Ազատամարտիկի մայրը համոզված է, որ վարչապետն
էլ իրեն կպաշտպանի «Մեր շենքի բակը շատ խաղաղ էր: Մինչ այժմ
ոչ մի խնդիր չենք ունեցել, բակում մեծերի համար հանգստի տեղ կա, երեխաների համար՝
խաղահրապարակ: Բայց մի շաբաթ առաջ հենց շենքի պատի տակ՝ խաղահրապարակի տեղում, սկսեցին
փորել: Երբ հարցրինք՝ ասացին, թե թանգարան են սարքում, հետո էլ, թե՝ ջրավազան: Իսկ
մեր տվյալներով՝ խանութ են սարքելու»,- «Առավոտի» ստացած հերթական բողոքը Երեւանի
Շենգավիթ համայնքի Ֆուչիկի 10 հասցեի բնակիչներից է: Նրանք պարզել են նաեւ կառույցի
հեղինակին. արցախյան պատերազմի զոհված ազատամարտիկ Գեւորգ Ղազարյանի մայրն է՝ Շենգավիթ
համայնքի զոհված ազատամարտիկների միության նախագահ Լյուդմիլա Ղազարյանը: «Նա ապրում
է հարակից՝ Ֆուչիկի 10/1 շենքում: Իրենց շենքի բակում մի քանի տարի առաջ ծառեր կտրեց,
ավտոտնակ կառուցեց: Թող կառուցի, թող թանգարան կամ խանութ էլ կառուցի, բայց ոչ մեր
հանգստի հաշվին: Ուրիշ տեղ կարող են հատկացնել, ոչ թե մեր շենքի բակն ու այն էլ՝
երեխաների խաղահրապարակը»,- բողոքել են բնակիչները: Նրանք անհանգստացած էին գլխավորապես
այն հետեւանքներից, որ կարող է առաջացնել խանութի գոյությունը. «Մեր թաղամասը՝ Յոնջալախը,
հայտնի է որպես աղքատ ու գործազուրկ թաղամաս: Ինչպես բակերում տեղավորված մյուս խանութներում,
այստեղ էլ կհավաքվեն մի բաժակ գարեջուր կամ օղի խմելու, կաղմկեն ու կհայհոյեն: Իսկ
շենքի ննջասենյակները բացվում են հենց նորակառույցի վրա: Մենք, ինչ է, ողջ գիշեր
չե՞նք քնելու: Մեր դժգոհությանը ազատամարտիկի եղբայրը, որը պաշտպանության նախարարությունում
է աշխատում, հեգնանքով պատասխանեց, թե՝ ում ուզում եք՝ դիմեք, մեկ է, սարքելու եմ»:
Հիմքը փորելու օրվանից բնակիչներն անցել են ակտիվ բողոքի. նախ՝ Շենգավիթի
թաղապետարան, որտեղից տեղեկացրել են, թե՝ «հողհատկացման հետ մենք գործ չունենք, քաղաքապետարան
գնացեք», ապա՝ քաղաքապետարանի համապատասխան կառույցներին, որոնց միջամտությամբ հաջողվել
է կասեցնել շինարարական աշխատանքները: Երեւանի քաղաքապետարանի հողի վերահսկողության
վարչությունում նրանց հայտնել են, որ «քաղաքապետի որոշում դեռեւս չկա, բայց կարող
է՝ ստանան»: Նամակ ուղարկվել է նաեւ վարչապետին: «Վերջին փոփոխություններից
հետո թաղապետարանները հողհատկացման կամ շինթույլտվության հետ գործ չունեն՝ քաղաքապետարանի
ճարտարապետության ու քաղաքաշինության վարչությունն է տալիս, մեզ մի օրինակ են ուղարկում՝
դա էլ դեռ չենք ստացել»,- «Առավոտին» պարզաբանեց համայնքի գլխավոր ճարտարապետ Գագիկ
Հարությունյանը: Իսկ հիշյալ վարչությունից տեղեկություն չհաջողվեց ստանալ: Սակայն
կառույցի նախաձեռնող Լ. Ղազարյանը չհրաժարվեց պատասխանից. «Ես կառուցում եմ իմ տղայի՝
Արցախյան պատերազմի հերոս Գեւորգ Ղազարյանի տուն-թանգարանը: Կառույցը ոչ մեկին չի
խանգարի՝ խաղահրապարակը պաշտպանվում է, ճանապարհը պահպանվում է, կանաչ տարածք չի
վերանում, շենքից 10-11 մետր հեռու է: Ավելին, այդտեղ ամայի տարածք էր՝ ծառեր ու
ծաղիկներ ենք տնկելու: Այնպես որ, թող իզուր չհակառակվեն, թե՝ կհավաքվեն ու կհայհոյեն,
ամբողջ Յոնջալախը հայհոյում է՝ ո՞նց են դիմանում, դա էլ շանտաժի նո՞ր ձեւ է»: Ինչ
վերաբերում է խանութի մասին իր տղայի ասածին՝ «դա սուտ է, հորինում են, կկառուցենք,
բացումը կանենք՝ կհամոզվեք»: ՌՈՒԶԱՆ ԱՐՇԱԿՅԱՆ
