետեւից Ծիգին անսպասելի հարձակվեց վրաս, Ջինան հեռու էր: Ես ձեռքիս պոլիէթիլենային
շշով խփեցի շանը, իսկ փայտը ձեռքին նրա ետեւից եկող Վաղինակը փայտով հարվածեց ինձ:
Ուշադրությունս շեղվեց ու Ծիգին ոտքս բռնեց: Նարինեն՝ Վաղինակի մայրը ինձ օգնեց,
տարան հիվանդանոց, որտեղ 16 կար դրեցին վերքիս վրա: Եթե ես փայտով խփած լինեի, մայրը
երեխային թողած ի՞նձ կտաներ հիվանդանոց»,- Արմենուհու այս բացատրությունը դատարանը
համարել է անհիմն եւ քրեական պատասխանատվությունից խուսափելու փորձ: Դատավոր Ս. Արամյանի
վճռով Արմենուհին դատապարտվել է 1 տարի 6 ամիս պայմանական ազատազրկման: «Դատապարտյալը»
մտադիր է բողոքարկել: Հետաքրքիր է, որ դատարանն ուշադրություն չի դարձրել
եւ պատասխանատվության չի ենթարկել Գ. Պետրոսյանին՝ մարտական շանը առանց դնչկալի ու
վզկապի ընդհանուր բակ թողնելու համար: «Ապրիլին էլ նույն շունը կծել էր քրոջս ոտքը,
բայց չբողոքեցինք: Հիմա էլ համ տուժել եմ, համ էլ՝ դատապարտվել»,- բողոքեց Արմենուհին:
ՌՈՒԶԱՆ ԱՐՇԱԿՅԱՆ
