ՄԻ ՊԱՏԱՌԻԿ ԱՇՏԱՐԱԿԻՑ Աշտարակ քաղաքում կառուցված այս պարսպապատ սրճարանը Աշտարակում հայտնի է որպես «ջինիշյանի սրճարան», միայն այն պատճառով, որ դրա հարեւանությամբ Ջինիշյանի հիմնադրամը կարուսելներ է տեղադրել: Իսկ սրճարանը պատկանում է Աշտարակի գործող քաղաքապետ եւ այդ պաշտոնում առաջադրված թեկնածու Աշոտ Ղալաչյանին: Մի ժամանակ այս տեղում երաժշտական դպրոց էր, որը, սակայն, հիմնովին քանդվել ու հավասարեցվել է հողին՝ հենց սրճարան կառուցելու նպատակով: Քաղաքի երաժշտական դպրոցն այսօր մշտական շենք չունի ու ստիպված է պատսպարվել մանկապարտեզի շենքի մի քանի սենյակներում, այն էլ՝ վարձավճարով: Իսկ երեկ տեղեկացանք, որ այս թեկնածուն սկսել է նախընտրական քարոզչական բուկլետներ տարածել, որոնք խախտում են «Ընտրական օրենսգրքի» միանգամից երկու հոդված` 21-ի 3-րդ կետը, ըստ որի՝ «արգելվում է քարոզչական պաստառի վրա Հայաստանի Հանրապետության զինանշանը կամ դրոշը պատկերելը», իսկ Ա. Ղալաչյանի բուկլետի վրա հստակ պատկերված է ՀՀ պետական դրոշը, եւ նույն հոդվածի կետ 6-ը՝ «քարոզչական տպագիր նյութերը պետք է տեղեկություններ պարունակեն այն կազմակերպությունների եւ անձանց մասին, որոնք պատասխանատու են հրատարակման համար, ինչպես նաեւ տպագրող կազմակերպության եւ տպաքանակի վերաբերյալ»: Կոնկրետ դեպքում բուկլետներում նշում չկա ոչ տպագրող կազմակերպության, ոչ տպաքանակի մասին: Սեփ. լր.
