ԲՈՂՈՔ ՉՈՒՆԵՆ, ՄՆՈՒՄ Է ԼԱՎ ՄԱՍՆԱԿՑԵՆ Չորեքշաբթի օրը հողագնդի ուժեղագույն ծանրորդները Քաթարում պայքարի մեջ կմտնեն աշխարհի առաջնության մեդալների համար: Նրանց մեջ լինելու են երկաթախաղի Հայաստանի վարպետները, որոնք այս օրերին վերջին ուսումնամարզական հավաքն են անցկացնում Արարատ քաղաքի «Այգ» մարզաբազայում ու Երեւանում: Երեկ մեր աշխատակիցը զրուցեց ազգային հավաքականի գլխավոր մարզիչ, ՀՀ վաստակավոր մարզիչ Ռոբերտ Հովհաննիսյանի հետ: – Աշխարհի առաջնության նախապատրաստման ընթացքից գո՞հ եք: – Ծրագրով նախատեսված չորս ուսումնամարզական հավաք ենք կազմակերպել Ծաղկաձորում, Երեւանում ու Արարատում: Բոլորն էլ անցել են լիարժեք ու, իմ կարծիքով, ծառայել նպատակներին: Դժգոհելու առիթներ չունենք: Ամեն բան, սկսած հավաքների ժամկետներից, վերջացրած սննդով՝ նորմալ է եղել: – Ովքե՞ր են ընդգրկված հավաքականում եւ ի՞նչ սկզբունքով են նրանք ընտրվել: – Հավաքականի վերջնական կազմը որոշելու նպատակով Գյումրիում կազմակերպվեց ֆեդերացիայի գավաթի խաղարկություն եւ մրցահարթակ մտած տարբեր քաշային կարգերի շուրջ չորս տասնյակ ծանրորդներից, ըստ արձանագրված արդյունքների, ընտրվեցին վեց արժանավորները: Նրանք են. 69 կգ քաշայիններ Արմեն Ղազարյանը եւ Արթուր Դանիելյանը, Հովհաննես Ամրեյանը՝ 77կգ, Արսեն Մելիքյանն ու Տիգրան Դավթյանը՝ 85 կգ եւ +105կգ քաշային Աշոտ Դանիելյանը: Ասեմ, որ Աշոտը նախապատրաստության այս փուլն իր ցանկությամբ եւ իմ թույլտվությամբ անցկացնում է առանձին, Երեւանում, անհատական պլանով: – Տղաների մարզավիճակը բավարա՞ր է, վնասվածք ունեցողներ չկա՞ն: – Միայն Արսեն Մելիքյանը ոտքի վնասվածք ունի, որ ստացել է օգոստոսին ծաղկաձորյան մարզումների ժամանակ: Բայց այսօրվա վիճակով, կարելի է ասել, ութսուն տոկոսով ապաքինվել է: Այսօր նա մարզումների ժամանակ ցույց է տալիս 160+190 կգ: – Դա բավարա՞ր է աշխարհի առաջնությունում հաջող հանդես գալու համար: – Քաթարում Արսենը պետք է ավելի բարձր արդյունքներ ցույց տա: Այլապես՝ նրան մրցավայր չէի տանի: Ինչ վերաբերում է մեր մյուս ծանրորդներին՝ Տիգրանը հիմա բարձրացնում է 170+200 կիլոգրամ, Արմենը՝ 145+185, Արթուրը՝ 142+180, Աշոտը գավաթի խաղարկությունում ցույց տվեց 214+250 կիլոգրամ: Սրանք վատ արդյունքներ չեն: Մնում է, որ նույնը կրկնեն կամ մի քիչ ավելին անեն Քաթարում: – Ու մեդալներ կունենա՞նք: – Ես նախապես չեմ ասում, թե ով ինչ մեդալ կնվաճի: Բոլորը չէ, որ ի վիճակի կլինեն պայքարել մեդալների համար: Ծանրորդներ ունենք, ովքեր պայքարելու են 1-6-րդ, մյուսները՝ ասենք, 3-8-րդ տեղերի համար: Ժամանակից առաջ չանցնենք ու սպասենք: – Կրկին ամենացավալի հարցը. ծանրորդները դոպինգ ստուգում անցե՞լ են: – Հոկտեմբերի կեսերին ՎԱԴԱ-ի ներկայացուցիչները եկել ու փորձանմուշները տարել են: Եթե որեւէ բան այն չլիներ՝ հիմա վաղուց աղմուկ բարձրացած կլիներ: – Այս տարվանից ծանրամարտի մրցումներն անցկացվում են նոր մրցակարգով: Վերացել է ծանրաձողի քաշն առնվազն 2,5 կգ-ով ավելացնելու կարգը: Հիմա նվազագույն սահմանը 1 կիլոգրամն է: Ինչո՞ւ է դա արվել ու դրանով պայքարը դժվարանո՞ւմ է, թե՞ հեշտանում: – Դա արվել է մարզիկների անձնական քաշերի տարբերության պատճառով: Եթե երկու մարզիկ միեւնույն վարժությունում ցույց էին տալիս նույն արդյունքը, հաղթանակը շնորհվում էր ավելի թեթեւին, հետեւաբար, մրցակիցը ստիպված պետք է լիներ բարձրացնել 2,5 կգ ավելի: Ներկայումս մարզիկների համար պայքարի պայմանները, կարծես, հավասարեցվել են: Բայց մյուս կողմից բավականին դժվարացել է մարզիչների գործը տակտիկական պայքարի առումով: Պիտի լավ ճանաչել մրցակցի իրական հնարավորությունները, կարողանալ ճիշտ քաշեր պատվիրել տանուլ չտալու համար, որովհետեւ երեք մրցափորձի կանոնը մնացել է ուժի մեջ: ԱՇՈՏ ՀԱԿՈԲՅԱՆ
