ԵՐԿՈՒ ՎԱԽԸ ՄԻ ՄԱՀ Է «Արդարության»՝ անցած շաբաթավերջին կայացած նիստից հետո խմբակցության անդամները հայտնել էին լրագրողներին, թե դաշինքի ստեղծվելիք շտաբը կազմակերպելու է հանդիպումներ ժողովրդի հետ հանրապետության ողջ տարածքում: Եվ առաջին նման հանդիպումը նախատեսվում է անցկացնել սեպտեմբերի 30-ին Երեւանի Նոր Նորք համայնքում: Սեպտեմբերի 29-ին «Արմինֆո» գործակալությունը հաղորդեց, թե հաջորդ օրը, ժամը 18-ին Գայի արձանի մոտ կայանալու է այդ հանրահավաքը: Երեկ նշանակված ժամին այդ հուշարձանի մոտ հերթապահում էին 2-3 ոստիկաններ: Հենց նրանցից մեկը մեզ տեղեկացրեց, թե հանրահավաքը կայանալու է դիմացը՝ շատրվանների մոտ: Այստեղ արդեն խմբված էին շուրջ 50 ոստիկաններ: Նրանցից շատերը տեղակայվել էին շատրվանը օղակի մեջ առած սրճարաններում, ոմանք էլ հսկողություն էին անցկացնում կանգառում… Սակայն չկային ո՛չ ցուցարարներ, ո՛չ էլ ընդդիմության ներկայացուցիչներ: Ու գուցե այդ պատճառով մի քանի ոստիկաններ անգամ մտան շատրվանի ետեւում գտնվող անավարտ շինարարական օբյեկտ. թերեւս այնտեղ թաքցրած բարձրախոսներ էին փնտրում կամ էլ պահ մտած «Արդարություն» դաշինքի ներկայացուցիչների: Փնտրտուքն ապարդյուն էր: Ոստիկանները, որ ամառային կարճաթեւ համազգեստներով էին, դանդաղ, բայց հաստատուն տեմպերով մրսում էին: Սկսեցին իրարից բաճկոն խնդրել, սրճարաններից՝ թեյ: Մենք արդեն ճշտել էինք, որ չի լինելու հանրահավաք: Սակայն տեւական ժամանակ զգուշանում էինք այդ մասին ասել ոստիկաններին: Ենթադրեցինք, թե մեկ է՝ չեն հավատա ու կկարծեն, թե այդ միջոցով ցանկանում ենք ապակողմնորոշել իրենց, հեռացնել տարածքից եւ հանգիստ հանրահավաք անցկացնել: Սակայն երբ ի վերջո հայտնեցինք այդ լուրը՝ ոստիկաններից մեկն ասաց. «Ավելի լավ մեզ համար, տիկին ջան: Հանգիստ նստած ենք, էլի»: … «Արդարություն» խմբակցության ղեկավար Ստեփան Դեմիրճյանը հայտնեց, թե հանրահավաքը հետաձգվել է՝ կսկսվի հանրաքվեի քարոզարշավը եւ նոր կկայանա ոչ միայն այդ, այլեւ բազմաթիվ այլ հանդիպումներ: Ա. Ի.
