Նա,
ով չգիտե իր անցյալը, չի կարող նայել ապագային Այսօր իրեն քիչ
թե շատ հարգող յուրաքանչյուր մարդ փնտրում է իր արմատները: Նրանցից շատերը կազմում
են իրենց տոհմածառը, որը երբեմն հպարտանալու, ոմանց մտածելու, մի մասին էլ տխրելու
տեղիք է տալիս: Այս հետաքրքիր գործում որոշել է իր ավանդն ունենալ Գրիգոր Պետրոսյանը:
«Հին, բարի ժամանակներում ազնվականներն իրենց նախնիների նկարներով զարդարում
էին տները: Նրանք հպարտանում էին իրենց նախնիների ձեռք բերած երբեմնի փառքով: Նույն
ժամանակ հասարակ մարդիկ պահում էին ընտանեկան ալբոմներ՝ իրենց տոհմի լուսանկարներով:
Շատերը հպարտանալու ոչինչ չունեին, եւ նկարները փոշոտվում էին ժամանակի մեջ: Խորհրդային
կարգերը մարդկանց մեջ դրեցին հավասարման նշան, եւ այժմ յուրաքանչյուրն ինքը պիտի
որոշի՝ ուզո՞ւմ է գիտենալ իր տոհմածառը եւ ըստ այդմ էլ որոշվում է տոհմի արժեւորման
աստիճանը»,- ասաց Գ. Պետրոսյանը: Նրա պատրաստած մետաղե ծառի յուրաքանչյուր
ճյուղից կախվում է տերեւ-նկարը, իսկ արմատը խորհրդանշում է տվյալ երկիրը: Գ. Պետրոսյանի
«Family Tree» ընկերությունը այսօր գրանցված է Հայաստանում եւ Ռուսաստանում: Ընկերության
արտադրանքը ըստ պայմանագրի կարտահանվի աշխարհի 27 երկիր, այդ թվում՝ Շվեյցարիա, Բելգիա,
Լյուքսեմբուրգ եւ այլուր: Յուրաքանչյուր երկրում ծառի արմատի վրա կլինեն տվյալ ժողովրդի
խորհրդանիշները: Գաղափարը հետաքրքրել է Իոսիֆ Կոբզոնին, Վալերի Յուդաշկինին եւ այլ
արվեստագետների: Մինչ այժմ Գ. Պետրոսյանը պատրաստել է 3, 5, 7 տերեւ-նկար
պարունակող ծառեր, սակայն նա մտադիր է ընդլայնել իր պատրաստած տոհմածառի «հնարավորությունները»,
եւ այժմ աշխատանքներ են տարվում այդ ուղղությամբ: Մտահղացումները քիչ չեն՝ զարդարել
ծառը կիսաթանկարժեք քարերով, տերեւ-նկարները դարձնել երկկողմանի, հետագայում նաեւ
ծառի մեջ տեղադրել երաժշտություն, որի օգնությամբ այն «կհիշեցնի» տոհմածառում զետեղված
ընտանիքի կամ անդամի ծննդյան տարելիցը, այլ տարեթվեր, ընդ որում՝ հայերեն, ռուսերեն
եւ անգլերեն լեզուներով: «Ընտանիքը հայերի համար միշտ եղել է սրբություն:
Ծնող-զավակ հարաբերությունը հիմնված է եղել փոխադարձ մեծ սիրո եւ հարգանքի վրա: Վերջին
ժամանակներս շատ բան է փոխվել աշխարհում: Փոխվել է նաեւ մեր վերաբերմունքը միմյանց
հանդեպ: Սակայն բավական է մի պահ սթափվենք՝ անմիջապես ներքեւ ենք նայում, իսկ այնտեղ
մեր արմատներն են: Հույս ունեմ, որ իմ այս մտահղացումը՝ տոհմածառը, յուրաքանչյուր
տոհմի, ընտանիքի կբերի սեր, ջերմություն, խաղաղություն եւ հաջողություններ»,- «Առավոտին»
ասաց Գրիգոր Պետրոսյանը: ՌՈՒԶԱՆ ԱՎՈՅԱՆ
