Կենսատեխնոլոգիական
ինստիտուտի իրավաբանական ֆակուլտետի 4-րդ կուրսի ուսանողներից երեկ փորձեցինք ճշտել,
թե ինչպես են պատկերացնում գիշերային Երեւանը, աշխատո՞ւմ են գիշերային որեւէ հիմնարկում,
կաշխատե՞ն՝ եթե նրանց տրվի բարձր աշխատավարձ: Առհասարակ, երիտասարդները
գիշերը նախընտրո՞ւմ են զբոսնել այգում, փողոցում, այցելել հարազատներին: Հարցման
10 մասնակիցները վախենում են դուրս գալ փողոց գիշերը ժամը 12-ից հետո: Նրանք գտնում
են, որ մութն ընկնելուց հետո վտանգավոր է, քանի որ «դրսում վխտում են բոմժերը, հարբեցողներն
ու գողերը»: Թերեւս առանձնանում էր Մոնիկա Շիրինյանի պատասխանը. «Այո, շատ
հաճախ եմ գիշերը դրսում լինում, քանի որ գիշերային կյանքն ինձ ավելի է դուր գալիս:
Ամեն գիշեր մարդն իրեն յուրովի է բացահայտում»: Հարցման 10 մասնակիցները գտնում
են, որ գիշերը պետք է հանգստանալ, ոչ թե աշխատել: Գայանե Սրապյանն ասում է.
«Չեմ աշխատում, բայց եթե պայմանները դրդեն՝ կաշխատեմ»: Հարցման մասնակից Ցողինե
Ղազարյանի ծանոթներից շատերն աշխատում են գիշերային հերթափոխով: «Գիշերը շատ վտանգավոր
է, մանավանդ կանանց համար, քանի որ փողոցներում շրջում են մուրացկաններ, բազմապիսի
վտանգավոր մարդիկ»,- ասում է նա: Վերջինիս կարծիքով՝ «գիշերվա քնին փոխարինած աշխատանքը
քառապատիկ բարձր պետք է վարձատրվի» եւ միայն կարիքը կարող է ստիպել, որ ինքն աշխատի:
18-ամյա Էլեն Ղազարյանը մեզ ասաց, որ փողոց, սրճարան, այգի է դուրս գալիս,
երբ իր ընկերների, բարեկամների հետ է: Նրա կարծիքով՝ «հոգնեցուցիչ է աշխատել գիշերը,
որովհետեւ ֆիզիկապես քայքայվում ես»: Է. Ղազարյանն ասում է նաեւ, որ չի աշխատի, ինչքան
էլ մեծ գումար առաջարկվի իրեն: Ապագա իրավաբան, 22-ամյա Մարի Թադեւոսյանը
մեզ տեղեկացրեց, որ իր մտերիմներից շատերն աշխատում են գիշերը. նրանք աշխատում են
հիվանդանոցում, ոստիկանությունում եւ պաշտպանության նախարարությունում: Նա հայտնեց,
որ նույնիսկ ամենաբարձր աշխատավարձը չի դրդի իրեն, որ ինքն աշխատի: Գայանե
Սրապյանը գիշերային ակումբ ընդհանրապես չի այցելում, իսկ հարազատներին այցելում է
ուշ ժամերին՝ տրամադրության հետ կապված: 20-ամյա Նարինե Տեր-Մկրտչյանը
դրսում, այգիներում լինում է կեսօրին: «Գիշերային ակումբներում ընդհանրապես չեմ եղել
եւ ցանկություն էլ չունեմ լինելու»: Նրա տեղեկացմամբ՝ չունի անգամ ծանոթ՝ գիշերն
աշխատող: Առհասարակ, նրա պատկերացմամբ, «գիշերային աշխատանքն էլ ավելի ծանր է, որքան
էլ այն հաճելի լինի եւ բարձր վարձատրվի»:
