ԵՐԵՎԱՆՅԱՆ SEX-SHOP-Ն ԱՌԱՅԺՄ ԹԱՆԳԱՐԱՆ Է Երեւանում 1994 եւ 98թթ. բացված սեքս խանութները կարճատեւ կյանք ունեցան: Վերջերս Թամանյան 1ա հասցեում բացվել է «Սեքս եւ կյանք» սրահը: Երեւանյան առայժմ միակ sex-shop-ի տնօրեն Պետրոս Մովսեսյանը հարցազրույց ունեցավ մեզ հետ՝ ծանոթացնելով սրահի գործունեությանը եւ այս ոլորտում «վերջին ճիչ» համարվող տեսականուն: Զրույցի սկզբում տնօրենը կեսկատակ-կեսլուրջ ասաց. «Թեպետ սրահում արդեն շարժ կա, բայց առայժմ այն ծառայում է որպես թանգարան»: Մեր հետաքրքրությանը, թե սրահը նախկին սեքս-խանութների ճակատագրին չի՞ արժանանա, տնօրենը պատասխանեց. «Նախ ասեմ, որ մինչեւ 18 տարեկանների մուտքը սրահ արգելվում է: Ժամանակին սեքս-խանութները փակվեցին տատիկների ու պապիկների բազմաթիվ բողոքների արդյունքում: Բացման օրվանից մենք ունենք հաճախորդ մի պապիկ, որն այս ընթացքում իր շրջապատում անվճար գովազդում է սրահը: Նրա ուղեկցությամբ մեզ մոտ են հաճախում իր տարեկիցները, իսկ ինքը նրանց համար էքսկուրսավարություն է անում: Հուսով ենք, որ պապիկները կարգելեն տատիկներին՝ բողոքելու մեր սրահի դեմ»: Նման սրահները Եվրոպայում կրում են «Սեր եւ կյանք» անունը, որտեղ աշխատում են համապատասխան մասնագետներ՝ սեքսոպաթոլոգ եւ այլն: Այս առիթով տնօրենը մեզ հայտնեց, որ «Սեր եւ կյանքը» վերջին հաշվով նույնն է, ինչ «Սեքս եւ կյանքը»: Քանի որ մեկն առանց մյուսի հնարավոր չէ պատկերացնել: «Իսկ հայերի մասին երեւի թյուր կարծիք ունեք: Համակարգչային դարում եթե ոչ լիարժեք, ապա հնարավորինս տեղեկացված ենք: Չեմ կարծում, որ սրահում մասնագետի կարիք կա: Միակ աշխատակցուհին բավարար չափով տեղեկացված է ոլորտին եւ յուրաքանչյուր այցելուի սիրով ու համբերատար, կատալոգների միջոցով ներկայացնում ու բացատրում է ամեն ինչ»,- պարզաբանեց պրն Մովսեսյանը: Նկատելով ներկայացված տեսականու գները (1-2 հազար դրամից մինչեւ «անվերջություն») եւ տեղեկացված լինելով, որ սրահում այս կամ այն «ապրանքը» կարելի է ձեռք բերել պատվերով՝ նախապես որոշ գումար մուծելուց հետո, նրան խնդրեցինք մանրամասնել: Պ. Մովսեսյանը հայտնեց, որ սրահն աշխատում է պատվերի սկզբունքով, իսկ իրերն իրենց աքսեսուարներով ներկրվում են Ռուսաստանից ու Եվրոպայից. «Այցելուն վճարում է նախընտրած նմուշի 30%-ը, մեկուկես ամսից պատվերն ուշանալու դեպքում սրահը կատարում է զեղչ: Կարճ ասած, 30%-ի չափով մուծված գումարը վերադարձվում է պատվիրատուին»: Տնօրենը տեղեկացրեց նաեւ, որ տեսականին հարուստ է սեքս-նորաձեւության վերջին ճիչերով, օրինակ՝ լույսով պահպանակներ, սեռական օրգանների մկանները զարգացնելու համար հատուկ գնդիկներ, սեռական ակտը կարգավորող եւ երկարաձգող դեզադորանտներ, քսուքներ, նաեւ էրոտիկ հուշանվերներ, եւ այլն: Հարցին, թե Հայաստանում այդ ոլորտում հնարավո՞ր է ունենաք գործընկեր, Պ. Մովսեսյանն ասաց. «Ծրագրեր ունենք ապագայում համագործակցել գիշերային ակումբների հետ: Վստահ եմ՝ դա կլինի փոխշահավետ համագործակցություն»: Ս. ԴԱՆԻԵԼՅԱՆ Հ. Գ. Շուտով կկայանա «Սեքս եւ կյանք» սրահի պաշտոնական բացումը: Հավանաբար, շնորհանդեսից հետո հետաքրքրվողների թիվը կաճի:
