Այն,
որ Բժշկական համալսարանի ռեկտոր Վիլեն Հակոբյանը վաղուց անցել է իր պաշտոնի համար
վերջին «սահմանագիծը» (65 տարին), շատերն իմացան գործարար Գագիկ Ծառուկյանից, որը
պարոն Հակոբյանին ավտոմեքենայի բանալիներ հանձնելիս՝ շեշտեց, որ նվերն անում է ռեկտորի
75-ամյակի առիթով: Հանրապետության առաջատար բուհերի ղեկավարների տարիքն աննրբանկատորեն
հիշատակելը թերեւս տեղին չէ, սակայն ստիպված ենք: Վերջերս կրթության եւ գիտության
փոխնախարար Արա Ավետիսյանի այն հայտարարությունը, թե որոշ ռեկտորներ պարզապես կառչած
են իրենց աթոռներից, պատճառ դարձավ Թատրոնի եւ կինոյի պետական ինստիտուտի ռեկտոր
Սոս Սարգսյանի հրաժարականի դիմումին: Կրթության եւ գիտության նախարար Սերգո Երիցյանին
հաջորդ օրը դիմում է ուղարկել նաեւ Հերացու անվան բժշկական համալսարանի ռեկտոր Վիլեն
Հակոբյանը՝ նշելով, որ եթե Արա Ավետիսյանը «շարունակի իր վարկաբեկիչ ելույթները»,
Սոս Սարգսյանի դիմումին կհետեւի նաեւ իր հրաժարականի դիմումը: Առհասարակ՝ Արա Ավետիսյանի
վերոնշյալ հայտարարությունն անչափ զայրացրել էր Վիլեն Հակոբյանին. «Գտնում եմ, որ
պարոն Ավետիսյանը իր խոսքերով վարկաբեկել է ոչ միայն ռեկտորներին, այլեւ իր կուսակցությունը՝
հավանաբար ղեկավարվելով այն սցենարով, որ կուսակցությունը օգտագործում են աթոռ զբաղեցնելու
համար: Ես եւ շատ ռեկտորներ իրենց աթոռները զբաղեցրել ենք առանց կուսակցականությունը
չարաշահելու»: Պարոն Հակոբյանը պնդեց, որ ինքը երբեք իր աթոռից կառչած չի եղել եւ
պատրաստ է հարգել օրենքի տառն ու ցանկացած պահի հեռանալ իր պաշտոնից: Ունի՞ պարոն
Հակոբյանը նախընտրած թեկնածու, որին կարող է առանց ափսոսանքի թողնել իր գործը. «2,5
հազար տարի առաջ Պյութագորասին ասել են. «Ուսուցի՛չ, դու անփոխարինելի ես»: «Եթե
մատս դնեմ ջրի բաժակի մեջ ու այնտեղ հետք թողնեմ,- պատասխանել է Պյութագորասը,- ուրեմն
անփոխարինելի եմ»: Պարոն Հակոբյանը բերեց այս օրինակը՝ ասելու համար, որ ինքը եւս,
Պյութագորասի պես, անփոխարինելի չէ: Ռեկտորի պաշտոնի բոլոր հնարավոր թեկնածուների
մասին Վիլեն Հակոբյանը նորմալ վերաբերմունք ունի՝ ենթադրելով, որ իրենից հետո իր
ղեկավարած բուհը բանիմաց ու արժանի մեկի ձեռքը կընկնի: Մեր զրույցի ավարտին պարոն
Հակոբյանը խնդրեց անպայման նշել, որ այլ ռեկտորներ թող չնեղանան, սակայն Սոս Սարգսյանի
միայն ներկայությունը Թատրոնի եւ կինոյի ինստիտուտում՝ կարող է ոգեւորել ուսանողներին.
«Սոս Սարգսյանը մեր ազգի մեծությունն է: Եկեք չնեղացնենք նրան»: Փոխնախարար
Արա Ավետիսյանը գտնում է, որ Սոս Սարգսյանը եւ Վիլեն Հակոբյանը շատ արժանի մարդիկ
են: Ինչ վերաբերում է կուսակցական պատկանելությանը, ապա «ես իմ աթոռը զբաղեցրել եմ
գրեթե տասը տարի առաջ, եւ կուսակցականությունը դրա հետ որեւէ կապ չունի»,- բժշկական
համալսարանի ռեկտորին հակադարձեց Արա Ավետիսյանը՝ նշելով, որ իր հայտնի ելույթում
ինքը նշել է, որ աթոռից կառչած են որո՛շ ռեկտորներ եւ ոչ թե բոլորը: «Ես ամենեւին
նկատի չեմ ունեցել Վարպետին՝ Սոս Սարգսյանին եւ Վիլեն Հակոբյանին»: Բնականաբար, հարց
առաջացավ. գուցե նա նկատի ունի Ռադիկ Մարտիրոսյանի՞ն: «Թողնում եմ առանց մեկնաբանության»,-
պատասխանեց պարոն Ավետիսյանը: Քանի որ մեր հարցն առանց մեկնաբանության թողնելով՝
պարոն Ավետիսյանը նոր մեկնաբանությունների տեղիք տվեց, մասնավորապես, որ նման հայտարարություն
անելիս նկատի է ունեցել հենց ԵՊՀ ռեկտոր Ռադիկ Մարտիրոսյանին, փորձեցինք վերջինից
ճշտել՝ որքանո՞վ է կառչած իր աթոռին եւ պատրաստվո՞ւմ է օրերից մի օր թողնել իր պաշտոնը.
«Այդ հարցում ես պարոն Ավետիսյանի հետ գործ չունեմ եւ, առհասարակ, նրա անունը լսել
չեմ ուզում»: ԼԻԼԻԹ ԱՎԱԳՅԱՆ
