ՓՈՂԵՐԸ ԲԱԺԱՆԵԼՈՒ ԵՆ ԵԿՈՂ ՏԱՐԻ, ԲԱՅՑ՝ ՄԱՍԱՄԲ Վարչապետ Անդրանիկ Մարգարյանը պատասխանում է «Առավոտի» հարցերին – Պարոն վարչապետ, նախորդ օրը, ուշ գիշերով, կոալիցիայի խորհուրդը որոշեց ավանդների վերադարձի հարցի լուծման ձեւերը, իսկ դա նշանակում է, որ այլեւս խորհրդարանում չի քննարկվի համապատասխան օրինագիծը: Չե՞ք կարծում, որ այս որոշումը փակեց մի շարք քաղաքական ուժերի եւ գործիչների ժողովրդահաճո ելույթների եւ հայտարարությունների ճանապարհը: – Քանի որ կոալիցիան արդեն ունի հարցի մասին որոշում, ապա օրենքի տրամաբանությունը, որը ներկայացված է ԱԺ-ում՝ իրար չեն բռնում, եւ մեր որոշումը մասնակի լուծման հնարավորություն է տալիս, ու դրան կոալիցիայի անդամ կուսակցությունները համաձայնել են: Գտնում եմ, որ օրենքի քննարկումն արդեն անիմաստ է, բայց դեռեւս այդպիսի պայմանավորվածություն չունենք: Բայց ես կառաջարկեի մեր խմբակցությանը, որ մեր պատգամավորներն իրենց ստորագրություններն արդեն ետ վերցնեն: Ինչ վերաբերում է ժողովրդահաճո ելույթներին, «Հանրապետական» կուսակցությունը միշտ էլ դեմ է եղել այս հարցը շահարկելուն, եւ, եթե հիշում եք, ստորագրահավաքների ժամանակ մենք չենք թաքցրել, որ դեմ ենք, հայտարարել ենք, որ մենք դեմ ենք այդ կարգի շահարկումներին: Իմիջիայլոց, այդ մասին խոսել ենք նաեւ մեր նախընտրական արշավի ժամանակ ե՛ւ ես, ե՛ւ Սերժ Սարգսյանը: Այո, մենք ընդունում ենք, որ այդպիսի խնդիր գոյություն ունի, բայց կառավարությունը, պետությունը այդ հարցին կանդրադառնա այն ժամանակ, երբ կկարողանա մարդավայել փոխհատուցումներ տալ: Մեր քննարկումները կուսակցությունում, կառավարությունում, այնուհետեւ՝ կոալիցիայում, մեզ բերեցին այն եզրակացության, որ դա կարելի է լուծել բյուջեի շրջանակներում, որոշակի, ամենախոցելի շերտերի նկատմամբ, եւ այն մեխանիզմով, որ ոչ թե 30, 40 կամ 50 դոլար տրվի յուրաքանչյուր 1000 ռուբլու դիմաց, ինչպես առաջարկվում էր նախորդ նախագծում, այլ ավելի նորմալ թիվ: Իմիջիայլոց, մեր պատգամավորներից մեկը նախնական հաշվել էր, որ այժմ մեր որոշած գումարը համապատասխանում է 90-92 թթ. կենսապահովման զամբյուղի մոտ 50-60 տոկոսին, եթե դրան գումարենք նաեւ վաուչերները, որ պետությունը տվել էր, 20 տոկոս սեփականաշնորհման գումարը, որ տրվել է, բնակարանները եւ այլն, կարծում եմ, կարելի է խոսել լրիվ փոխհատուցման մասին: – Կանխեցիք իմ հաջորդ հարցը. ես պատրաստվում էի հարցնել, թե ավանդների վերադարձի մասին ո՞րն է Սերժ Սարգսյանի կարծիքը, քանի որ մի քանի օր առաջ նա իմ հարցին պատասխանելով՝ ասաց, որ դուք տեղյակ եք, եւ եթե հարմար գտնեք, կհրապարակեք պաշտպանության նախարարի կարծիքը: – Դա այն է, ինչ ես ասացի՝ մենք մեր խոսքը չենք դրժել ոչ այն ժամանակ, ոչ էլ այս քննարկումների ժամանակ, մենք մեր խոսքի տերն ենք: – Իսկ որքա՞ն է կազմում ավանդների ամբողջ գումարը: – Ըստ ժամանակավոր հանձնաժողովի նախնական հաշվարկների՝ 80 միլիոն դոլար: – Իսկ այս որոշմամբ ինչքա՞նն եք պատրաստվում վերադարձնել: – 2006-ին կվերադարձնենք երկու միլիոնը, հետագայում, միջնաժամկետ ծախսերի ծրագրում, երբ բազան հստակ կլինի, կորոշենք, թե ինչքանն ենք տալու: – Պատասխանատվությունը վերջիվերջո կառավարությանն է, չի՞ ստացվում, որ դուք ձեզ վրա չափազանց մեծ բեռ եք վերցնում: – Կառավարության առաջարկով Ազգային ժողովի հաստատմամբ է լինելու, եւ սրա տերը արդեն ոչ թե կառավարությունն է, այլ՝ առաջարկողը, հաստատողը եւ օրենքի տերը, իսկ դա Ազգային ժողովն է: – Ձեր կարծիքով՝ ինչո՞ւ ավանդների հարցն ավելի ակտիվացավ սահմանադրական հանրաքվեից առաջ: Արդյոք սա նման չէ՞ համապետական ընտրակաշառքի՝ ընտրությունից առաջ: – Սա ընտրակաշառքի հետ ոչ մի կապ չունի, քանի որ մենք որոշել ենք, որ դա ոչ թե առանձին օրենքով պետք է լինի, այլ բյուջեի հետ միասին, իսկ բյուջեն մենք բերում ենք տարվա վերջում, ուղղակի այս երկու հարցերը համընկան: – Ավանդների հարցը կապվում է նաեւ նախագահի իրավահաջորդի փնտրտուքների հետ, եւ դիտվում է որպես ավելի քաղաքականացված հարց, քան տնտեսական: – Նախագահի ապագա թեկնածուի համար դեռ երկու տարի կա, մենք դեռ պետք է 2007-ը անցնենք, հետո միայն խոսենք նախագահի թեկնածուի մասին, այնպես որ, սա կոալիցիայի առաջարկն էր՝ խնդիրը լուծել բյուջեի հետ միասին: – ՏԻՄ ընտրություններում իշխանությունն ինքն իր դեմ է կարծես պայքարում եւ յուրաքանչյուրն իր պատառն է ուզում փախցնել: – Պատառը չէ, յուրաքանչյուրը ձգտում է իր պատասխանատվությունը վերցնել ՏԻՄ-երի աշխատանքի համար, բնականաբար, յուրաքանչյուրը ցանկանում է ավելի շատ վերցնել, որովհետեւ դա բազա է նաեւ 2007-ի ընտրությունների համար, եւ մրցակցություն է գնում: Ցավոք, ընդդիմությունը չի մասնակցում կամ ակտիվորեն չի մասնակցում: – Ընդդիմությունը որոշել է «ոչ» ասել կամ բոյկոտել սահմանադրական հանրաքվեն, ձեր կարծիքն այս մասին: – Բոլոր դեպքերում ես համամիտ եմ իմ գործընկերների հետ, նրանք մասնակցել են սահմանադրական գործընթացին, պարզապես դա չի արտահայտվել քվեարկությամբ: Եվ իրենք իրավունք ունեն իրենց դիրքորոշման արտահայտման տարբեր ձեւեր գտնել: Եթե կոալիցիոն ուժերը քարոզելու են «այո»-ն, իրենք էլ իրավունք ունեն «ոչ» ասել. ես սա համարում եմ մեր ժողովրդավարության ձեռքբերումներից մեկը: – Կոալիցիան ինչքա՞ն ժամանակվա կյանք ունի: – Մինչեւ 2007 թվականը: ՄԱՐԳԱՐԻՏ ԵՍԱՅԱՆ
