ԱՌԱՋԻՆ
ԸՆԴՈՒՆՎԱԾ ՀԱՅՑԸ ԵԴ-ՈՒՄ «Ազգային վերածնունդ» կուսակցության
անդամ Արմեն Մկրտչյանը, որ 2002-ին վարչական տույժի էր ենթարկվել հանրահավաքների
մասնակցելու համար՝ նույն թվականի վերջին դիմել էր Մարդու իրավունքների եվրոպական
դատարան: Վերջինս, ըստ Արմեն Մկրտչյանի, հայցը ստացել էր 2003-ի փետրվարին. «Նրանք
չեն խախտել ընթացակարգը՝ դեռ մինչեւ 2006-ի փետրվարի 22-ը ժամանակ ունեին որոշման
ընդունման համար»: Սակայն 2005-ի նոյեմբերի 2-ին է Արմեն Մկրտչյանը գրություն
ստացել ԵԴ-ից, որով տեղեկացվում է կայացված որոշման վերաբերյալ՝ «հայցի ընդունելիության
մասին»: Ըստ Արմեն Մկրտչյանի՝ «Նման որոշում կայացվում է միայն այն դեպքում, երբ
վերջնականապես համոզվում են, որ կա Մարդու իրավունքների եվրոպական կոնվենցիայի որոշակի
խախտում»: Արդեն նշանակված են կոլեգիայի անդամ դատավորները: «Հիմա հաջորդ փուլ ենք
մտնում, երբ պահանջում են լրացուցիչ փաստաթղթեր, թե բարոյական կամ նյութական ի՞նչ
վնաս է կրել հայցվորը, ինչպե՞ս կարող է դա ապացուցել»,- ասաց պրն Մկրտչյանը, որի
շահերը ԵԴ-ում ներկայացնում է փաստաբան Նիկոլայ Բաղդասարյանը: Եվրոդատարանը քննարկելու
է նաեւ վնասի արդարացի փոխհատուցման հարցը: Դա կլինի այնժամ, եթե այս փուլում հայցվորը
եւ կառավարությունը չգտնեն հաշտության եզրեր: Հակառակ դեպքում ԵԴ-ն կսկսի քննարկել
«Արմեն Մկրտչյանն ընդդեմ Հայաստանի» գործը՝ հավաքների ազատության իրավունքի սահմանափակման
վերաբերյալ: Համբերությամբ իր դիմումի քննարկմանը 3 տարի սպասած Արմեն Մկրտչյանն
ասաց. «ԵԴ դիմումների քանակն իրոք սարսափելի մեծ է: Դատարանը լուրջ բարեփոխումների
է ենթարկվում եւ մյուս դիմողների բախտը գուցե ավելի շատ բերի՝ ժամկետների առումով»:
Ա. Ի.
