ՏԻՄ ընտրությունների ամենավիճահարույց
հարցի՝ ընտրացուցակների մասին պարզաբանումներ է տալիս ԿԸՀ նախագահ Գարեգին Ազարյանը:
Բազմաթիվ են բողոքները, թե ինչ վիճակում են ընտրացուցակները:
Արարատի 17 համայնքներում դրանք առանց կնիքի են, Վանաձորում ցուցակներում նշված են
ընտրողների անձնագրային տվյալները: Երեկ անգամ վարչապետ Անդրանիկ Մարգարյանը լրագրողների
հետ զրույցում անդրադարձավ ցուցակների խնդրին եւ ասաց, որ հայտնաբերված անճշտություններն
ավելի շատ տեխնիկական բնույթի են: Վարչապետը պատճառաբանեց, որ առաջին անգամ են փորձարկվում
անձնագրային բաժինների կողմից ընտրացուցակների կազմման գործընթացը եւ դրա ծրագրային
մշակումը: Իսկ Կենտրոնի համայնքապետի թեկնածու Ռուզան Խաչատրյանը մինչ ընտրություններն
էր ապարդյուն փորձում Կենտրոնի ոստիկանապետից ստանալ 11 ընտրատեղամասերի ցուցակները:
Եվ հետո պարզ դարձավ, որ եթե մնացած տեղամասերում ընտրողների մասնակցությունը եղել
է միջինը 500, ապա այն տեղամասերում, որոնց ցուցակները չտրամադրվեցին՝ քվեարկել է
1300-1400 ընտրող: «Այսինքն՝ մեկ րոպեի ընթացքում երկու ընտրող է քվեարկել»,- հեգնել
էր Ռուզան Խաչատրյանը, որը ԿԸՀ-ին նաեւ բողոք էր ներկայացրել մի շարք տեղամասերի
վերաբերյալ, որտեղ ընտրողները սահմանված թվից՝ 2000-ից ավելին էին: Գարեգին Ազարյանն
«Առավոտին» ասել էր, որ պատասխանել է նրա դիմումներին, մինչդեռ տիկին Խաչատրյանը
պնդում է, թե չի ստացել ոչ մի պատասխան: Ահա թե մեր զրույցի ընթացքում ինչ
ասաց պրն Ազարյանը 2000-ից ավելի ընտրողներ ընդգրկող տեղամասերի վերաբերյալ. «Էլի՛
են լինելու: Ընտրությունները ճշգրիտ գիտություն են. պետք է հետեւել օրենքի պահանջներին:
Օրենքի համաձայն՝ մենք 45 օր առաջ ենք կազմավորում ընտրական տեղամասեր, 40 օր առաջ
փակցնում ցուցակները եւ 38 օրվա ընթացքում՝ մինչեւ քվեարկությունից 2 օր առաջ, ճշտում
ցուցակները՝ ավելացնում, լրացնում կամ պակասեցնում: Այս պայմաններում հնարավո՞ր է,
որ լինեն 2000-ից շեղումներ: Հիմա եթե քվեարկությունից 15-20 օր առաջ պարզում ենք,
թե մի տեղամասում կա 2030 մարդ՝ ի՞նչ պիտի անենք: Ճանապարհի կեսին կարո՞ղ ենք բացել
նոր տեղամաս: Ո՛չ, չենք կարող: «Ընտրական օրենսգիրքը» չի ընձեռում նման հնարավորություն:
Իսկ մենք իրականացնում ենք միայն այնպիսի լիազորություններ, որոնց իրավունքն ունենք
օրենքով, եւ ոչ թե գործում իբրեւ քաղաքացիներ ու անում այն, ինչ արգելված չէ: Ինձ
համար շատ դժվար կլինի դա բացատրել բոլոր կուսակցություններին: Բայց ոչինչ՝ ես համբերատար
կսովորեցնեմ նրանց»: Գարեգին Ազարյանը հայտնեց մեզ, որ հոկտեմբերի 4-ին գրություն
է ուղարկել ոստիկանության անձնագրերի եւ վիզաների վարչության պետ Ալվինա Զաքարյանին՝
նշելով, թե Հրազդան քաղաքի ընտրացուցակում կան անճշտություններ. «Գրել եմ՝ խնդրում
ենք Ձեր միջնորդությունը կարգավորելու համար: Իսկ ցանկացած հանձնարարություն լինում
է «խնդրում եմ» բառով»: Երեւանի համայնքներից ամենաշատ ցուցակային անճշտությունները
եղան Նուբարաշենի համայնքում: ԿԸՀ նախագահն ընդգծում է, թե սա առաջին ընտրությունն
էր՝ սեպտեմբերի 18-ին. «Այնտեղ մոտ 300 հոգի էին դիմել դատարան: Իսկ հոկտեմբերի 2-ին
Նոր Նորք համայնքում դատարան դիմեցին ընդամենը 72 մարդ՝ 97 հազար ընտրողից: Հիմա
ովքեր բողոքում են ցուցակների կազմման այս կարգից՝ չե՞ն տեսնում այն առաջընթացը,
որ ամեն շաբաթ լինում է ցուցակների հետ կապված»: Մեր հարցին, թե այսպիսով մինչեւ
սահմանադրական հանրաքվեն հնարավոր կլինի՞ ցուցակները բերել «քրիստոնեական տեսքի»,
ինչպես ասաց ԱԺ նախագահ Արթուր Բաղդասարյանը՝ տեղիք տալով կատակի, թե մինչ այժմ դրանք
մուսուլմանական տեսքի էին: «Ո՛չ, ես համաձայն չեմ, որ կբերվեն «քրիստոնեական տեսքի»,-
առարկեց Գարեգին Ազարյանը:- Ցուցակները երբե՛ք չեն բերվի այդ տեսքի, եթե մենք զբաղված
ենք ընդամենն անընդհատ ասելով, թե ցուցակները վատն են: Ուղիղ 2 տարի ինտերնետում
տեղադրված է ՀՀ ընտրողների ցուցակը»: Ընդհատեցինք նրան, քանի որ գիտեինք այդ օրինակը՝
միայն մի լրագրող է դիմել ԿԸՀ-ին՝ ասելով, թե իր անունը բացակայում է ցուցակից: «Ուզում
եմ հարցնել մեր կուսակցություններին, հասարակական կազմակերպություններին՝ հատկապես
դիտորդական առաքելություն իրականացնող, որոնք ահազանգեր են հնչեցնում, թե հասե՜ք,
փրկե՜ք, ցուցակներում մարդիկ չկան եւ այլն, ինչո՞վ էին զբաղված մինչ այժմ: Երբ ցուցակների
խնդիրը դառնա հասարակության խնդիրը՝ մենք կունենանք «քրիստոնեական տեսքի» ցուցակներ»,-
շեշտեց Գարեգին Ազարյանը: ԱՆՆԱ ԻՍՐԱՅԵԼՅԱՆ Հ.
Գ. ԿԸՀ նախագահը դժգոհեց. «Սպասում էի, որ գոնե մի լրագրող, որը հետեւել է նախորդ
ընտրություններին՝ կասի, որ արդեն 2,5 տարի է մեր երկրում չկա «լցոնում» բառը»: Ընդգծենք՝
մեկնակետը 2003-ն է՝ նախագահի եւ ԱԺ ընտրության տարին:
