Օմբուդսմենի կանցլերն է լավը Էստոնիայում մարդու իրավունքների պաշտպանը իրավունք ունի պատասխանատվության կանչել դատավորներին ՀՀ Մարդու իրավունքների պաշտպանի երեկվա ասուլիսն ընդլայնված կազմով էր. բացի Լարիսա Ալավերդյանից, ասուլիսին ներկա էին նաեւ նրա մերձբալթյան կոլեգաները: Էստոնիայի օմբուդսմենը կամ, ինչպես իրենք են կոչում՝ «արդարադատության կանցլերը»՝ Ալլար Յոքսը ՀՀ-ում է գտնվում քառօրյա աշխատանքային այցով՝ հոկտեմբերի 15-ից: Այս ընթացքում նա հանդիպել է ՀՀ ԱԺ նախագահի, արդարադատության նախարարի եւ ՍԴ նախագահի հետ: Իսկ մյուս հյուրերը՝ Լիտվայի օմբուդսմենի խորհրդականներն էին, որոնք ժամանել էին Երեւան՝ պատասխան այցով: Մինչ այդ՝ ՀՀ Մարդու իրավունքների պաշտպանի օգնականներն էին փորձի փոխանակման նպատակով մեկնել Լիտվա: Էստոնիայում օմբուդսմենի ինստիտուտը հիմնվել է դեռ 1938-ին՝ Շվեդիայից եւ Ֆինլանդիայից հետո, աշխարհում երրորդը: Սակայն 1940-ից մինչեւ 1993 թթ. այդ ինստիտուտը հասկանալի պատճառներով Էստոնիայում դադարեցրել է իր գործունեությունը: Այնուամենայնիվ, պատմական հիմքը դրված էր, եւ գուցե նաեւ այդ պատճառով է օմբուդսմենի ինստիտուտի էստոնական տարբերակը համարվում աշխարհի ամենահաջողվածներից մեկը: Էստոնիայի արդարադատության կանցլերը կարող է ոչ միայն ձայնի իրավունքով մասնակցել կառավարության եւ խորհրդարանի աշխատանքներին, այլեւ իրավունք ունի անհրաժեշտության դեպքում վարչական պատասխանատվության կանչել դատավորներին: Բնական է, որ այսպիսի իրավասություններով օժտված, անկախ պաշտոնատար անձ համարվող կանցլերը, որին նշանակում է երկրի պառլամենտը, իր կարգավիճակով բարձր է նախարարներից: Էստոնիայի արդարադատության կանցլերը նկատեց, որ Էստոնիայում տնտեսությունը զարգանում է մարդու իրավունքների լուրջ պաշտպանվածության, ինչպես նաեւ անկախ եւ ուժեղ դատական իշխանության գոյության հիմքերի վրա, եւ հավելեց, որ այլ ճանապարհ չկա: «Ա1+»-ի թղթակիցը հետաքրքրվեց, այդ դեպքում ինչպես բացատրել այն պարադոքսը, որ ՀՀ-ում սահմանները փակ են, մարդու իրավունքների եւ դատական իշխանության վիճակը՝ խախուտ, սակայն տնտեսությունը զարգանում է «թռիչքաձեւ»: Պարոն կանցլերը նշեց, որ ժողովրդավարության պատմությունը նման բան չի գրանցել, եւ եթե նույնիսկ որեւէ երկրում տնտեսությունը զարգանում է առանց այդ կարեւոր կոմպոնենտների ապահովման, ապա դա խիստ ժամանակավոր բնույթ ունի: Մ. ԲԱՐՍԵՂՅԱՆ
